Go Back

Ayubu Chapter 42

• 1. HĨNDĨ ĩo Ayubu agĩcokeria Jehova, akiuga atĩrĩ,
• 2. Nĩndamenya atĩ wee ndũrĩ ũndũ o wothe ũtangĩhota; ndũngĩgirĩka ũndũ waku o na ũrĩkũ ũrĩa wĩthugundĩire.
• 3. Ũyũ, atĩ, nũ ũrahithania kĩrĩra nĩ kwaga ũmenyi? Hau naho-rĩ, nĩ niĩ ndumũrĩte kanua na maũndũ itekũmamenya, ngakĩgweta maũndũ ma magegania mangĩrũkĩte, na nĩ marĩa itoĩ.
• 4. Wee, ta igua, nĩguo ngĩarie; uugire atĩrĩ, Nĩngũkũũria, nawe ũkĩ’menyithie.
• 5. Nĩ atĩrĩrĩ, ũhoro waku kũigua ndĩraũiguĩte kũigua kũrĩa gwa gũtũ; ĩndĩ rĩu riitho rĩakwa nĩ gũkuona rĩkuonete,
• 6. Na tondũ ũcio nĩndethũũra, na nĩnderira ngehurĩria rũkũngũ o na mũhu.
• 7. NA gũgĩtuĩka atĩrĩ, atĩ Jehova aarĩkia kũhe Ayubu ũhoro ũcio, we Jehova akĩĩra Elifazu ũrĩa Mũtemani atĩrĩ, Nĩngwakanwo nĩ marakara nĩ ũndũ waku, na nĩ ũndũ wa arata acio aku erĩ: nĩ gũkorũo mũkĩaria ũhoro wakwa mũtinoiga ũndũ ũrĩa ũringaine naguo ta ndungata yakwa Ayubu.
• 8. Tondũ ũcio rĩu no kĩoei ndegwa mũgwanja na ndũrũme mũgwanja, mũthiĩ harĩ ndungata yakwa Ayubu, mũkerutĩre ihaki rĩa gũcinwo; nayo ndungata yakwa Ayubu nĩĩkũmũhoera, amu we nĩngũmwĩtĩkĩra, inyuĩ ngĩtige kũmwĩka kũringana na gũkĩga kwanyu; nĩ gũkorũo mũkĩaria ũhoro wakwa mũtinoiga ũndũ ũrĩa ũringaine naguo ta ndungata yakwa Ayubu.
• 9. Tondũ ũcio Elifazu ũrĩa Mũtemani, na Bilidadi ũrĩa Mũshuhi, o na Zofaru ũrĩa Mũnaamathi, magĩthiĩ magĩĩka ũguo Jehova aamaathire: nake Jehova agĩgĩĩtĩkĩra Ayubu.
• 10. Na hĩndĩ ĩo aahoeire arata ake, Jehova akĩgarũrania ũhoro wa Ayubu wa ũguo aaikaire agwetwo nĩ thĩna; Jehova agĩkĩhe Ayubu indo maita merĩ ma iria aarĩ nacio mbere.
• 11. Hĩndĩ ĩo ariũ a nyina othe, na aarĩ a nyina othe, o na andũ othe arĩa maarĩ a thiritũ yake mbere magĩũka kũrĩ we, makĩrĩanĩra irio nake gwake nyũmba; magĩkĩmũrĩrithia makĩmũthathayaga tondũ wa ũũru wothe ũrĩa Jehova aamũtũmĩire, ningĩ makĩmũhe o mũndũ gatuĩku ka betha, na mũndũ gĩcũhĩ gĩa thahabu.
• 12. Jehova agĩkĩrathimĩra Ayubu ihinda rĩake rĩa mũrigĩrĩrio gũkĩra rĩa kĩambĩrĩria: akĩgĩa na ng’ondu ngiri ikũmi na inya, na ngamĩra ngiri ithathatũ, na ndegwa cia kũiganĩra macoki ngiri ĩmwe, na ndigiri cia mĩgoma ngiri ng’ima.
• 13. Ningĩ akĩgĩa na ariũ mũgwanja na airĩtu atatũ.
• 14. Ũrĩa mũkũrũ akĩmũtua Jemima, na wa kerĩ akĩmũtua Kezia, na wa gatatũ akĩmũtua Kereni-hapuku.
• 15. Na bũrũri wothe gũtingĩonekire andũ-a-nja athaka ta airĩtu acio a Ayubu: nake ithe wao akĩmatua amũgai o hamwe na ariũ a nyina wao.
• 16. Na thutha wa maũndũ macio Ayubu agĩikara mĩaka igana rĩa mĩrongo ĩna, akĩona ariũ ake o na acũkũrũ ake, akĩya gũkahingia njiarũa inya.
• 17. Nake Ayubu agĩgĩkua, e mũthuri mũkũrũ ũtũũrĩte matukũ maingĩ mũno.

Home