Go Back

Thaburi Chapter 109

• 1. Ĩ NGAI ũrĩa ngumagia, ndũgagĩkire!
• 2. Amu kanua ka mũndũ mũmaramari, kanua o karĩa ka ũrĩa-ma, nĩko mandumũrĩire; njirithĩtio na rũrĩmĩ rũa mũiganĩrĩro.
• 3. Ĩĩ-ni, andũ acio mandigicĩirie na ndeto cia rũthũũro, na makandutĩra mbaara o tũhũ.
• 4. Handũ ha wendani ũrĩa niĩ ndĩ naguo matuĩkĩte o a kũng’endagĩra, na niĩ no kũhoya ’hoyaga.
• 5. Ithenya rĩa wega nĩ ũũru manjigĩrĩire, na handũ ha wendani wakwa ma’thukĩire na rũthũũro.
• 6. Ũrĩa wĩkĩte ũguo-rĩ, mũigĩre mũndũ mwaganu igũrũ rĩake; mwena wake wa ũrĩo nĩkũrũgamage wa kũmũthitanga.
• 7. Aacirithio-rĩ, nĩoimage ho atuĩtwo mwĩhia; gwata o kũhoya gwake nĩgũgĩtuĩke o kwĩhia.
• 8. Matukũ make maronyiha; ũramati wake ũrooyũo nĩ mũndũ ũngĩ!
• 9. Ciana ciake nĩituĩke cia ngoriai, na mũtumia wake atuĩke wa ndigwa!
• 10. Ningĩ ciana ciake irotuĩka ndũgũgi, igĩtuĩke o njara-rũhĩ; ihaarage irio iraihanĩrĩirie na maganjo mao!
• 11. Indo ciake iroetahĩrũo nĩ mũndũ ũrĩa me thirĩ nake, ainine; kĩrĩa anogeire gĩĩtharĩrũo nĩ andũ ageni!
• 12. Arohĩtanagia na mũndũ ũngĩmũtuga, na kũroaga ũngĩiguĩra ciana ciake cia ngoriai tha!
• 13. Njiarũa ciake irong’ũrio; hingo ya rũciaro rũa kerĩ rĩĩtwa rĩao nĩrĩthario o gũthario!
• 14. Waganu wa maithe make ũrotũũra ũririkainwo nĩ Jehova; gwata mehia ma nyina o namo nĩmamenye gũkanathario!
• 15. Marogĩtũũra hau mbere-inĩ ya Jehova o hingo ciothe, nĩ getha akanina kũririkanwo kwao gũthire gũkũ thĩ!
• 16. Nĩ ũndũ we ndaaririkanaga gũtugana, no rĩrĩ, mũndũ ũrĩa mũthĩni, o ũrĩa mwagi, agathingatanaga nake, gwata o ũrĩa ũthuthĩkĩte ngoro, o kinya akoraga.
• 17. Kwenda endaga o kũgekana, nakuo gũgĩũka kũrĩ we; ndaakenagio nĩ kũrathimana, nakĩo kĩrathimo gĩgĩikara o kĩmũraihĩrĩirie.
• 18. Ũgekani-rĩ, aawĩguĩkaga o ta arĩ guo kanjũ yake, naguo ũkamũtonya nda o ta maĩ, ũgakĩmũtonya mahĩndĩ ta maguta.
• 19. Ũrotuĩka ta nguo harĩ we, o ĩrĩa ehumbaga, ningĩ ta mwĩnyitio ũrĩa atatĩraga kwĩoha!
• 20. Ũcio nĩguo mũcara wa acio mandumĩte muku, ũrĩa wa kũheanwo nĩ Jehova, o mũcara wa acio maaragĩrĩra ngoro yakwa.
• 21. No rĩrĩ, Jehova Mwathani, niĩ-rĩ, ’thondekera ũhoro nĩ ũndũ wa rĩĩtwa rĩaku; tondũ wa ũrĩa ũtugi waku wĩ mwega mũno, kĩndeithũre.
• 22. Nĩ gũkorũo niĩ ndĩ mũthĩnĩki, ndĩ o mwagi, na ngoro yakwa nĩĩgurarĩirio thĩinĩ wakwa.
• 23. Ndĩ mũthiu o ta kĩĩruru rĩrĩa kĩgwete gũtambũrũka kĩbuĩrie; ’huhũragwo ta ngigĩ.
• 24. Maru makwa nĩ kũregera maregerete nĩ ũrĩa ndĩĩimĩte irio; mwĩrĩ wakwa ũgagĩtharara nĩ kwaga maguta.
• 25. Niĩ-rĩ, harĩ o nĩngĩtuĩkĩte kĩmene; rĩrĩa maanyona, maitĩkaga o kũinia mĩtwe yao.
• 26. Ĩ Jehova, Ngai wakwa, ndeithia; ’honokia kũringana o na ũtugi waku.
• 27. Nĩguo mamenye nĩ guoko gwaku kwĩ ho, makĩmenye atĩ wee, Jehova, nĩwe wĩkĩte ũguo.
• 28. O, nĩmagekanage, nawe ũrathimanage: rĩrĩa mokĩra-rĩ, nĩ gũconorũo marĩconoragwo, ĩndĩ ndungata yaku no ĩkenage.
• 29. Acio ang’enderi marohumbwo ũnyararĩku, makĩĩguĩke njono ciao ta arĩ nguo ya igũrũ.
• 30. Nĩngũcokeria Jehova ngatho na kanua gakwa mũno mũno; ĩĩ-ni, ngũmũkumĩria harĩa mũingĩ ũũnganĩire.
• 31. Amu mwena wa ũrĩo wa mũndũ ũrĩa mwagi, nĩwe ũrĩrũgamaga, amũhonokagie kwĩ arĩa mangĩtuĩra ngoro yake ũũru.

Home