Go Back

Ayubu Chapter 6

• 1. HĨNDĨ ĩo Ayubu agĩcokia akiuga atĩrĩ,
• 2. Na arĩ korũo gĩtubunyĩko gĩkĩ ndĩ nakĩo nĩ kũgerũo kĩgeretwo, na mũtino ũyũ nyonete ũkagerekanio nakĩo ratiri-inĩ!
• 3. Amu wakorũo wĩ mũritũ kũrĩ mũthanga ũrĩa wĩ maria-inĩ marĩa manene: nĩkĩo niĩ njarĩtie ndeto itekũigeterera.
• 4. Tondũ rĩrĩ, nĩ mĩguĩ ya Mwene-Hinya ĩndonyete, ũrũrũ wayo nĩguo roho wakwa ũranyua; matebebia ma Ngai nĩmo methabĩte harĩ niĩ ma’harũkire.
• 5. Njagĩ-rĩ, nĩĩgĩkayaga ĩrĩkĩtie gũkinya nyeki-inĩ? ndegwa nĩyanagia rĩrĩa ĩtuĩrĩirũo?
• 6. Kĩndũ gĩtarĩ mũcamo nĩkĩngĩrĩĩka gĩtekĩrĩtwo cumbĩ? kana rũrenda rũa itumbĩ-rĩ, rũrĩ na mũrĩo?
• 7. Ngoro yakwa nĩĩrarega kũihutia; harĩ niĩ nĩ ta irio ii magigi.
• 8. Ĩ korũo ndetĩkĩrio ũndũ ũrĩa ndĩrahoya! korũo Ngai aanjĩtĩkĩria ũndũ ũrĩa ngwĩrirĩria!
• 9. Na nĩguo atĩ Ngai etĩkĩre kũ’memenda; arekererie guoko gwake, a’ng’ũrie!
• 10. Hĩndĩ ĩo ndingĩaga kũnyamarũka o na rĩu; ĩĩ-ni, nĩ gũtũrũha ingĩtũrũha, o ngĩtuuragwo nĩ ruo rũtangĩnjiguĩra tha: nĩ gũkorũo ndirĩ ndakaana ciugo cia Ũrĩa Ũmwe Mũtheru.
• 11. Kaĩ hinya wakwa ũkĩrĩ ũrĩkũ, atĩ ndahota gweterera? ithirĩro rĩakwa narĩo nĩ rĩrĩkũ, atĩ nĩguo ngirĩrĩrie?
• 12. Hinya wakwa ũkĩrĩ guo hinya wa mahiga? mwĩrĩ wakwa anga nĩ wa kĩgera kĩa rũthuku?
• 13. Ũndũ kũrĩ, anga ti atĩ thĩinĩ wakwa wĩteithia nĩ mũthiru, ngakĩingatĩrũo kĩhonia o kũingatĩrũo?
• 14. Mũndũ ũkiriĩ kũhooteka-rĩ, nĩaagĩrĩirũo nĩ gũtugĩrũo nĩ mũratawe, o na gwatuĩka mũtugwo nĩ ũrĩa ũratiga gwĩtigĩra Mwene-Hinya.
• 15. Ariũ a awa nĩ kũngarũka mangarũkĩte ta karũũĩ, o ta mĩkuru ya tũrũũĩ tũrĩa tũhũaga,
• 16. Tũrĩa tũkoragwo tuunjugũkĩte nĩ makangaĩ ma mbarabu, na tondũ wa tharunji ĩrĩa ĩthirĩire thĩinĩ watuo,
• 17. Ningĩ hĩndĩ ĩrĩa twagwata ũrugarĩ, tũkamica; gwakĩara-rĩ, tũkang’ario kũrĩa tũrĩ.
• 18. Ng’endo iria igendagĩra kũu tũrĩ nĩikerũraga na harĩ tuo, igacoka ikaambatania na werũ, igakĩũrĩra kuo.
• 19. Ng’endo cioimĩte Tema nĩciatũroragĩrĩria, mbũtũ iria cioimĩte Sheba nacio nĩciatũtanyaga;
• 20. Igĩgĩconoka, nĩ ũrĩa ciatwĩrĩgĩrĩire, na igĩkinya ho, igĩkĩgegeara.
• 21. Nĩ amu rĩu inyuĩ na inyuĩ mũtuĩkĩte a tũhũ; nĩ icanjama muonete, mũgatebeba.
• 22. Nĩngarĩ njugire, ’Hei kĩndũ? kana, Mũ’hakĩrĩre na indo cianyu?
• 23. Kana ngoiga, ’Hatũrai moko-inĩ ma mũmuku? kana, Ngũũrani moko-inĩ ma mĩitũ?
• 24. Atĩrĩrĩi, ndutai ũhoro, na nĩngũkĩra; nyoniai harĩa ’hĩtĩirie, ngĩmenye.
• 25. Ciugo iria njerekereru-rĩ, ĩ itikĩrĩ na kĩhooto! no inyuĩ mwanjirithia-rĩ, nĩ ũndũ ũrĩkũ mwandũithĩria?
• 26. Anga nĩ kanua muugĩte mũkũrũithia, o na gwatuĩka atĩ ciugo cia mũndũ ũũmĩirũo tha no ta rũhuho?
• 27. Inyuĩ no gũcukĩra mwana wa ngoriai mĩtĩ, mũrata wanyu-rĩ, mwamũtua kĩndũ gĩa kwendio!
• 28. Rĩu-rĩ, ĩtĩkĩrai kũndora; amu ndingĩkĩhota kũhenania o mothiũ-inĩ manyu.
• 29. Ta cokerai, cira ndũgagĩtuwo wogiĩ; cokerai rĩngĩ, amu ũhoro wakwa no wa kĩhooto.
• 30. Githĩ rũrĩmĩ rũakwa nĩruugĩte ũhoro muogomu? karakara yakwa githĩ ndĩngĩhota gũkũũrana maũndũ ma ũgenyũ?

Home