Go Back

Thaburi Chapter 56

• 1. NGINYĨRIA wega waku, Ngai amu andũ mekwenda kũ’merũkia; matindaga mũthenya wothe o mangũrĩire marĩ o na mbaara.
• 2. Acio manjoheirie nĩ gũtinda matindaga mũthenya wothe makĩendaga kũ’merũkia: amu acio manyonagia mbaara o metũũgĩirie nĩ aingĩ.
• 3. Mũthenya ũrĩa ngwĩtigĩra, niĩ nowe ndĩrĩĩhokaga.
• 4. Tondũ wa hinya wa Ngai, no ngoocage uuge wake: ũrĩa ndĩĩhokete nĩ Ngai, gwĩtigĩra ndingĩĩtigĩra; arĩa a mwĩrĩ wa nyama-rĩ, nĩ ũndũ ũrĩkũ mangĩkĩnjĩka?
• 5. Mũthenya wothe o matindaga o makĩhotomia ndeto ciakwa; meciria mao mothe no niĩ meciragĩria manjĩke ũũru.
• 6. Nĩ kũũngana monganaga, magaikara megitanĩtie, magacũthagĩrĩria mĩkinyĩre yakwa, no ũndũ wa ũrĩa matũire metereire mandute muoyo.
• 7. Ĩ nĩmakĩhonoke nĩ waganu ũcio wao? wee, Ngai, ũmomore irĩndĩ cia thĩ na marakara maku.
• 8. Morũra makwa wee nawe nĩũmagerete: maithori makwa ta kĩmekĩre cuba-inĩ waku; githĩ to maandĩke mbuku-inĩ yaku?
• 9. Mũthenya ũrĩa ingĩkaya-rĩ, thũ ciakwa no ikĩhũndũke: nĩnjũĩ ũguo, nĩ ũndũ Ngai arĩ mwena wakwa.
• 10. Tondũ wa hinya wa Ngai, no ngoocage uuge wake; tondũ o wa hinya wa Jehova, uuge wake no ndĩũgoocage.
• 11. Ũrĩa ndĩĩhokete nĩ Ngai, gwĩtigĩra ndingĩĩtigĩra; andũ-rĩ, nĩ atĩa mangĩkĩhota kũnjĩka?
• 12. Mĩĩhĩtwa ĩrĩa ndĩĩhĩtĩte harĩ wee, Ngai, ndĩ o nayo; no ngũrutĩre igongona cia gũcokia ngatho,
• 13. Nĩ ũndũ wee nĩũteithũrĩte muoyo wakwa harĩ gĩkuũ; anga wee towe ũgirĩtie magũrũ makwa mahigũrũo? nĩ getha ng’endage ndĩ mbere-inĩ ya Ngai ngĩonaga ũtheri ũrĩa wonagwo nĩ arĩa me muoyo.

Home