Go Back

Thaburi Chapter 118

• 1. Ĩ GĨCOKERIEI Jehova ngatho, tondũ nĩ mwega; tondũ ũtugi wake nĩ wa tene na tene.
• 2. A Isiraeli ta nĩmoige ũguo, atĩ ũtugi wake nĩ wa tene na tene.
• 3. Nyũmba ya Haruni, ta nĩmoige ũguo, atĩ ũtugi wake nĩ wa tene na tene.
• 4. Andũ arĩa etigĩri Jehova-rĩ, nĩmakiuge ũguo, atĩ ũtugi wake nĩ wa tene na tene.
• 5. Ndakaĩire Jehova ndĩ hatĩka-inĩ: we Jehova-rĩ, akĩnjĩtĩka agĩkĩnjiga kũndũ kwariĩ.
• 6. Jehova e mwena wakwa; ndingĩĩtigĩra: mũndũ-rĩ, nĩ atĩa angĩkĩhota kũnjĩka?
• 7. Jehova e mwena wakwa o harĩ ateithia akwa: tondũ ũcio nĩngona ũrĩa nyendete harĩ andũ arĩa ma’thũire.
• 8. Nĩ wega kũrahĩra Jehova gũkĩra kwĩhoka andũ.
• 9. Nĩ wega kũrahĩra Jehova gũkĩra kwĩhoka anene.
• 10. Ndacigĩrĩirio nĩ ndũrĩrĩ ciothe, na tondũ wa kwĩhoka rĩĩtwa rĩa Jehova nĩ kũheeria ndaiheeririe.
• 11. Kũ’hĩtĩrĩra nĩcia’hĩtĩrĩire, ĩĩ-ni, o kũ’hĩtĩrĩra, na tondũ wa kwĩhoka rĩĩtwa rĩa Jehova nĩ kũheeria ndaiheeririe.
• 12. Cianjigĩrĩirie o ta njũkĩ; rĩu ikĩrĩ horu ta mwaki wa mĩigua: tondũ wa kwĩhoka rĩĩtwa rĩa Jehova-rĩ, nĩ kũheeria ndaiheeririe.
• 13. Wandurumire mũno nĩ getha ngũe, ĩndĩ Jehova nĩaakĩndeithirie.
• 14. Jehova-rĩ, nĩwe hinya wakwa, na nowe gĩtũmi kĩa nyine, nake nĩ gũtuĩka atuĩkĩte ũhonokio wakwa.
• 15. Hema-inĩ cia arĩa athingu nĩ mũgambo wa rũũhiũ kũrĩ, o wa gũkũngũĩra ũhonokio, atĩ, Guoko kwa ũrĩo kwa Jehova gwĩkaga maũndũ ma ũhoti!
• 16. Guoko kwa ũrĩo kwa Jehova nĩgwĩtũũgĩrĩire; guoko kwa ũrĩo kwa Jehova-rĩ, gwĩkaga o maũndũ ma ũhoti!
• 17. Niĩ gũkua-rĩ, ndigũkua, nĩ gũtũũra ngũtũũra muoyo, ng’anage mawĩko ma Jehova.
• 18. Kũ’herithia, Jehova nĩa’herithĩtie o ma, no ndandekereirie ngue.
• 19. ’Hingũrĩrai ihingo cia ũthingu; ngũtonya thĩinĩ, ngacokerie Jehova ngatho!
• 20. Kĩhingo gĩkĩ-rĩ, nĩ kĩa Jehova; arĩa athingu no-o marĩgĩtonyaga.
• 21. Nĩ ngatho ngũgũcokeria, tondũ nĩũnyamũkĩirie, ũgagĩtuĩka ũhonokio wakwa.
• 22. Ihiga rĩrĩa rĩaregirũo nĩ aaki nĩrĩo rĩtuĩkĩte o rĩrĩa inene rĩa koine.
• 23. Ũndũ ũcio uumĩte kwĩ Jehova, na nĩũgũtũgegia tũkĩwona.
• 24. Mũthenya ũyũ nĩ Jehova ũtũmĩte ũgĩe; nĩtũcanjamũkei tũkĩũkenagĩra.
• 25. Ĩ Jehova, twagũthaitha, tũhonokagie! Ĩ Jehova, twagũthaitha, tũma tũtũũre o tũgaacĩire!
• 26. Mũrathimwo-rĩ, nĩ ũrĩa wa gũũka na rĩĩtwa rĩa Jehova! twĩ gũkũ nyũmba ya Jehova, inyuĩ nĩtwamũrathima.
• 27. Jehova nowe Mũrungu, na nĩagĩtuonetie ũtheri: kĩohei kĩruti-igongona na mĩhĩndo, gĩkinyio hĩa-inĩ cia kĩgongona.
• 28. Wee ũrĩ Mũrungu wakwa, no ngũcokerie ngatho; wee ũrĩ Ngai wakwa, nĩngũgũtũũgĩria.
• 29. Ĩ gĩcokeriei Jehova ngatho, tondũ nĩ mwega; tondũ ũtugi wake nĩ wa tene na tene.

Home