Go Back

Thaburi Chapter 39

• 1. NDOIGIRE atĩrĩ, Nĩngwĩrĩithia mĩthiĩre-inĩ yakwa, nĩ getha ndikae kwĩhia na rũrĩmĩ; kanua gakwa nĩngũkoha na mũkwa, hĩndĩ ĩrĩa ũrĩa mwaganu e harĩa ndĩ.
• 2. Ngĩgĩikara ta mũndũ ũtangĩhota kwaria, ngekirĩra ki, ngarega kuuga ũndũ, o gwata ũrĩa mwega: naruo ruo rũakwa rũkĩya kwambaamba.
• 3. Ngoro yakwa ĩgĩkĩhĩahĩĩra thĩinĩ wakwa; o hĩndĩ ĩo ndecũranagia, mwaki ũgĩgĩakana, ngĩkĩaria, ngiuga atĩrĩ, na rũrĩmĩ rũakwa:
• 4. Ĩ Jehova, ’menyithia ithirĩro rĩakwa, ’menyithia mũigana wa matukũ makwa ũrĩa ũtariĩ; ngĩmenye atĩ ndĩ o wa muoyo mũcacu.
• 5. Matukũ makwa anga ndũmaigananĩtie na marata marĩa maratagwo? ũkũrũ wakwa-rĩ, ti ta kĩndũ harĩ wee: mũndũ o wothe, o na rĩrĩa ekinyĩire, no kĩndũ kĩa mana.
• 6. Nĩma, mũndũ o na ũrĩkũ, o na tondũ atũũraga acangacangaga, no ta kĩĩruru: mĩhang’o ĩrĩa matũũraga nayo no ya tũhũ; mũndũ etombothagĩrĩra indo, na ndamenyaga nũ ũgaciĩũnganĩria.
• 7. Na rĩu, Mwathani-rĩ, ũndũ ũrĩa ngĩetereire ũkĩrĩ ũrĩkũ? kĩĩrĩgĩrĩro gĩakwa-ĩ, kĩrĩ o harĩ wee.
• 8. Mehia makwa mothe, kĩndeithũre harĩ mo; ndũkanduithie kĩmene kĩa mũndũ ũrĩa ũtarĩ mbuguĩro.
• 9. Ndaikaire itekwaria, ngarega gũtumũra kanua, nĩ ũndũ wee nĩwe wekĩte maũndũ macio.
• 10. Njehereria itũhũhũ rĩrĩ rĩaku rĩnyume; mbaara ya guoko gwaku-rĩ, nĩndĩraninwo nĩyo.
• 11. Wee waitĩka gũtaara mũndũ, ũkĩmũrũithagia nĩ ũndũ wa waganu wake-rĩ, ũninũkagĩrĩria ũthaka wake ta arĩ kũrĩĩka ũrĩĩkĩte nĩ memenyi: nĩ ma, mũndũ o wothe no kĩndũ kĩa mana.
• 12. Igua ihoya rĩakwa, Jehova; ndegera gũtũ ngĩkũrĩrĩra; maithori makwa, tiga kũmakirĩra, amu niĩ gwaku ndĩ mũgeni, ndĩ o mũthamĩri kuo, o ta ũrĩa maithe makwa mothe maatariĩ.
• 13. Hũgũka, ũtige kũmbara, nĩguo ngenyakenyũke itanethiĩra njage gũkorũo ho rĩngĩ.

Home