Go Back

Ayubu Chapter 40

1. NINGĨ Jehova agĩcokeria Ayubu atĩrĩ,
2. Ũrĩa ũkwenda kũng’otha-rĩ, nĩakĩgariũrane na Mwene-Hinya? ũrĩa ũrarũithia Ngai, ta nĩacokie!
3. Hĩndĩ ĩo Ayubu agĩcokeria Jehova, akiuga ũũ:
4. Niĩ-rĩ, ndirĩ bata o na hanini; ngũgĩgũcokeria atĩa? nĩndehumba kanua na guoko.
5. Kwaria nĩnjarĩtie rĩmwe, na ndiona wa gũcokia; ĩĩ-ni, o na ngaaria kerĩ, na ndikĩrĩ ũndũ ũngĩ nguuga.
6. Hĩndĩ ĩo Jehova agĩcokeria Ayubu ũhoro e kĩhuhũkanio-inĩ, akiuga atĩrĩrĩ,
7. Rĩu ta ĩhotore ta mũndũ mũrũme: nĩngũkũũria, nawe ũkĩ’menyithie!
8. Kĩhooto kĩrĩa nduaga maũndũ nakĩo, githĩ no ũkĩrarie? niĩ githĩ wandua mwĩhia, nĩ getha wee ũtuĩke mũthingu?
9. Anga wee ũkĩrĩ na guoko ta kwa Mũrungu? nawe-rĩ, wahota kũruruma na mũgambo ta wake?
10. Ta kĩĩguĩke rĩu ũnene o na ũtũũgĩru; ĩhumbe ũtĩĩku o na ũkaru!
11. Itũrũra mĩiyũro ya marakara maku, bara mũndũ o wothe mwĩgereri, ũkĩmũnyihie.
12. Kĩbare acio egereri, o mũndũ o mũndũ, ũmũkomererie na thĩ; gũterema ũtereme andũ arĩa aaganu o kũu marũngiĩ.
13. Moimbĩkanie tĩri-inĩ o hamwe; kĩmathae mothiũ na nduma kũu hitho-inĩ.
14. Hĩndĩ ĩo niĩ na niĩ nĩngũgwĩtĩkĩrĩria atĩ guoko kwa ũrĩo gwaku mwene kwahota gũkũhonokia.
15. Rĩu-rĩ, ta bara nyamũ ĩrĩa ĩĩtagwo nguuũ, ĩo ndombire hamwe nawe: ĩrĩaga nyeki o ta ng’ombe.
16. Rora ũkandĩru ũrĩa ĩĩ naguo njohero, na hinya ũrĩa ĩĩ naguo mĩkiha yayo ya nda.
17. Gĩthita kĩayo ĩgĩkĩhang’ia, no ta mũtarakwa: nga cia ciero ciayo ikĩndĩtwo ta mĩhĩndo.
18. Mahĩndĩ mayo mahaana ta mĩberethi ya rũthuku; mbaru no ta irung’o cia igera.
19. Nyamũ ĩo nĩyo kĩndũ kĩa mbere cĩũmbe-inĩ cia Mũrungu: rũhiũ rũu rũayo nĩ mũmĩũmbi wamĩheire.
20. Irio ciayo nĩ irĩma imĩciaragĩra, arĩ kuo gũtũhagwo nĩ nyamũ ciothe.
21. Ĩmamaga mĩtĩ-inĩ ĩrĩa ĩrĩ mwĩgunyĩ, gĩthaara-inĩ kũrĩa kwĩhithĩte, o kũrĩa kwĩ na mũtondo.
22. Mĩtĩ ĩo ĩrĩ mwĩgunyĩ ĩmĩgitagĩra na kĩĩgunyĩ kĩayo, na ĩgaikara ĩĩ ndigicĩrie nĩ mĩcũgũcũgũ ya rũũĩ-inĩ.
23. O na rũũĩ rũaiyũra mũno, gũtebeba ndĩngĩtebeba: no gwĩkindĩra ĩikaraga ĩĩkindĩire o na rũũĩ ta Jorodani rũamĩtumbuthũkĩra kinya o kanua-inĩ.
24. Gũkĩrĩ mũndũ ũngĩmĩnyita rĩrĩa ĩĩhũgĩte, kana amĩtũre mũniũrũ amĩĩkĩre kĩana kĩa rũrigi?

Home