Go Back

Thaburi Chapter 91

• 1. ŨRĨA ũtũire ahithĩtwo ũhitho-inĩ wa Ũrĩa-wĩ-Igũrũ-Mũno arĩikaraga kĩĩgunyĩ-inĩ kĩa Mwene-Hinya.
• 2. Ngũkiuga atĩrĩ, ũhoro wa Jehova, atĩ, Nĩwe irahĩro rĩakwa o gwata gĩikaro gĩakwa kĩirigĩre; nĩwe Ngai wakwa, ũrĩa ndĩĩhokete.
• 3. Tondũ we nĩwe wa gũgũteithũra gĩkerenge-inĩ kĩa mũtegi, o gwata mũrimũ-inĩ ũrĩa wa mũmitũko.
• 4. Arĩkũgitagĩra na njoya ciake cia mĩhĩko, ruungu rũa mathagu make nĩho ũrĩĩgitagia; ũhoro-wa-ma wake-rĩ, nĩ ngo, na noguo gĩthuma.
• 5. Ndũrĩĩtigagĩra itebebia rĩrĩa rĩngĩũka ũtukũ, kana mũguĩ wa gũthĩrĩrĩka mũthenya,
• 6. O na kana mũrimũ ũrĩa ũceerangaga na nduma, kana mũthiro wa kũgũmania o mĩaraho.
• 7. Rũere-inĩ rũaku andũ no kũringa thĩ ngiri ng’ima, mwena waku wa ũrĩo magũe ngiri ikũmi, no wee ndũngĩkuhĩhĩrio nĩguo.
• 8. Wee no kwĩrorera ũkerorera na maitho maku, wone arĩa aaganu makĩgwata kũrĩhwo ũũru wao.
• 9. Tondũ wee nĩuugĩte ũũ: Jehova, nĩwe irahĩro rĩakwa! wee nĩũtuĩte Ũrĩa-wĩ-Igũrũ-Mũno gĩtũũro gĩaku;
• 10. Gũtikĩrĩ ũũru o na ũrĩkũ ũgakũnyita, gũtirĩ itũhũhũ rĩngĩthengerera hema yaku.
• 11. Nĩ gũkorũo nĩagaatha araika ake nĩ ũndũ waku, makũmenyagĩrĩre ikĩro-inĩ ciaku ciothe.
• 12. Marĩgũkuuaga ndayaya na hĩ ciao, ndũkae gũkahĩngwo kũgũrũ nĩ ihiga.
• 13. Ũgakinyĩrĩria mũrũthi, o na nduĩra; ngatia ĩrĩa nyanake, o gwata ndamathia-rĩ, ũitereme na magũrũ.
• 14. Kuona nĩanyitĩtie wendo harĩ niĩ, tondũ ũcio nĩndĩĩmũhatũraga hatĩ-inĩ; ndĩĩmũigaga handũ haraya na igũrũ, nĩ ũndũ nĩamenyete rĩĩtwa rĩakwa.
• 15. Arĩngayagĩra, na niĩ ngamwamũkĩria; nĩndĩrĩikaraga nake hingo ya mĩnyamaro, ndĩrĩmũtharaga harĩ yo, na kũmũtĩithia ndĩmũtĩithie.
• 16. Ngũmũtũũria matukũ maingĩ o kinya akaigania, ndĩkĩmuonagie ũhonokio wakwa.

Home