Go Back

Ayubu Chapter 9

• 1. HĨNDĨ ĩo Ayubu agĩcokia akiuga atĩrĩ,
• 2. Ti-itherũ nĩnjũĩ atĩ ũhoro ũcio noguo: no rĩrĩ, mũndũ angĩkĩhota atĩa gũtuĩka wa kĩhooto harĩ Mũrungu?
• 3. Angĩenda kũgariũranĩra ũhoro nake, ndangĩhota kũmũcokeria kĩũria o na kĩmwe gĩa ciũria ngiri.
• 4. Ngoro yake ĩĩ na ũũgĩ-ũrĩa-wa-ma, o na e na hinya mũno: nũ wanakĩmũũmĩra na agĩikara ahoroheirũo?
• 5. Akĩrĩ we ũrĩa ũthengagia irĩma, na itingĩkorũo ikĩmenya agĩciturũra nĩ ũrĩa arakaire;
• 6. Na nowe ũthukathukaga thĩ ĩkoima handũ hayo, itugĩ ciayo igakĩinaina;
• 7. Na nowe wathaga riũa, rĩgatĩra kũratha, nacio njata agathinga itigathere;
• 8. Na nowe watambũrũkirie igũrũ arĩ o wiki, na agathiaga agĩkinyaga makũmbĩ ma iria na makinya;
• 9. Ningĩ nowe mũũmbi wa njata iria ciĩtagwo Nduba, na Karau, o na Kĩrĩmĩra, o na icungo cia igũrũ iria irĩ mwena wa gũthini;
• 10. Arĩ we mwĩki maũndũ manene matangĩtuĩrĩka, o maũndũ me magegania matangĩtarĩka.
• 11. Atĩrĩ, ahĩtũkagĩra o haha ndĩ, na ndingĩmuona, agathiĩ na mbere akabuĩria, na niĩ ndimenye.
• 12. Kwĩnyitĩra nĩenyitagĩra: nũ ũngĩhota kũmũgiria? nũ ũngĩkĩmũũria, Nĩ atĩa ũreka?
• 13. Ngai-rĩ, ndangĩcokacokia marakara make; arĩa mateithagia Rahabu no mainamĩrĩire thĩ harĩ we.
• 14. Makĩria githĩ ti niĩ itangĩhota kũmũcokeria ũhoro, ngĩthure ciugo cia gũcokanĩria nake?
• 15. O na ingĩtuĩka ndĩ na kĩhooto, niĩ ndingĩmũcokeria, no gũthaitha ingĩthaitha ũcio mũnjirithia.
• 16. O na ingĩkorũo ndĩmwĩtĩte, nake akanjĩtĩka, o narĩo ndingĩĩtĩkia atĩ aathikĩrĩria mũgambo wakwa.
• 17. Amu no kũnyuna anyunangaga na kĩhuhũkanio, akĩingĩhagia nguraro ciakwa tũhũ.
• 18. Ndarekaga ’hũmũke, no kũiyũria anjiyũragia ũcũngũ.
• 19. Korũo nĩ ũhoro wa hinya wa makarau ngwaria, no oige, Niĩ ũyũ! korũo nĩ cira, atĩ tũcire, no orie, Nũ ũngĩndua gĩathĩ?
• 20. O na ndatuĩka ndĩ na kĩhooto, kanua gakwa mwene no kandue mwĩhia; o na ndatuĩka ndĩ mũndũ ũtarĩ ũcuke, no onanie atĩ ndĩ mũremi.
• 21. O na rĩu ndirĩ hĩndĩ itarĩ mwagu-ũcuke! niĩ-rĩ, ndikwĩrĩrĩra; muoyo wakwa nĩ gũtirika ndĩũtirikĩte.
• 22. Ũhoro no ũmwe; tondũ ũcio nĩngiugĩte atĩrĩ, Aninaga arĩa aagu-ũcuke o na arĩa aaganu o ũndũ ũmwe.
• 23. Korũo nĩ mũmitĩko ũhobanĩirie andũ ũkamamitũra-rĩ, we no athekerere arĩa matarĩ na wĩhia nĩ ũguo marakĩgerio.
• 24. Thĩ nĩ kũrekererio ĩrekereirio moko-inĩ ma andũ arĩa aaganu; atua-cira arĩa me kuo nĩamahumbĩte mothiũ: aagĩkorũo tiwe, nũ?
• 25. Matukũ makwa nĩmarathira na ihenya rĩkĩrĩte rĩa mũkinyia-wa-ũhoro; no kũhuhũka mahuhũkaga; matirĩ mũnyaka wonekaga.
• 26. Mabuĩragia magathiĩ, ta tũmacua tũrĩa tũhiũhi mũno, kana ta hũngũ ĩgĩcuhũkĩra ndĩa yayo.
• 27. Ndoiga, Nĩngwĩriganĩria kĩeha kĩrĩa ndĩ nakĩo, nĩngũgĩtiga gũtuka gĩthiithi, ngenyũke
• 28. Ndoiga ũguo-rĩ, ngagĩĩtigĩra mathĩna maya ndĩ namo; nĩnjũĩ ndũriuga atĩ ndiĩhĩtie.
• 29. Ndirĩ hĩndĩ itarĩtuwo o mwĩhia; ngũkĩĩnogia tũhũ nĩ ũndũ kĩ?
• 30. O na ingĩĩthamba na maĩ ma tharunji, na moko makwa ndĩmatherie o mũno mũno,
• 31. Wee ndũrĩ hingo ũtangĩndikia gĩcoro-inĩ, nguo ciakwa mwene i’nyire.
• 32. Amu-rĩ, we to mũndũ ta niĩ, atĩ ndahota kũmũhũndũrĩra ũhoro, tũrokanĩre tũcire tũteithũranwo.
• 33. Gũtirĩ wa gũtũtuithania, atĩ atũigĩrĩre guoko gwake ithuerĩ.
• 34. Ta nĩanjehererie rũthanju rũake, itebebia rĩake rĩgĩtige kũndua nda:
• 35. Hĩndĩ ĩo ndakĩaria, na itekũmwĩtigĩra; nĩ amu ngoro-inĩ yakwa ti ũguo ndariĩ.

Home