Go Back
Thaburi Chapter 66
- 1. ANĨRĨRAI Ngai na gĩkeno, inyuĩ mabũrũri mothe ma thĩ:
- 2. Inai mũrahe riri wa rĩĩtwa rĩake;
gũkumio gwake mũgĩtũme kũgĩe riri.
- 3. Ĩrai Ngai atĩrĩ, Mawĩko maku-rĩ, ĩ matikĩrĩ na wĩtigĩrithanio mũnene!
tondũ wa ũrĩa hinya waku wĩ mũnene, thũ ciaku no ciũke ciĩnyihĩrĩrie harĩ wee.
- 4. Andũ othe a thĩ nĩwe makainamĩrĩra,
na kũina makũinagĩre magĩkũgoocaga;
ĩĩ-ni, rĩĩtwa rĩaku rĩo makĩrĩinagĩre.
- 5. Ũkai, muone mawĩko ma Ngai;
maũndũ marĩa ekaga ciana kĩrĩndĩ nĩ ma gĩĩtigĩrithanio kĩnene.
- 6.
Iria rĩrĩa inene, we nĩaarĩgarũrire ũrĩa rĩatariĩ rĩgĩtuĩka thĩ niaru;
rũũĩ naruo, kĩrĩndĩ gĩkĩrũringa na magũrũ;
kũu kũmũkenera tũgĩkĩmũkenera mũno.
- 7. Tondũ wa ũguo arĩ ũhoti, atũũraga e mwathani tene na tene;
maitho make matũire o macũthagĩrĩria ndũrĩrĩ:
arĩa aremi-rĩ, nĩmamenye gũkanetũũgĩria.
- 8. Ĩ no kĩgathei Ngai witũ, inyuĩ ĩruka ici cia andũ,
oererai mũgambo wa kũmũkumia,
- 9. O we ũrĩa ũigĩte ngoro ciitũ harĩa tũngĩikara na muoyo,
na ndarekete magũrũ maitũ mahigũrũo.
- 10. Amu wee, Ngai, nĩũtũgeretie kũroria niũtũroranĩtie,
o ta ũrĩa betha ĩroragio rĩrĩa ĩgũtherio.
- 11. Watũmire tũgwatio nĩ wabu ya mũtego;
watũigĩrĩire mũrigo mũgongo watũhihinyaga mũno.
- 12. Watũmire andũ mahaicĩte mbarathi matũrange mĩtwe;
twatuĩkanĩirie mwaki-inĩ o na tũgĩtuĩkanĩria maĩ-inĩ:
no rĩrĩ, ũgĩcoka ũgĩtuumĩria wega-inĩ mũingĩ.
- 13. Nĩngũtonya nyũmba yaku ndĩ na mahaki ma gũcinwo,
ngĩkũhingĩrie mĩĩhĩtwa yakwa,
- 14. O yo ĩrĩa mĩromo yakwa yatumũrire,
kanua gakwa gagĩkĩmĩrĩkia, rĩrĩa ndahatĩkĩtwo.
- 15. Ngũkũrutĩra ngoima ituĩke cio mahaki ma gũcinwo,
hagĩe na mũcingũ wa ndũrũme;
ngũruta ndegwa, o hamwe na irũhĩ.
- 16. Ũkai, mũigue, inyuĩ inyuothe etigĩri Ngai,
nĩngũkiumbũra ũrĩa aateithirie muoyo wakwa.
- 17. Ndatumũrire kanua ngĩmũkaĩra,
na rũrĩmĩ-inĩ rũakwa ndarĩ o na ũgooci, ndĩmũtũũgĩrie.
- 18. Ingĩakorirũo nũmbũĩtie waganu na ngoro yakwa-rĩ,
Mwathani ndarĩ hĩndĩ angĩanjiguire:
- 19. No kaĩ we Ngai nĩakĩnjiguĩte-ĩ!
gũthikĩrĩria nĩathikĩrĩirie mũgambo wakwa ngĩmũhoya.
- 20. Ngai arokĩgathwo,
o we ũtaigana kũhũndũra ihoya rĩakwa, agĩkĩaga kũnjehereria ũtugi wake.
Home