Go Back

Thaburi Chapter 31

• 1. WEE, Jehova, nĩwe ndahĩire; ndũkanareke njonoke: tondũ wa ũthingu waku-rĩ, ’hatũrithia.
• 2. Nyinamĩrĩria gũtũ, ũndeithũre o narua: harĩ niĩ tuĩka ta ndũmba ya ihiga ĩĩ mwĩgitĩro wa hinya, ũgĩtuĩke o ta mũciĩ mũirige wa gũtũma ’honoke.
• 3. Nĩ amu rũaro rũakwa rũa ihiga, o na kĩhingo gĩakwa kĩa hinya, no wee: tondũ wa rĩĩtwa rĩaku-rĩ, kĩndongorie, ũnyonagĩrĩrie njĩra.
• 4. Ndeithũkithia wabu-inĩ ya mũtego, ĩrĩa nyambĩirũo, amu we nowe hinya ũrĩa nyangagĩra.
• 5. Roho wakwa nĩndaũiga moko-inĩ maku: wee, Jehova, nĩwĩĩngũũrĩire, o wee Mũrungu ũrĩa wa ma.
• 6. Arĩa marũmbũyagia maũndũ matarĩ kĩene, o marĩa ma maheni-rĩ, nĩndĩmathũire: niĩ, ũrĩa ndĩĩhokete, no Jehova.
• 7. Niĩ no njanjamũke ngĩkenagĩra ũtugi waku, nĩ gũkorũo gũthĩnĩka gwakwa, wee nĩũkuonete; kũmenya nĩũmenyete ũrĩa ngoro yakwa yonete mĩnyamaro,
• 8. Ũkaaga kũ’hingĩrĩria moko-inĩ ma thũ, no nĩ gũkinyithia ũkinyithĩtie magũrũ makwa handũ haariĩ.
• 9. Nginyĩria wega waku, Jehova, amu ndĩ mũnyamarĩku: riitho rĩakwa nĩrĩhwererekeire nĩ kũigua ũũru, ĩĩ-ni, gwata o roho wakwa, o na mwĩrĩ.
• 10. Nĩ gũkorũo muoyo wakwa nĩũhũahũĩte nĩ ũndũ wa kĩeha, mĩaka yakwa ĩgakĩhũa nĩ ũrĩa njayaga; hinya wakwa nĩ mwenyenyu nĩ ũndũ wa waganu wakwa, gwata o mahĩndĩ makwa magakĩhinyara.
• 11. Tondũ wa andũ arĩa othe me muku na niĩ nĩnduĩkĩte kĩmene, ĩĩ, na makĩria harĩ andũ a gwitũ; o na harĩ andũ arĩa tũmenyaine mũno ngatuĩka ta kĩndũ gĩa kũguoyoherũo: arĩa maranyonire ndĩ njĩra-inĩ-rĩ, no kũũra marorire.
• 12. Ndĩ mũriganĩru o ta mũndũ wakuire, ũtatũire aririkanagwo: ngakĩhaana ta nyũngũ nguũ.
• 13. Amu nĩnjiguĩte njambio cia andũ aingĩ, itebebia rĩgakĩngoraga riumĩte na ndwere ciothe; nĩ gũcira maciranagĩra ũhoro wakwa, magagĩthugunda wa ũrĩa mangĩhota kũnjũraga.
• 14. No niĩ-rĩ, nowe ndũire ndĩĩhokete, Jehova: ngoiga atĩrĩ, Nĩwe Ngai wakwa.
• 15. Mahinda makwa marĩ o guoko-inĩ gwaku: ndeithũra moko-inĩ ma thũ ciakwa, moko-inĩ ma acio mathingatanĩte na niĩ.
• 16. Tũma ũthiũ waku warĩre ndungata yaku: tondũ wa ũtugi ũcio waku-rĩ, ũ’honokie.
• 17. Wee, Jehova, tiga kũreka njonoke, amu nĩwe ngaĩire: arĩa aaganu maroconoka arĩ; o marokira ki marĩ o kwa ngoma!
• 18. Mĩromo ĩo ya maheni nĩĩtumane ĩremwo nĩ kwaria, ĩo yaragĩrĩra arĩa athingu na rũng’eeto ĩrĩ o na mwĩtĩo o na ningĩ mũrurũkano.
• 19. Wega waku-rĩ, ĩ ndũkĩrĩ mũingĩ, ũrĩa ũigĩire andũ arĩa agwĩtigĩri, ũrĩa ningĩ wanekĩra arĩa makwĩhokaga, ciana cia kĩrĩndĩ o ikĩonaga!
• 20. O hau wee ũrĩ, harĩa hegitĩtie, nĩho ũrĩmahithaga, moime ndundu-inĩ cia eki naĩ; ũrĩmagitanagia thĩinĩ wa gĩthũnũ kĩa mwĩgunyĩ, meherere thogothogo ya nĩmĩ ciao.
• 21. Jehova arogathwo! tondũ nĩanyonetie ũtugi wake ndĩ thĩinĩ wa gĩtũũro kĩirige, naguo ũkangegia.
• 22. Niĩ-rĩ, tondũ wa ũrĩa ndĩratubunyĩkĩte, ndĩrakorirũo ndoiga atĩrĩ, Ndĩ mũthengie, ngeherio maitho-inĩ maku! no wee nĩũrakĩiguire mũgambo wakwa wa gũgũthaitha ndakũrĩrĩra.
• 23. Ĩ kĩendei Jehova, inyuothe mũrĩ ũiguano nake: Jehova-rĩ, nĩarindagĩrĩra arĩa ehokeku, ningĩ ũrĩa mwĩki maũndũ ma mwĩtĩo, akamũthukĩra o kũmũthukĩra.
• 24. Gĩai na hinya, na mwĩũmĩrĩrie ngoro, inyuothe mwĩrĩgĩrĩire Jehova.

Home