Go Back

Thaburi Chapter 69

• 1. NGAI, ’honokia, nĩ amu maĩ marĩ kũndonya o nginya ngoro thĩinĩ.
• 2. Nĩ gũtonyerera ndĩratonyerera mũtondo-inĩ, o harĩa hatangĩrũgamĩka; nginyĩte maĩ-inĩ o harĩa hariku, ngahubĩkanio nĩ mũiyũro wamo.
• 3. Kũnoga nĩ’nogete nĩ gũkaya, mũmero ũkang’ara; maitho makwa nĩ maagu hinya nĩ gũgĩtanya Ngai wakwa.
• 4. Arĩa ma’thũire hatarĩ gĩtũmi-rĩ, nĩ aingĩ kũrĩ njuĩrĩ ciakwa cia mũtwe; acio mendaga kũ’nina metuĩte thũ ciakwa tũhũ nĩ andũ akandĩru: ndacokithirio indo itaatunyanĩte.
• 5. Ĩ Ngai, wee nĩwe ũũĩ ũrimũ wakwa wa ũũra-matũ; ũgeri wakwa wa ngero wee ndũngĩũhithĩka.
• 6. Andũ arĩa agwetereri, ndũgakĩreke maconoke nĩ ũndũ wakwa, wee Mwathani Jehova mwene mbũtũ cia ita; acio makũrongoragia-rĩ, ndũgakĩreke manyararĩke nĩ ũndũ wakwa, wee Ngai wa Isiraeli.
• 7. Nĩ gũkorũo nduĩkĩte kĩmene no ũndũ waku, wee, ũthiũ wakwa ũgakĩhumbwo nĩ thoni.
• 8. Nduĩkĩte ta mũgeni harĩ andũ aitũ, ngakĩhaana ta mũrũrĩrĩ harĩ ariũ a maitũ.
• 9. Tondũ nĩ kĩyo kĩrĩa ndĩ nakĩo kĩa nyũmba yaku kĩndĩĩte, nacio inyenyo cia arĩa makũnyenyaga igũĩte o na niĩ.
• 10. Rĩrĩa ndarĩrire, na ngĩĩnyerekia ngoro nĩ kwĩhinga kũrĩa, ũndũ ũcio ũgĩgĩtuĩka o wa kũ’nyenyithia.
• 11. Ndatua ikũnia nguo yakwa ya kwĩhumba, ngĩtuĩka ta rũgano harĩ o.
• 12. Andũ arĩa ndinda-thome nĩ ũhoro wakwa materetaga, na nĩ niĩ rũĩmbo rũa anyui a njohi.
• 13. No atĩrĩ, niĩ, nowe Jehova ndĩrahoya, hingo ya gwĩtĩkĩrĩka; wee Ngai, tondũ wa ũrĩa ũtugi waku wĩ mũingĩ-rĩ, njokeria kũringana o na wĩhokeki wa ũhonokania waku.
• 14. Ndangĩra, ũndute mũtondo-inĩ, ndũgakĩreke ndonyerere: nĩndeithũrũo harĩ arĩa ma’thũire, nĩndutwo maĩ-inĩ maya mariku.
• 15. Mũiyũro wa maĩ-rĩ, ndũkareke ũ’hubĩkanie; tiga kũreka ’merũkio nĩ ndia ici: irima rĩa gĩkuũ-rĩ, ndũgakĩreke rĩ’hingĩrĩrie thĩinĩ wa kanua karĩo.
• 16. Jehova, nyamũkĩria; amu ũtugi waku nĩ mwega mũno: wĩĩ’hũgũrĩre ũkĩnjerekere kũringana na ũrĩa matha maku maingĩhĩte.
• 17. Ũgĩtige kwĩhithĩra ndungata ĩno yaku ũthiũ; amu ndĩ mũnyamarĩku kĩnyamũkĩrie o narua.
• 18. Thengerera harĩ ngoro yakwa, ũmĩkũũre: tondũ wa thũ ciakwa-rĩ, kĩnjohorithie.
• 19. Wee nĩwe ũũĩ ũrĩa ’nyenyagwo, na ũrĩa njonoretwo, o na ũrĩa ’nyararĩkĩte: arĩa othe me muku na niĩ makĩrĩ o mbere yaku.
• 20. Kũnyenyũo nĩgũ’thuthĩte ngoro, ngakĩigua ũũru o mũno: ndĩretereire nyone wa kũnjakaĩra, na kũraaga; ngĩone a kũ’nyamarũra, na ndione.
• 21. Gĩa-kũrĩa kĩrĩa mara’heire nĩ mũtĩ mũrũrũ, ningĩ ndanyota, nĩ ndibei ngagatu mara’heire ’nyue.
• 22. Metha ĩrĩa ĩrĩ mbere yao, ya kũrĩĩra, ĩrotuĩka mũtego, hĩndĩ ĩo maikaire na thayũ ĩgĩtuĩke kĩndũ gĩa kũmagwatia!
• 23. Maitho mao marogĩa nduma, matige kuona; na ũtũme njuthĩ ciao itũũre o itetemaga!
• 24. Maitũrũrĩre mang’ũrĩka maku; nĩmakinyĩrĩrũo nĩ marakara maku marĩa mahiũ!
• 25. Harĩa maakĩte harokira ihooru; hema ciao irokĩaga wa kũitũũra!
• 26. Nĩ gũkorũo ũrĩa wee ũringĩte nĩmamũthingataga, arĩa wee ũguraritie, ũhoro wa ruo rũao nĩguo materetaga.
• 27. Onganĩrĩria waganu wao na waganu ũngĩ, matikanagĩtonye ũthingu-inĩ waku,
• 28. Nĩmathario mbuku-inĩ ya arĩa a gũtũũra muoyo, matige gũkĩandĩkanĩrio na arĩa athingu.
• 29. No niĩ-rĩ, ndĩ mũthĩnĩku, na ngarĩo nĩ kĩeha, reka ũhonokio waku, Ngai, ũnjige handũ haraya na igũrũ.
• 30. Rĩĩtwa rĩa Ngai ngũrĩkumia na rũĩmbo, kũnenehia ndĩkĩmũnenehie na ngatho iria ngũmũcokeria.
• 31. Naguo ũndũ ũcio no gũkenia Jehova kũrĩ kũmũhe ndegwa, kana gĩcaũ kĩĩ na hĩa na mahũngũ.
• 32. Andũ arĩa ahoreri mona uguo, no makene: inyuĩ mũrongoretie Ngai-rĩ, ngoro cianyu ta nĩiriũke!
• 33. Amu andũ arĩa aagi, Jehova no amaiguaga; arĩa ake ohe ndangĩmaagĩra bata.
• 34. Igũrũ na thĩ ta nĩimũgooce, gwata maria marĩa manene, na kĩrĩa o gĩothe gĩthiangaga thĩinĩ wamo.
• 35. Amu Ngai nĩakahonokia Zayuni, na aake matũũra ma Juda; nao andũ nĩ gũikara magaikara kuo, gũtuĩkĩte kwao kĩũmbe.
• 36. Na kũgaya nĩ mbeũ ya ndungata ciake igakũgaya; arĩa menda rĩĩtwa rĩake, nĩo magatũũraga kuo.

Home