Go Back

Ayubu Chapter 35

• 1. NINGĨ Elihu agĩcoka o ho, akiuga atĩrĩ,
• 2. Ũhoro ũyũ-rĩ, nĩguo wĩoneire atĩ nĩ wa kĩhooto, ũkiuga ũũ: Ũthingu wakwa nĩũkĩrĩte wa Mũrungu?
• 3. Ningĩ ũkĩũria atĩ wagunwo na njĩra ĩrĩkũ? ningĩ atĩrĩ: Ndagwata uumithio ũrĩkũ gũkĩra rĩrĩa ingĩtũire njĩhagia?
• 4. Niĩ-rĩ, nĩngũkũhũndũrĩra ũhoro, wee o hamwe na thiritũ ĩno yaku.
• 5. Atĩrĩrĩ, ta cũthĩrĩria kũrĩa matu-inĩ, wone; rora igũrũ, ũrĩa rĩtũũgaraire gũgũkĩra.
• 6. Kũhĩtia ũngĩtuĩka nĩũhĩtĩtie, ũkĩrĩ ũndũ wĩkĩte Ũcio? o na mehia maku mangĩkorũo me maingĩ-rĩ, nĩ ũndũ ũrĩkũ ũkĩmũhutĩtie naguo?
• 7. Ningĩ ongorũo wĩ mũthingu-rĩ, kĩrĩa ũkĩmũheete nĩ kĩ? kana nĩ kĩ ekũgwata guoko-inĩ gwaku?
• 8. Ũmaramari waku no mũndũ tawe ũngĩtuuria, ũthingu waku naguo no mwana wa mũndũ ũngĩguna.
• 9. Andũ-rĩ, gũkaya nĩmakayaga nĩ kũhinyĩrĩrio na maũndũ maingĩ; nĩmoigaga mbu nĩ ũndũ wa guoko gwa kĩrĩ-hinya.
• 10. No gũtirĩ ũngĩũria ũũ: E kũ Ngai Mũnyũmbi, ũrĩa ũtũmaga mũndũ aine nĩ gũkena, hĩndĩ kũrĩ ũtukũ,
• 11. O ũrĩa ũtũrutaga maũndũ kũrĩ ũrĩa arutĩte nyamũ cia werũ-inĩ, na agatũũhĩgia kũrĩ nyamũ cia igũrũ iria irĩ njoya?
• 12. Gũkaya nĩmakayaga, na gũtirĩ ũngĩmetĩka, nĩ ũndũ wa mwĩtũũgĩrio wa andũ aaganu.
• 13. Mũrungu-rĩ, ndarĩ hĩndĩ angĩigua ũhoro ũtarĩ wa ma, o na kũrũmbũria, Mwene-Hinya ndangĩũrũmbũria.
• 14. Githĩ makĩria ti rĩrĩa ũkuuga atĩ wee ndũkũmuona; atĩ cira wĩ mbere yake, nawe nĩ gweterera ũmwetereire!
• 15. No rĩu, tondũ atĩ ndarokaga o gũkinyĩria mũndũ marakara, ũgagĩtua atĩ ndarũmbũragia mũno mwĩgerero.
• 16. Ayubu-rĩ, atumũrĩte kanua gake na ũhoro wa tũhũ; nĩaarĩtie ndeto nyingĩ itarĩ cia ũmenyo.

Home