Go Back

Ayubu Chapter 37

1. Ngoro yakwa o nayo nĩĩratetema, na kugũũka ĩkagũũka handũ hayo.
2. Iguai ũrĩa mũgambo wake ũrakandũka, kĩiguei mũrurumĩ ũrĩa kanua gake kararurumĩria.
3. Aũrekagia ũgatambũrũka ruungu rũa igũrũ o guothe, naruo rũheni rũake rũgakinya o ndere-inĩ cia thĩ.
4. Thutha waruo nĩ mũgambo ũcokaga gũthunguruma: nĩwe ũraruruma na mũgambo ũcio wake mũkaru, na rĩrĩa mũgambo wake ũkũiguwo ndarigagĩrĩria heni.
5. Mũrungu-rĩ, arurumaga na mũgambo wake mũrurumĩre ũrĩ magegania; nĩ maũndũ manene ekaga matangĩmenyeka nĩ ithuĩ.
6. Amu nĩwe wĩraga tharunji, Itĩkĩra thĩ; mbura o nayo, rĩrĩa ĩkuura, o gwata iboboto cia mbura yake ĩrĩa nene;
7. Agagĩkũnjaria moko ma andũ othe, nĩ getha othe mamenye nĩwe, akĩrĩ we wamombire.
8. Hĩndĩ ĩo nyamũ nacio igathiĩ kwĩũa ciemo-inĩ, igagĩikara o imamo-inĩ ciacio.
9. Mwena wa gũthini-rĩ, kuumaga kĩhuhũkanio, gĩgoka kiumĩte kũu nyũmba yakĩo; mwena wa gathigathini nakuo gũkoimaga heho.
10. Mĩhũmũ ya Mũrungu nĩĩtũmaga kũgĩe mbarabu; maĩ, o na harĩa maaramĩire, magakĩgwatana.
11. O narĩo itu rĩrĩa imata nĩwe ũrĩritũhagia nĩ kũrĩiyũria ũigũ, na gũtambũrũkia agatambũrũkia itu rĩake rĩrĩa riumaga rũheni;
12. Narĩo rĩkagarũrũo o na kũrĩa angĩrĩerekeria, matu macio mekage ũrĩa egũkĩmaatha gũkũ ũthiũ-inĩ wa thĩ kũrĩa guothe gũtũũragwo nĩ andũ,
13. O na akorũo gĩtũmi kĩa amarehe nĩ aherithanie, kana nĩ athondeke thĩ yake, kana nĩ ũndũ wa kũiguanĩra tha.
14. Ta thikĩrĩria ũhoro ũyũ, wee Ayubu: tithĩria hau, wĩcũranĩrie mawĩko ma Mũrungu ũrĩa me magegania.
15. Wee nĩũũĩ ũrĩa Ngai aathaga maũndũ macio, na ũrĩa atũmaga rũheni rũa itu rĩake rũhenũke?
16. Wee nĩũũĩ ũrĩa matu magiragio matugũke? wakĩmenya mwĩkĩre wa morirũ ma Ũcio mwene ũmenyi mũkinyanĩru?
17. Wamenya kĩrĩa gĩtũmaga nguo ciaku ihiũhe rĩrĩa thĩ ĩkirĩte ki nĩ ũndũ wa rũhuho rũa gũthini?
18. Matu-mairũ-rĩ, wee wahota gũtambũrũkia ta ũrĩa We ekĩte, o ũguo momĩte ta gĩcicio kĩa rũthuku?
19. Ta gĩtũrute ũrĩa tũngĩmwĩra, amu ithuĩ tũtingĩmenya kwerekania ũhoro nĩ ũndũ wa nduma.
20. Hĩ! atĩ erũo ndĩ ũndũ ngwenda twarie? kaĩ kũrĩ mũndũ ũngĩkiuga amerũkio?
21. Na rĩu andũ matingĩhota kũbara ũtheri ũcio ũcangaraire igũrũ, rĩu gũgĩũkĩte rũhuho rũkarĩenjũra.
22. Mwena wa gathigathini gũkuuma ũkengi ũhaana ta thahabu: Ngai-rĩ, riri ũrĩa e naguo ũrĩ wĩtigĩrithia mũnene.
23. Mwene-Hinya-rĩ, ithuĩ tũtingĩhota kũmũtuĩria; ũhoti wake nĩ mũnene mũno mũno, na tondũ wa ũrĩa e wa kĩhooto, o na ũthingu mũingĩ, ndarĩ hingo angĩogogana.
24. Tondũ ũcio andũ nĩ gwĩtigĩra mamwĩtigagĩra; we ndarũmbũragia andũ o na arĩkũ arĩa ngoro ciao ciĩonaga ta marĩ ogĩ.

Home