Go Back

Thaburi Chapter 84

• 1. Ĩ JEHOVA mwene mbũtũ cia ita, ciikaro ciaku-rĩ, itikĩrĩ thakaru!
• 2. Roho wakwa wĩ na mĩĩto mũno, ĩĩ-ni, o na ũkorũo nĩ hinya, nĩ kwĩrirĩria nja cia Jehova; ngoro yakwa o na mwĩrĩ-rĩ, nĩ gũkũngũĩra irakũngũĩra Mũrungu o ũrĩa ũrĩ muoyo.
• 3. Kanyoni nĩ konu nyũmba, thũngũrũrũ ĩkegĩĩra na gĩikaro, harĩa ĩngĩikaria tũcui twayo, o mahakĩro-inĩ maku, wee Jehova mwene mbũtũ cia ita, o wee Mũthamaki wakwa, na ningĩ Ngai wakwa.
• 4. Gũkena nĩ arĩa maikaraga nyũmba yaku: o matirĩ hĩndĩ matarĩkũgoocaga.
• 5. Gũkena-rĩ, no mũndũ ũrĩa ũrutaga hinya wake harĩ wee, na ngoro yake ĩkerekera na njĩra cia agendi iria cia gũthiĩ Zayuni.
• 6. Rĩrĩa mekũhungura gĩtuamba kĩrĩa gĩa Kĩrĩro magĩtuaga kũndũ kwĩ na ithima; ĩĩ-ni, mbura ya maguna-ng’ombe igagĩkĩhumbithia irathimo.
• 7. Mathiaga o makĩĩongagĩrĩra hinya, makaya gũkoneka, mũndũ o mũndũ, mbere-inĩ ya Ngai kũu Zayuni.
• 8. Ĩ Jehova, Ngai mwene mbũtũ cia ita, kĩigue ihoya rĩakwa; tega matũ, wee Ngai wa Jakubu.
• 9. Ĩ Ngai, o wee ngo iitũ tũrore, ũbare ũthiũ wa ũrĩa waku mũitĩrĩrie-maguta.
• 10. Amu mũthenya ũmwe ũtindĩtwo nja ciaku nĩ mwega kũrĩ ĩrĩa ĩngĩ o na ĩngĩrĩ ngiri. Ndenda kaba ndũgamage hingĩro-inĩ cia nyũmba ya Ngai wakwa, gũkĩra gũtũũra thĩinĩ wa hema iria cia ũmaramari.
• 11. Nĩ ũndũ Jehova Ngai nĩ riũa, na nĩ ngo: Jehova-rĩ, arĩtwĩkaga maũndũ ma uuma-andũ, na atũtĩithie; arĩa me na mĩthiĩre mĩkinyanĩru ndarĩ ũndũ mwega angĩmaima.
• 12. Ĩ Jehova mwene mbũtũ cia ita, mũndũ ũrĩa ũkwĩhokete wee, kaĩ nĩwe mũkeni-ĩ!

Home