Go Back

Thaburi Chapter 19

• 1. IGŨRŨ nĩ kũmemerekia rĩmemerekagia riri wa Mũrungu, mũtambũrũko wa matu mairũ ũgakĩonania wĩra wa moko make.
• 2. Mũthenya nĩũkinyagĩria mũthenya ũyũ ũngĩ ũhoro, ũtukũ naguo ũgakinyĩria ũtukũ ũyũ ũngĩ ũmenyo.
• 3. Ciugo gũtirĩ, o na gũtirĩ mwario; mũgambo wakuo ti wa kũiguĩka.
• 4. Mũhaka wakuo ũtambũrũkĩte mabũrũri mothe, uuge wakuo ũgagĩkinya o gĩturi gĩa thĩ. Nĩ kwamba aambĩte hema kuo ya gũtũũrũo nĩ riũa;
• 5. narĩo no ta mũhikania akĩroka kuuma thingira wake, rĩgakena ta njamba ĩkiumĩra kĩharo ĩmirite itĩna rĩayo.
• 6. Kuumĩra kwarĩo, riumaga gĩturi kĩa matu-inĩ, nakuo gũthiũrũrũka kwarĩo, rĩkinyaga o ituri iria ingĩ ciakuo, na gũtirĩ kĩndũ gĩtakinyagĩrĩruo nĩ ũrugarĩ warĩo.
• 7. Kĩrĩra kĩa Jehova nĩ gĩkinyanĩru, gĩthondekaga roho wa mũndũ; ũira wa Jehova nĩ mwĩhokeku, ũũhĩgagia ũrĩa ũtarĩ mũũgĩ.
• 8. Mataaro ma Jehova nĩ merekereru, makenagia mũndũ ngoro; watho wa Jehova nĩ mũkembu, wĩkagĩra maitho ũtheri.
• 9. Gwĩtigĩra Jehova nĩ ũndũ mũtheru, ũtũũraga tene na tene; matua ma Jehova no ma ma, nĩ ma kĩhooto kũna.
• 10. Maũndũ macio nĩ ma kwĩrirĩrio kũrĩ thahabu, ĩĩ-ni, o na thahabu nyingĩ njega; me mũrĩo gũkĩra ũũkĩ, o gwata mũruru wa magua-inĩ.
• 11. Na ningĩ nĩmo ndungata yaku ĩtaarĩkaga nĩmo; kũmamenyerera kwĩ na uumithio mũnene.
• 12. Nũ ũngĩhota gwĩkũũranĩra kũrĩa ahĩtagia? mahĩtia macio mehithaga-rĩ, ndũgakĩmatuage makwa.
• 13. Ningĩ ũgiranagie ndungata yaku na mehia ma mwĩĩro; ndũkanareke njathagwo nĩmo: nĩguo njikarage ndĩ mũkinyanĩru, ngakĩaga wĩhia mũnene.
• 14. Ciugo cia kanua gakwa, o na mwĩrurumio wa ngoro, iroetĩkĩrĩka mbere yaku, wee Jehova, o wee ndũmba yakwa ya ihiga, o na ningĩ mũngũũri.

Home