Go Back

Thaburi Chapter 36

• 1. ŨREMI wa mũndũ ũrĩa mwaganu nĩ wa kũndĩkĩria ngoro-inĩ yakwa atĩrĩ, atĩ maitho-inĩ make hatirĩ na ũhoro wa gwĩtigĩra Ngai.
• 2. Amu maitho-inĩ make mwene ecaaraga akĩĩĩraga atĩ waganu wake ndũkamenyeka nĩguo ũgĩthũũrũo.
• 3. Ndeto cia kanua gake no ũmaramari na ũrĩa-ma; nĩatigĩte gũtuĩka mũndũ mũũgĩ wa gwĩkaga wega.
• 4. Arĩ ũrĩrĩ no maũndũ ma waganu arathugunda; eigĩte njĩra-inĩ ĩrĩa ĩtarĩ njega; ũũru-rĩ, ndaũthũũraga.
• 5. Ũtugi waku, Jehova, ũkinyĩte o igũrũ igũrũ, wĩhokeki waku ũgagĩkinya o kũrĩa matu-inĩ.
• 6. Ũthingu waku no ta irĩma cia Mũrungu; matuĩro maku marikĩte ta kũrĩa kũriku iria-inĩ: wee Jehova-rĩ, nĩwe ũhonokagia andũ o gwata nyamũ.
• 7. Ĩ na kaĩ ũtugi waku, Ngai, nĩ kĩndũ kĩrĩ bata-ĩ! ciana cia kĩrĩndĩ igakĩĩgiritagia kĩĩgunyĩ-inĩ kĩa mathagu maku.
• 8. Irĩhũnagio ũnoru wa nyũmba yaku, ihũnage o wega; na rũũĩ rũaku rũa ikeno nĩruo ũrĩtũmaga inyuĩre.
• 9. Nĩ gũkorũo itherũkĩro rĩa muoyo nĩ harĩ wee rĩrĩ; tũrĩ ũtheri-inĩ waku nĩho tũrĩĩonagĩra ũtheri.
• 10. Andũ acio makũũĩ-rĩ, no gĩtũme ũtugi waku ũrũmanagĩrie harĩ o; ũthingu waku naguo reke ũtũũre harĩ acio erekereru ngoro.
• 11. Ndũkanareke ’hatĩkwo nĩ kũgũrũ kũrĩa kwa mwĩono; tiga gũkareka nindũrũo nĩ guoko kwa arĩa amaramari.
• 12. Acio eki maũndũ ma waganu, rĩu nĩ agũu o hau; gũikanio nĩ aikanie, na matikahota gũũkĩra.

Home