Go Back

Thaburi Chapter 107

• 1. Ĩ GĨCOKERIEI Jehova ngatho, tondũ nĩ mwega, tondũ ũtugi wake nĩ wa tene na tene.
• 2. Arĩa akũũre nĩ Jehova nĩmakiuge ũguo, o arĩa akũũrĩte akamaruta guoko-inĩ kwa mũmaitha,
• 3. Agakĩmongania amarutĩte mabũrũri-inĩ, mwena wa irathĩro na wa ithũĩro, ningĩ wa gathigathini na wa gũthini.
• 4. Kũrĩ maakorirũo makĩũrũra werũ-inĩ, njĩra ya rũaga: nĩ kwaga maagĩte itũũra rĩa gũikara.
• 5. Tondũ wa ũrĩa maarĩ ahũtu na makanyota, ngoro ciao ikĩenda kũhooteka thĩinĩ wao.
• 6. Magĩgĩkaĩra Jehova tondũ wa ũrĩa mathĩnĩkĩte, nake akĩmateithũra mĩnyamaro-inĩ ĩo maarĩ nayo.
• 7. Akĩmatwara o na njĩra nũngarũ, nĩguo makinye itũũra rĩa gũikara.
• 8. O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!
• 9. Nĩ amu ngoro ĩrĩa ĩĩ na nyota nĩamĩhũnagia, ngoro ĩrĩa hũtu-rĩ, agakĩmĩiyũria maũndũ mega.
• 10. Kũrĩ maaikaire nduma-inĩ, o nduma-inĩ ta ya gĩkuũ, marĩ ohe mĩtandiũko-inĩ, kuohwo na igera,
• 11. Nĩ ũndũ nĩmaang’athĩirie ndeto cia Mũrungu, ũtaaro wa Ũrĩa-wĩ-Igũrũ-Mũno-rĩ, makawagĩra bata;
• 12. Agĩkĩhoria ngoro ciao na mĩnoga ya wĩra, makĩhigũka, na matione wa kũmateithia.
• 13. Magĩgĩkaĩra Jehova tondũ wa ũrĩa mathĩnĩkĩte, nake akĩmahonokia mĩnyamaro-inĩ ĩo maarĩ nayo.
• 14. Nĩ kũruta aamarutire nduma-inĩ, o kũu nduma-inĩ ya gĩkuũ, agĩgĩtua mĩkwa ĩrĩa mohetwo nayo.
• 15. O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!
• 16. Nĩ amu mĩrango ĩrĩa ya rũthuku nĩamĩthuthangĩte, na agatinania mĩgĩĩko yayo, o ĩo ya igera.
• 17. Ora-matũ-rĩ, tondũ wa njĩra ciao cia wĩathi, tondũ o wa waganu wao, nĩmerehagĩrĩre mĩtandiũko.
• 18. Ngoro ciao igakinya kũnyira irio mĩthemba yothe, makaya gũthengerera ihingo-inĩ cia gĩkuũ.
• 19. Magagĩkaĩra Jehova tondũ wa ũrĩa mathĩnĩkĩte, nake akamahonokia mĩnyamaro-inĩ ĩo me nayo.
• 20. Atũmaga ũhoro wake, akamahonia, agakĩmahatũra hau marima-inĩ mao ma mbĩrĩra.
• 21. O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!
• 22. Nĩmamũrutagĩre magongona ma gũcokia ngatho, na maganage mawĩko make me na mũkũngũiyo.
• 23. Andũ arĩa maikũrũkaga magathiĩ na iria me thĩinĩ wa marikabu, arĩa mathiaga wonjoria kũu maĩ-inĩ maingĩ,
• 24. Acio nĩmonaga mawĩko ma Jehova; maũndũ make me magegania magakĩmeonera me maĩ-inĩ macio mariku.
• 25. Amu rĩrĩa oiga, rũhuho nĩrũarahũkaga, rũrĩa rũa kĩhuhũkanio, naruo rũkaiyũkĩrĩria makũmbĩ ma maĩ, macio ma iria.
• 26. Andũ makoyũo na igũrũ o nginya matu-inĩ, ningĩ magacoka na thĩ o mũriko-inĩ; ngoro ciao igakĩregera nĩ ũũru ũrĩa marona.
• 27. Nĩ kwagaaga maagaagaga magĩtũgũgangaga ta mũndũ mũrĩu, magakĩũrũo nĩ ũũgĩ wao wothe.
• 28. Magagĩkaĩra Jehova tondũ wa ũrĩa mathĩnĩkĩte, nake akamaruta mĩnyamaro-inĩ ĩo marĩ nayo.
• 29. Atũmaga kĩhuhũkanio gĩcoke kũhorera, makũmbĩ macio moima kuo magagĩkira ngiria.
• 30. Nao magakena nĩ ũndũ rĩu mo nĩmahorerete, agakĩmakinyia rĩingĩrĩro-inĩ o rĩrĩa merirĩirie makinye.
• 31. O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!
• 32. Nĩmamũtũũgĩragie rĩrĩa kĩrĩndĩ kĩũngaine, na mamũkumagie gĩcirĩro-inĩ gĩa athuri.
• 33. Kũrĩa kwĩ na njũĩ atũmaga kũgarũrũke gũgatuĩka werũ mũũmũ, kũndũ kwĩ na ithima gũgatuĩka kwa nyota;
• 34. Thĩ ĩrĩa yumaga irio mũno agakĩmĩtua o rũng’ũrĩ rũa igata, nĩ ũndũ wa ũũru wa andũ arĩa mamĩtũũraga.
• 35. Ningĩ atũmaga werũ ũgarũrũke ũgatuĩka iria rĩa maĩ, thĩ nyũmũ ĩgatuĩka kũndũ kwĩ na ithima.
• 36. Nakuo agatũma gũikarũo nĩ andũ arĩa ahũtu, nĩ getha magwake itũũra rĩa gũtũũrũo,
• 37. Na mehandĩre mĩgũnda, na marĩme mĩthabibu, nĩguo magethage maciaro, magĩage na uumithio.
• 38. Kũrathima nĩamarathimaga, magathegea mũno; o gwata ũhiũ wao ndarekaga ũnyihe.
• 39. Na rĩrĩa maanyihĩrĩra, na maakunguĩrĩra, nĩ ũndũ wa gũkĩrio hinya, ningĩ mũtino o na kĩeha,
• 40. Anene-rĩ, nĩ kũmaagithia amaagithagia bata, agatũma matororage baraganya-inĩ, o kũu gũtarĩ njĩra.
• 41. Ĩndĩ mũndũ ũrĩa mũkĩa-rĩ, amũigaga handũ haraya na igũrũ, harĩa atangĩtuĩka wa kũnyariragwo, na akamũingĩhĩria maciara o ta rũũru.
• 42. Andũ arĩa arũngĩrĩru monaga ũguo magakena, na wogogani wothe ũgakĩĩhumba kanua.
• 43. Mũndũ o na ũrĩkũ wĩ na ũũgĩ nĩakĩrũmie maũndũ macio, andũ marũmbũyagie o wega mĩtuganĩre ya Jehova.

Home