Go Back
Thaburi Chapter 10
- 1. JEHOVA, ũgũkĩrũgama o haraya nĩkĩ?
mahinda ma mĩnyamaro-rĩ, nĩ kĩ gĩtũmaga wĩhithe?
- 2. Tondũ wa mwĩono wa andũ arĩa aaganu, ũrĩa mũthĩni nĩ mũthĩng’e mũno:
marogwatio o ene nĩ mauungumania o macio megereirie!
- 3. Amu-rĩ, ũrĩa mwaganu nĩerahagĩra kwĩrirĩria kwa ngoro yake,
na tondũ wa ũrĩa arĩ riitho iraya nĩethambĩte Jehova, o na kũrurũka akamũrurũka.
- 4. Ũcio mwaganu-rĩ, tondũ wa ũrĩa ũthiũ wake wĩtĩĩte, oigaga atĩrĩ, Ndangĩrĩhania.
Mwĩgererio wake wothe no atĩ, Gũtirĩ Ngai.
- 5. Maũndũ make maikaraga marĩ o manyitu hingo ciothe:
matuĩro maku-rĩ, marĩ igũrũ mũno, o kũrĩa atangĩmona;
arĩa othe me muku nake, no kũmatemba amatembaga.
- 6. Ũrĩa eĩraga na ngoro nĩ atĩrĩ, Niĩ-rĩ, ndikenyenyeka;
njiaro na njiaro ndirĩ hĩndĩ ngona ũũru.
- 7.
Kanua gake kaiyũraga irumi, na ũrĩa-ma, o na ũhahanyi;
nguruĩ ya rũrĩmĩ rũake haikaire ũũnũhi, na waganu.
- 8. Aikaraga ehetereirie tũheta-inĩ tũrĩa twĩ mĩciĩ-inĩ;
kũrĩa kũgitaru nĩkuo oragagĩra ũrĩa ũtarĩ na ũũru;
maitho make maikaraga macũthĩrĩirie na hitho mũndũ ũrĩa ũtarĩ na mũmũteithia.
- 9. Kũu kũgitaru aikaraga ohanĩirie ta mũrũthi wĩ kĩmamo-inĩ kĩaguo,
agakĩoheria ũrĩa mũthĩni nĩ getha amũnyite;
agwatagia ũcio mũthĩni agakĩmũkururia e mũrigicĩrie na wabu yake ya gũtegana.
- 10. Nĩ gũkunga akungaga, agakĩinamĩrĩra,
nao acio matarĩ na mũmateithia makarũndwo nĩ makarau marĩa e namo.
- 11. Akeĩra na ngoro atĩrĩ, Mũrungu nĩ mũriganĩre;
nĩehithĩte ũthiũ; ndarĩ hingo angĩona.
- 12. Kĩarahũke, Jehova; wee Mũrungu-rĩ, kĩambararie guoko na igũrũ:
tiga kũriganagĩrũo nĩ arĩa athĩnĩki.
- 13. Nĩ ũndũ kĩ mũndũ mwaganu aagĩtũũra arurũkaga Ngai,
akiugaga ũũ na ngoro, atĩ, Wee ndũngĩrĩhania?
- 14. Kuona-rĩ, nĩwonete; amu gũgĩtwaranĩrũo nditikũ na mĩtandiũko wee nĩwĩonagĩra, ũgakĩoya ũhoro ũcio moko-inĩ maku:
ũrĩa ũtarĩ na mũmũteithia nĩakũrekagĩrĩria ũhoro wake;
wee nĩwe ũtũire wĩ mũteithia wa ciana cia ngoriai.
- 15. Kiune ũrĩa mwaganu guoko;
mũndũ ũrĩa mũũru-rĩ, thingata waganu wake o nginya ũũkinyie gĩturi.
- 16. Jehova nĩwe Mũthamaki kinya tene o na tene:
ndũrĩrĩ nĩ gũtoma itomete igathira bũrũri wake.
- 17. Wee, Jehova, nĩũrĩkĩtie kũigua wendi wa arĩa ahoreri:
ngoro ciao nĩũrĩcinyitagia, na ũtegage gũtũ ũkamathikĩrĩria;
- 18. Ũgagĩtua cira wa mwana wa ngoriai, o na wa mũndũ mũtereme,
nĩguo mũndũ, na no wa thĩ, ndakanacoke gũtuana nda.
Home