Go Back

Thaburi Chapter 59

1. Ĩ NGAI wakwa, ndeithũra harĩ thũ ciakwa: njiga handũ haraya na igũrũ nyume harĩ arĩa manjũkĩrĩire.
2. Ndeithũra harĩ acio eki maũndũ ma waganu, ũkĩ’honokie harĩ andũ acio a thakame.
3. Thima-rĩ, nĩ kuoheria moheirie muoyo wakwa; nĩ hĩndĩ andũ arĩa me hinya meĩnyũnganĩirie; na ti tondũ wa rĩĩhia rĩakwa, Jehova, kana ũndũ wa ĩhĩtia ndĩ narĩo.
4. O na hatarĩ waganu njĩkĩte-rĩ, nĩ kũhanyũka mahanyũkaga magaikara methagathagĩte: kĩramũke ũndangĩre, ũkĩĩonere.
5. Wee, o wee Jehova Ngai mwene mbũtũ cia ita, wee Ngai wa Isiraeli-rĩ, ũkĩra ũũke ũkaherithie ndũrĩrĩ ciothe: mĩgarũka ĩo mĩaganu, o ĩrĩkũ, menya ũmĩkinyĩrie wega waku.
6. Hwaĩ-inĩ macokaga, makararamaga ta ngui, magĩthiũrũrũkangaga itũũra.
7. Onei, nĩ kwerũrũka merũrũkaga na tũnua twao; mĩromo-inĩ yao nĩ ta kwĩ na hiũ cia njora: Nũ ũngĩkĩigua? nĩ ũguo moragia.
8. Ĩndĩ wee, Jehova, no gũtheka ũramathekerera; ndũrĩrĩ ciothe nĩ gũcikenerera ũracikenerera.
9. Wee, hinya wakwa-rĩ, nowe ndĩrĩroragĩrĩria, nĩ gũkorũo Ngai nĩwe rĩangĩro rĩakwa rĩake iraya na igũrũ.
10. Ngai wakwa nĩekũndũnga na ũtugi wake; we Ngai niarĩnjĩtĩkĩria nyone ũrĩa ngwenda harĩ acio manjohagĩria.
11. Kũũraga ndũkamorage-ĩ, andũ akwa matikae gũkariganĩrũo: gũtororia matororagie na ũhoti waku, kinya ũmacokie na thĩ, wee Mwathani, o wee ngo iitũ.
12. Tondũ wa wĩhia wa tũnua twao, ciugo cia mĩromo yao-rĩ, tũma magwatio nĩ mwĩtũũgĩrio o ũcio me naguo, tondũ wa maũndũ macio moigaga ma kũrumana na ningĩ ma maheni.
13. Manine nĩ ũrĩa ũmarũrĩire, manine, matigacoke gũkorũo ho, kũmenyeke atĩ Ngai no aathanaga kwa Jakubu, kũmenyithanio ũguo nginya o ituri cia thĩ.
14. Acio-rĩ, hwaĩ-inĩ nĩ gũcoka macokaga, makararamaga ta ngui, magĩthiũrũrũkangaga itũũra.
15. O no gũcuracura macuracuraga magĩcaragia kĩrĩa mangĩrĩa, na maaga kũhũna makaraara ũtukũ wothe o makĩhaara.
16. Ĩndĩ niĩ-rĩ, no nyinagĩre hinya waku; ĩĩ-ni, no ndokage gũkũngũiya ũtugi waku o rũcinĩ: tondũ wee nĩũtuĩkĩte rĩangĩro rĩakwa iraya na igũrũ, ũgagĩtuĩka ũũrĩro harĩ niĩ mũthenya ũrĩa ndanyamarĩka.
17. Wee, hinya wakwa-rĩ, nĩwe ndĩrĩinagĩra ngĩkũgoocaga: nĩ gũkorũo Ngai nĩwe rĩangĩro rĩakwa rĩake iraya na igũrũ, o we Ngai mũnjĩki maũndũ ma ũtugi.

Home