Go Back

Thaburi Chapter 104

• 1. NGORO yakwa, gatha Jehova. Ĩ Jehova, Ngai wakwa, wee ũrĩ mũnene mũno; wĩguĩkĩte ũtĩĩku, o na ũkaru.
• 2. Ũtũire wĩhumbĩte ũtheri ta nguo; wee nĩwe ũtambũrũkĩtie igũrũ ta kĩandarũa.
• 3. Nowe ũrĩa ũigĩrĩire mĩgamba ĩrĩa yakĩrĩirũo nyũmba ciake cia ngoroba igũrũ rĩa maĩ; nowe ũrĩa ũtuaga matu ngari yake ya kũmũkuua; nowe ũrĩa ũthiaga agĩtwaragwo nĩ mathagu ma rũhuho;
• 4. O ũrĩa ningĩ ũtũmaga huho ituĩke arekio ake, na mwaki ũrĩa ũhenũrũrũkaga o naguo agatũma ũtuĩke no atungati ake.
• 5. Thĩ-rĩ, aamĩakĩrĩire igũrũ rĩa itina ciayo, ndĩkae gũkenyenyeka o na tene.
• 6. Wamĩhumbĩrire iria rĩrĩa inene ta arĩ itonyo, maĩ magĩgĩikara mathikĩte irĩma.
• 7. Ningĩ wamakũma makĩũra, ngwa ciaku ciagamba makĩgwata o kũhahũka,
• 8. (Irĩma ikiumĩra, cianda igĩgĩcoka na thĩ,) magĩgĩkinya o harĩa wamathondekeire maikarage.
• 9. Wamekĩrĩire mũhaka ũrĩa matangĩagarara, nĩguo matigacoke kũhumba thĩ rĩngĩ.
• 10. Nĩwe ũrĩa ũtherũkagia ithima cianda-inĩ, igaikũrũkagĩra gatagatĩ-inĩ ka irĩma.
• 11. Nĩcio inyuagwo nĩ ndaara-gĩthaka o yothe; nĩho njagĩ ciĩnyotoragĩra.
• 12. Kũu ngurumo-inĩ ciacio nĩkuo nyoni cia rĩera-inĩ itũũraga, ikainaga ii honge-inĩ cia mĩtĩ.
• 13. Aitagĩrĩria irĩma maĩ moimĩte ciũmba-inĩ ciake iria cia igũrũ: wee-rĩ, thĩ ĩgakĩhũna maciaro ma wĩra waku.
• 14. Nĩwe ũtũmaga nyeki ĩringũre ya kũrĩo nĩ mahiũ, na agakũria indo cia kũmera, iria irĩ ũteithio harĩ andũ; tĩri-inĩ gũkiumage irio,
• 15. O na ndibei, ĩrĩa ĩkenagia mũndũ ngoro, na maguta ma gũtũma ũthiũ wake ũkengage, o na mũgate, ũrĩa wĩkagĩra ngoro ya mũndũ hinya.
• 16. Mĩtĩ ya Jehova o nayo nĩĩhũnaga, o yo mĩtarakwa ĩrĩa ya Lebanoni, ĩrĩa aahandire.
• 17. Thĩinĩ wayo nĩkuo nyoni ciaraga itara ciacio, nayo njũũ-rĩ, mĩkarakaba-inĩ nĩkuo nyũmba yayo.
• 18. Irĩma iria ndaya nĩkuo gwa tũbũri twa werũ; ndwaro-inĩ cia mahiga-rĩ, nĩkuo mwangĩro wa ikami.
• 19. Mweri-rĩ, aaũũmbire ũtuĩke wa kũmenyithanagia mahinda; riũa narĩo nĩrĩmenyaga ithũĩro rĩarĩo.
• 20. Wee ũtũmaga kũgĩe nduma, gũgagĩtuĩka ũtukũ, rĩrĩa nyamũ ciothe cia mũtitũ ikungaga ikoimĩra;
• 21. Mĩrũthi ĩrĩa mĩĩthĩ ĩkarumaga nĩ kwĩrirĩria ndĩa yayo, ĩgagĩĩtagia irio ciayo harĩ Mũrungu.
• 22. Riũa rĩkaratha, nyamũ igethiĩra, ikearahania imamo-inĩ ciacio.
• 23. Andũ makoima na nja, magathiĩ wĩtungatĩri-inĩ wao magatinda wĩra-inĩ wao o nginya gũtuke.
• 24. Ĩ Jehova, nĩ maingĩ atĩa mawĩra marĩa ũrutĩte! o mothe ũmarutĩte na wara; thĩ nĩ kũiyũra ĩiyũire ũrĩmi waku.
• 25. Rĩrĩa nĩrĩo iria, o ũguo rĩnenehete na rĩkaarama; thĩinĩ warĩo kwĩ indo iria ciongoyaga itangĩgereka; nyamũ ii kuo nyinyi o na nene.
• 26. Nĩkuo marikabu ithiagĩra; nyamũ ĩrĩa ĩĩtagwo rĩwiathani nĩkuo ĩrĩ, ĩrĩa wombire ĩtũhage kuo.
• 27. Icio ciothe nowe iroragĩrĩria, nĩguo ũciheage irio ciacio o ihinda rĩacio rĩakinya.
• 28. O kĩrĩa wacihe nĩkĩo cioyaga; ũkumbatũragia guoko, igakĩhũna wega waku.
• 29. Ningĩ ũkahitha ũthiũ, cio igagĩcanjama; ũcokagĩra mĩheehũ yacio, igakua, igacoka rũkũngũ-inĩ gwacio.
• 30. Gũtũma ũtũmaga roho waku, nacio igakĩgĩa; ũthiũ wa thĩ ũgakĩwanakahia.
• 31. Riri wa Jehova ũrotũũra tene o na tene; Jehova arokenagĩra mawĩra marĩa arutĩte,
• 32. O we ũcio ũringagia thĩ riitho, nayo ĩgathingitha; ahutagia irĩma, nacio ikoima ndogo.
• 33. Ngũtũũra nyinagĩra Jehova hingo ĩrĩa yothe ngũikara ndĩ muoyo; Ngai wakwa-rĩ, ndĩĩmũinagĩra ngĩmũgoocaga hĩndĩ ĩrĩa yothe ndĩ ho.
• 34. Macũrania makwa marogĩa na mũrĩo harĩ we: niĩ-rĩ, nĩ Jehova ndĩrĩkenaga nĩ ũndũ wake.
• 35. Arĩa ehia maroninwo, marindũke gũkũ thĩ, andũ aaganu-rĩ, maage gũcoka kũgĩa. Ngoro yakwa, no kĩgathe Jehova! Goocai Jehova!

Home