Go Back

Thaburi Chapter 73

• 1. ACA, NOGUO Ngai no wega ekaga andũ a Isiraeli, o arĩa matakĩrĩ na ũũru ngoro.
• 2. No niĩ hakwa-rĩ, magũrũ makwa maratigairie hanini mahigũke, makinya makwa magagĩtigaria o hanini matenderũke.
• 3. Nĩ amu ndĩrarĩ na ũiru nĩ ũndũ wa andũ arĩa erahi, nĩ gũkĩona ũrĩa andũ arĩa aaganu matũire magaacĩire.
• 4. Nĩ gũkorũo matiiguaga ruo magĩkua; hinya wao ũkoragwo ũrĩ o mũnyitu.
• 5. Mationanaga na nditikũ ta andũ arĩa angĩ, o na kana makonio mahũra ta andũ arĩa angĩ.
• 6. Nĩkĩo mwĩtĩo ũmaikaraga ta kĩrengeri ngingo-inĩ yao; ũtoi-rĩ, magakĩwĩhumba ta nguo.
• 7. Maitho mao tondũ wa ũnoru nĩ kuumĩra moimĩrĩte; indo me nacio gũkĩra ũrĩa ngoro ingĩĩrirĩria.
• 8. O nĩ a kĩnyũrũri, na tondũ wa ũũru ũrĩa me naguo, materetaga o ndeto cia ũrĩa marĩthĩnia andũ; kwaria kwao no kwa mwĩtũũgĩrio.
• 9. Kanua kao nĩ ta makaigĩte o igũrũ matu-inĩ, rũrĩmĩ rũao rũhungurucũkaga gũkũ thĩ.
• 10. Tondũ ũcio andũ ake magacoka naho; riita rĩa maĩ rĩiyũru rĩgakĩinĩkĩrĩrio nĩo.
• 11. Makoiga, Mũrungu akĩrĩ mũmenyi na kĩ? Ũrĩa-wĩ-Igũrũ-Mũno arĩ o ũndũ oĩ?
• 12. Onei, arĩa aaganu nĩo acio; na tondũ wa gũikaraga o hingo ciothe na thayũ, ũtonga wao nĩwĩongagĩrĩra.
• 13. Aca, ti-itherũ, ’theretie ngoro yakwa tũhũ, na no tũhũ ngĩthambia moko rĩĩthambĩro-inĩ rĩa kũnina ũũru;
• 14. Amu ndindagio na mahũra mũthenya wothe, o rũcinĩ, o rũcinĩ, ngarokaga kũherithio.
• 15. Ingĩroigire, Nĩ kwaria ngũkĩaria, njuge ũguo-- Hĩ! hau nĩ kũgarũka ingĩragarũkire rũciaro rũrũ, o ciana ici ciaku.
• 16. Na ndaikara o ngĩĩciria ũhoro ũcio ndĩũmenye, ũratuĩka wa mĩnoga maitho-inĩ makwa;
• 17. Onginya ndatonya handũ harĩa haamũre ha Mũrungu, na ndĩraitĩka gũtarania ũhoro wao wa thutha.
• 18. Aca, noguo ũmaigaga kũndũ kũrĩa gũtenderu; nĩũmairũraga makaanangĩka o kwanangĩka.
• 19. Nĩ atĩa ũguo maagĩkira ihooru o kahinda kanini! nĩ anine nĩ matebebia o kũninwo.
• 20. Ta kĩroto hĩndĩ ĩrĩa mũndũ aahindũka, no taguo, Mwathani, wearahũra, ũkarurũka ciĩruru icio ciao.
• 21. Hĩndĩ ĩo ngoro yakwa ĩrathitĩte nĩ kĩeha, na ngagariũkagwo nĩ higo-rĩ,
• 22. Ndĩraikarĩte ta ndĩ kĩnunwa, noguo ndĩrarigĩtwo; harĩ wee ngahaana o ta nyamũ.
• 23. No kaĩ hingo ciothe tũrĩ o hamwe nawe-ĩ; nĩ kũ’nyita ũ’nyitĩte guoko kwa ũrĩo.
• 24. Ũrĩndongoragia na ũtaari waku, na thutha ũkangwata ũgeni riri-inĩ.
• 25. Nũ ũngĩ ndĩ nake kũu igũrũ? twĩ nawe-rĩ, gũkũ thĩ o nakuo gũtirĩ kĩndũ ingĩĩrirĩria.
• 26. Mwĩrĩ wakwa o na ngoro no kũhinyara, ĩndĩ Ngai nĩwe ndũmba ya ihiga harĩ ngoro yakwa, o na nowe rũgai rũakwa tene na tene.
• 27. Amu-rĩ, arĩa magũikaraga hanene nĩ gũtoma magatoma; arĩa othe matuĩkaga ahũri ũmaraya nĩ gũtigana nawe, nĩ kũnina ũmaninaga.
• 28. No niĩ-rĩ, gũkuhĩhĩria Ngai, nĩkuo kũnjagĩrĩire; Mwathani Jehova nowe nduĩte irahĩro rĩakwa, mawĩko maku mothe ndĩkĩmaganage.

Home