Go Back
Thaburi Chapter 25
- 1. Ĩ JEHOVA, ngoro yakwa nĩ na kũu igũrũ kũrĩ wee ndĩmĩroretie.
- 2. Wee, Ngai wakwa, nowe ndĩĩhokete,
ndũkanareke njonoke;
tiga gũkareka thũ ciakwa ingenerere.
- 3. Ĩĩ-ni, arĩa magwetagĩrĩra wee gũtirĩ ũngĩconoka:
arĩa magaconoka nĩ mĩgarũka, ĩrĩa ĩgarũkanaga tũhũ.
- 4. Menyithia njĩra ciaku, Jehova;
ndutaga ikĩro ciaku, ndĩimenye.
- 5. Ndwaragĩra o ũhoro-inĩ waku wa ma, o ũkĩndutaga;
nĩ gũkorũo wee nĩwe Ngai mwene ũhonokio wakwa;
mũthenya wothe ndindaga njetereire o wee.
- 6. Ririkana matha maku, o nayo mĩtuganĩre yaku, Jehova;
nĩ amu ndĩrĩ yaaga o kuuma tene.
- 7. Ndũkaririkane mahĩtia marĩa ma ũnyinyi wakwa, o na kana mehia makwa ma ũremi:
ndirikana kũringana o na ũguo ũtugi waku ũtariĩ,
nĩ ũndũ wa wega waku, wee Jehova.
- 8. Jehova nĩ mwega, o na nĩ mũrũngĩrĩru:
tondũ ũcio, arĩa mahĩtĩtie, nĩarĩmonagĩrĩria njĩra.
- 9. Arĩa ahoreri arĩmatwaraga na mĩthiĩre o ĩrĩa ya kĩhooto:
acio ahoreri-rĩ, nĩ kũruta arĩmarutaga mũgerere wa njĩra yake.
- 10. Ikĩro ciothe cia Jehova no cia ũtugi na ũhoro-wa-ma
harĩ arĩa marũmagia kĩrĩkanĩro gĩake, na maũira marĩa make, makamaathĩkĩra.
- 11. Ĩ Jehova, tondũ wa rĩĩtwa rĩaku-rĩ,
njohera waganu wakwa, amu nĩ mũnene.
- 12. Nĩ mũndũ ũrĩkũ mwĩtigĩri Jehova?
ũcio-rĩ, nĩwe arĩonagĩrĩria njĩra ĩrĩa aagĩrĩirũo nĩ gũthura.
- 13. Ngoro yake nĩĩrĩikaraga o ĩhorereire,
nayo mbeũ yake nĩĩkegaĩra bũrũri.
- 14. Ndundu ya Jehova nĩ ya acio amwĩtigĩri;
nĩo arĩmenyithagia kĩrĩkanĩro gĩake.
- 15. Maitho makwa hingo ciothe marorete o harĩ Jehova,
amu nowe wa gũteithũkithia magũrũ makwa wabu-inĩ ya mũtegi.
- 16. Wĩĩ’hũgũrĩre, ũnginyĩrie wega waku,
nĩ gũkorũo ndĩ o nyiki, o na gũthĩnĩka ndĩ mũthĩnĩku.
- 17. Kũrĩa ngoro yakwa ĩhatĩkĩirũo, mĩaramĩrie,
ũkĩnyumie mĩtandiũko-inĩ ĩrĩa ndĩ nayo.
- 18. Rora mathĩna makwa o na ũrĩa nditũhĩirũo;
ũkĩndekere mahĩtia makwa mothe.
- 19. Rora thũ ciakwa, amu nĩciingĩhĩte,
nacio i’thũũrĩte na rũthũũro o rũrĩa rũtarĩ tha.
- 20. Menyagĩrĩra ngoro yakwa, ũkandeithũrage;
ndũkanareke njonoke, tondũ nowe nyangĩire.
- 21. Wĩkindĩru wa ngoro, o gwata ũrũngĩrĩru-rĩ, maũndũ macio nĩmangitagĩre,
amu wee nĩwe njetagĩrĩra.
- 22. Ĩ Ngai, gĩkũũre Isiraeli,
oime mĩnyamaro-inĩ yake yothe.
Home