Go Back

Thaburi Chapter 135

• 1. GOOCAI Jehova! Goocai rĩĩtwa rĩa Jehova; mũgoocei, inyuĩ ndungata ici cia Jehova,
• 2. Inyuĩ mũrũgamaga thĩinĩ wa nyũmba ya Jehova, o inyuĩ mũrũgamaga nja-inĩ cia nyũmba ĩo ya Ngai witũ.
• 3. Goocai Jehova, amu Jehova nĩ mwega; inĩrai rĩĩtwa rĩake mũkĩrĩkumie, amu rĩĩ gĩkeno.
• 4. Nĩ gũkorũo Jehova nĩethurĩire Jakubu atuĩke wake, nĩ Isiraeli aathurire atuĩke inagĩ rĩake kĩũmbe.
• 5. Amu niĩ nĩnjũĩ atĩ Jehova nĩ mũnene; atĩ Mwathani witũ atũũgĩrĩte agakĩra ngai ciothe.
• 6. Jehova-rĩ, o ũrĩa endaga gwĩka noguo agĩĩkaga, igũrũ, o na gũkũ thĩ, na maria-inĩ marĩa manene, o gwata kũrĩa guothe kũriku mũno.
• 7. Nĩwe ũtũmaga matu maambatage makiumaga o ituri-inĩ cia thĩ; nĩwe ũthondekete heni irehanage na mbura; nĩwe ũrutaga rũhuho kũrĩa arũigĩte mũthithũ.
• 8. Nowe waringire marigithathi ma Misiri akĩmoraga, ma andũ o na ma nyamũ.
• 9. Wee Misiri-rĩ, agĩtũma thĩinĩ waku kũringwo ciama na kuonwo morirũ, kinya o harĩ Firauni, o na harĩ ndungata ciake ciothe.
• 10. Nowe wahũrire ndũrĩrĩ nyingĩ, na akĩũraga athamaki makarau,
• 11. Sihoni, mũthamaki wa Aamori, na Ogu, mũthamaki wa Bashani, o na mothamaki mothe ma Kanaani;
• 12. Akĩheana bũrũri wao ũtuĩke igai, ũgayũo nĩ Isiraeli, kĩrĩndĩ gĩake.
• 13. Rĩĩtwa rĩaku, Jehova, nĩ rĩa tene na tene; kũririkanwo gwaku gũkinyagĩrĩra njiaro na njiaro.
• 14. Amu Jehova nĩagacirĩra kĩrĩndĩ gĩake, nĩakaiguĩra ndungata ciake tha.
• 15. Mĩhianano ĩrĩa ya ndũrĩrĩ no betha na thahabu, o wĩra wa moko ma andũ.
• 16. Tũnua ĩĩ natuo, na ndĩaragia; maitho ĩĩ namo, na ndĩonaga;
• 17. Ĩĩ na matũ, na ndĩiguaga, o na tũnua twayo tũtirĩ na mĩheehũ.
• 18. Arĩa mamĩthondekaga nĩ kũhaana makahaana o tayo; ĩĩ-ni, o mũndũ o wothe ũmĩĩhokaga.
• 19. Inyuĩ nyũmba ya Isiraeli-rĩ, mũtikĩgathe Jehova! inyuĩ nyũmba ya Haruni-rĩ, mũtikĩgathe Jehova!
• 20. Inyuĩ nyũmba ya Lawii-rĩ, mũtikĩgathe Jehova! inyuĩ etigĩri Jehova-rĩ, mũtikĩgathe Jehova!
• 21. Jehova arogathwo na ngatho ikuuma Zayuni, o we ũtũũraga kũu Jerusalemu. Goocai Jehova!

Home