Go Back

Thaburi Chapter 17

• 1. Ĩ JEHOVA, ta igua ũhoro ũrĩa wa kĩhooto, ikaya rĩrĩ rĩakwa kĩrĩthikĩrĩrie; tega gũtũ ũigue ngĩkũhoya na mĩromo ĩtarĩ ya ũhinga.
• 2. Ituĩro rĩakwa ta nĩriumĩrio, riumane na harĩ wee; reke maitho maku marore ũhoro ũrĩa mwerekereru.
• 3. Ngoro yakwa nĩũmĩgeretie; wanoka kũng’ethera ũtukũ; kũndoria niũndoranĩtie, ũkona ndirĩ kaũndũ; kanua gakwa ndĩĩtuĩrĩire atĩ gatikahĩtia.
• 4. Ha ũhoro wa maũndũ ma andũ, niĩ-rĩ, tondũ wa uuge wa mĩromo yaku, nĩndũire ndĩĩgiragia ikĩro cia arĩa atoi.
• 5. Makinya makwa matũire makinyĩrĩirie o ing’aratua ciaku, magũrũ makwa matikĩrĩ maatindirũka.
• 6. Niĩ o niĩ ndĩragũkaĩra, nĩ tondũ wee, Mũrungu, nĩũgũkĩnyamũkĩria: nyinamĩrĩria gũtũ, ũigue ndeto ciakwa.
• 7. Tũma ũtugi waku wonekane ũrĩ wa kũgegania, o wee ũhonokagia arĩa megiritagia harĩ wee, ũgakĩmahonokia na guoko gwaku kwa ũrĩo kũrĩ arĩa mamokagĩrĩra.
• 8. Kĩ’menyagĩrĩre o ta kĩũma kĩa riitho; ’hitha kĩĩgunyĩ-inĩ kĩa mathagu maku,
• 9. Ndigakorũo nĩ andũ aaganu arĩa mang’ũmagia, nĩo thũ cia muoyo wakwa, icio indigicĩirie.
• 10. Ngoro ciao nĩmakibibanĩtie; tũnua twao twaragia o ndeto cia ngũrũ.
• 11. Rĩu nĩmatũũmbagĩrĩra o makinya-inĩ maitũ; matũkarangagĩra maitho nĩguo mone hingo ya gũtũrũnda.
• 12. Mwene ũhoro ũcio ahaana ta mũrũthi hĩndĩ ĩrĩa ũcemekeire ndĩa yaguo, ningĩ ta ngatia nyanake ĩrĩa ĩĩgitĩtie harĩa hagitaru.
• 13. Arahũka, Jehova, mũtũnge, na kũmũirũra ũkĩmũirũre: hatũra muoyo wakwa na njomo yaku harĩ acio aaganu;
• 14. ’Honokia na guoko gwaku, Jehova, harĩ andũ, harĩ andũ o aya a gũkũ thĩ, arĩa rũgai rũao no rũa muoyo ũyũ tũrĩ, o arĩa wee ũhũnagia nda ciao hũni cia mũthithũ waku: magĩaga ciana makaigania, naguo ũmathi ũrĩa matigaga magagĩtigĩra tũkenge twao.
• 15. No niĩ-rĩ, nĩndekwo ndĩĩonagĩre ũthiũ waku ndĩ o na ũthingu; ndahindũka-rĩ, njiganagwo nĩ gũkuona o ũrĩa ũtariĩ.

Home