Go Back

Thaburi Chapter 72

• 1. Ĩ NGAI, he mũthamaki mĩtuĩre yaku, o we mũriũ wa mũthamaki-rĩ, ũkĩmũhe ũthingu waku.
• 2. Nake no aciragĩre kĩrĩndĩ gĩaku na mĩcirĩre ya ũthingu, agĩtuagĩra athĩnĩki aku matua ma kĩhooto.
• 3. Irĩma no iciaragĩre kĩrĩndĩ thayũ, o gwata ithũngũri, nĩ ũrĩa kũgĩĩte na ũthingu.
• 4. Athĩnĩki arĩa me kĩrĩndĩ-inĩ, arĩmatuagĩra o wega, na ahonokagie ciana cia arĩa akĩa, akĩhehenjaga ũrĩa ũmagũmagĩra.
• 5. Andũ no matũũre magwĩtigĩrĩte o ũrĩa riũa rĩgũtũũra, o gwata mweri--nginya njiarũa na njiarũa.
• 6. Arĩikũrũkagĩra thĩ ta mbura ĩkiura nyeki-inĩ kũrĩa gũtue, ta rũthuthuũ, ũrĩa rũihũgagia tĩri.
• 7. Matukũ make ũrĩa mũthingu nĩ kũhamba arĩhambaga, na gũtũũre na thayũ mũingĩ, nginya o hingo mweri ũkarindũka.
• 8. Nĩagĩe na watho kuuma iria-inĩ rĩmwe o nginya rĩrĩa rĩngĩ, na kuuma Rũũĩ-inĩ o nginya ituri cia thĩ.
• 9. Atũũri bũrũri ũrĩa wa rũng’ũrĩ nĩmainamĩrĩre mbere yake, nacio thũ ciake iturumithie kanua tĩri-inĩ.
• 10. Athamaki a Tarashishi na a mabũrũri ma iria-inĩ, nĩmamũrutagĩre maruta; athamaki a Sheba na a Seba o nao nĩmamũtegagĩre matega.
• 11. Ĩĩ-ni, athamaki othe marokĩmũgũĩra thĩ, atungatagĩrũo nĩ ndũrĩrĩ ciothe.
• 12. Nĩ ũndũ mũndũ mũkĩa aakaya, we nĩarĩmũteithũraga, gwata ũrĩa mũthĩnĩki, ũtakĩrĩ na wa kũmũteithia.
• 13. Ũcio ũtarĩ na hinya, o ũcio mwagi-rĩ, nĩarĩmũiguagĩra tha; andũ acio akĩa, akĩhonokie mĩoyo yao.
• 14. We nĩ gũkũũra arĩkũũraga muoyo wao harĩ ũhahanyi, na gũcambahĩrũo; thakame yao-rĩ, arĩonaga ta arĩ kĩndũ kĩĩ na bata.
• 15. Gũtũũra arotũũra na aheagwo thahabu ĩrĩa yumaga Sheba, na ahoyagĩrũo nĩ andũ o hingo ciothe, mũthenya wothe matindage o makĩmũrathima.
• 16. Bũrũri ũrogĩaga na bũthi wa ngano nginya o irĩma igũrũ; maciaro mayo nĩmagĩthũngũthanage ta mĩtĩ ĩrĩa ya Lebanon: nakuo itũũra-inĩ andũ nĩmahambage o ta mahuti ma thĩ.
• 17. Rĩĩtwa rĩake rĩrotũũra tene o na tene; riũa rĩtarindũkĩte-rĩ, rĩĩtwa rĩu rĩake nĩrĩtũũre o rĩtambaga: andũ nĩmerathimanagie nake, ndũrĩrĩ ciothe ikĩmwĩtage mũkenu.
• 18. Jehova Ngai arogathwo, o we Ngai wa Isiraeli, arĩ we wiki wĩkaga maũndũ ma magegania;
• 19. Rĩtwa rĩake narĩo, rĩu rĩa riri, rĩrogathagwo tene na tene; nayo thĩ yothe ĩroiyũrũo nĩ riri wake! Amen, na ningĩ, Amen.
• 20. Mahoya ma Daudi, mũrũ wa Jesii, maathirĩra haha.

Home