Go Back

Thaburi Chapter 116

• 1. NĨNYENDA Jehova, tondũ nĩaiguĩte mũgambo wakwa, agakĩigua ngĩmũthaitha.
• 2. Kuona nĩaanyinamĩrĩirie gũtũ-rĩ, tondũ ũcio, matukũ makwa mothe nĩwe ndĩrĩthathayagia.
• 3. Nderigicĩirio nĩ mĩgeto ya gĩkuũ, nganyitwo nĩ mĩtandiũko ya kwa-ngoma: nĩndonire mĩnyamaro o na kĩeha.
• 4. Ngĩkaĩra rĩĩtwa rĩa Jehova, ngiuga atĩrĩ, Ĩ Jehova, ndagũthaitha, hatũra muoyo wakwa.
• 5. Jehova-rĩ, nĩ muuma-andũ, na nĩ mũthingu; ĩĩ-ni, Ngai witũ nĩ wa matha maingĩ.
• 6. Jehova nĩamenyagĩrĩra arĩa matarĩ ogĩ: nĩ kũhinyio ndahinyĩtio, nake agĩkĩ’honokia.
• 7. Wee, ngoro yakwa-rĩ, cokerera ũhurũko waku, nĩ gũkorũo Jehova nĩagwĩkĩte wega mũno.
• 8. Amu wee, Jehova, nĩũtharĩte muoyo wakwa gwĩ gĩkuũ, ũgakiria maitho makwa maithori, na nĩũgirĩtie magũrũ makwa mahigũrũo.
• 9. Nĩndĩĩgendaga ndĩ ũthiũ-inĩ wa Jehova o mabũrũri-inĩ ma arĩa me muoyo.
• 10. No ndetĩkĩtie ũhoro wake, o na rĩrĩa ndaaririe ngiuga, Nĩ’thĩnĩkĩte mũno!
• 11. Na ngiuga atĩrĩ, nĩ ũrĩa ndatubunyĩkĩte, atĩ, Andũ othe no a maheni!
• 12. Nĩ kĩ ngũthukĩra Jehova nakĩo nĩ ũndũ wa wega wake wothe ũrĩa anjĩkĩte?
• 13. Nĩ kuoya nguoya gĩkombe kĩrĩa kĩa ũhonokio, ’thathaiye rĩĩtwa rĩa Jehova.
• 14. Ngũkĩhingĩria Jehova mĩĩhĩtwa ĩrĩa ndehĩtire, kũhingia ndĩmĩhingie andũ ake othe marĩ ho.
• 15. Arĩa marĩ ũiguano nake-rĩ, ikua rĩao nĩ ũndũ wĩ bata maitho-inĩ ma Jehova.
• 16. Ĩ Jehova, ti-itherũ niĩ ndĩ ndungata yaku, ndĩ o ndungata yaku, mwana wa ngombo yaku ya mũndũ-wa-nja; wee-rĩ, nĩũnjohorete mĩhĩndo.
• 17. No ngũrutĩre magongona ma gũcokia ngatho, ngĩthathaiye rĩĩtwa rĩa Jehova.
• 18. Ngũkĩhingĩria Jehova mĩĩhĩtwa ĩrĩa ndehĩtire, kũhingia ndĩmĩhingie andũ ake othe marĩ ho,
• 19. Nja-inĩ cia nyũmba ya Jehova, o thĩinĩ waku, wee Jerusalemu. Goocai Jehova!

Home