Go Back

Ayubu Chapter 34

• 1. NINGĨ Elihu agĩcoka o ho, akiuga atĩrĩ,
• 2. Inyuĩ andũ aya ogĩ, iguai ndeto ciakwa; ndegerai matũ, inyuĩ amenyu maũndũ.
• 3. Amu gũtũ kũroragia ciugo o ta ũrĩa karakara ĩĩcamagĩra irio.
• 4. Nĩtwĩthurĩrei ũndũ ũrĩa wagĩrĩire, ũndũ ũrĩa ũkĩrĩ mwega-rĩ, ithuĩ tũkĩũmenye.
• 5. Nĩ gũkorũo Ayubu oigĩte ũũ: Niĩ ndĩ mũthingu, no Mũrungu nĩ gũte ateete kĩhooto gĩakwa;
• 6. O na ndatuĩka ndĩ na kĩhooto-rĩ, nduĩtwo o mũrongo; ndĩ mwĩkĩre ngurara ĩtangĩhoneka, na itarĩ ũndũ njĩhĩtie.
• 7. Ĩ nĩ mũndũ ũngĩ ũrĩkũ ũhaana ta Ayubu, kũnyua ndendwa ta ũrĩa kũnyuagwo maĩ,
• 8. Agagĩtuĩka wa ndundu ya arĩa eki maũndũ ma waganu, agakĩgĩa thiritũ na andũ arĩa imaramari!
• 9. Nĩ amu oigĩte atĩrĩ, atĩ, Mũndũ ndangĩgunwo o na hanini nĩ kũgĩa ũiguano na Ngai.
• 10. Tondũ ũcio, no gĩ’thikĩrĩriei, inyuĩ mwĩ na mbuguĩro: kũrogira Mũrungu angĩĩka ũndũ mwaganu! Mwene-Hinya-rĩ, kũrogira angĩĩka ũndũ wa wogogi!
• 11. Amu wĩra ũrĩa mũndũ arutĩte nĩguo akamũrĩha, atũme mũndũ o wothe agwate kĩrĩa kĩringaine na mĩthiĩre yake.
• 12. Ĩĩ-ni, nĩ ma, Mũrungu ndarĩ hingo angĩĩka waganu, we Mwene-Hinya ndangĩhong’ora cira.
• 13. Nũ wamũtuire mũramati amũramatagĩre thĩ? kana rĩrĩ, mabũrũri mothe, ũrĩa wamaaranirie nũ?
• 14. Angĩkĩgarũra ngoro yake ĩmũcokerere, agĩre roho wake, mĩheeho yake ĩkĩmũhũndũkĩre-rĩ,
• 15. Arĩa othe me mwĩrĩ no mathiranĩre o hamwe; andũ maacoka gũtuĩka o rũkũngũ.
• 16. Akorũo wĩ mũndũ mũtaũku-rĩ, kĩigue ũhoro ũyũ; thikĩrĩria mũgambo wakwa ũrĩa nguuga.
• 17. Atĩrĩ, mũthũũri kĩhooto-rĩ, aakĩhota gũtuĩka mwathani? Ũcio mũthingu, o Ũcio kĩhoti, githĩ wamũtua mwĩhia?
• 18. O ũcio wĩraga mũthamaki, Wĩ mũũra-huhũ! namo makang’ũ ma bũrũri akamera, Mũrĩ aaganu!
• 19. Na ndatĩagĩra anene maũthĩ, na ndangĩrora itonga gũkĩra arĩa ahũthũ, nĩ gũtuĩka othe no wĩra wa moko make.
• 20. Gũkua makuaga na mbũkĩrĩra, o ũtukũ gatagatĩ; andũ nĩ kũinaina mainainaga, makehuta, na arĩa ihoti magathengio o na matahutĩtio na guoko.
• 21. Nĩ gũkorũo maitho make nĩ gũcũthĩrĩria macũthagĩrĩria mĩthiĩre ya mũndũ, agakĩonaga ikĩro ciake ciothe.
• 22. Gũtirĩ nduma, kana handũ o na hairĩte ta gĩkuũ, harĩa eki a waganu mangĩĩhitha naho.
• 23. Nĩ amu we ndabataragio nĩ gũcũrania ũhoro wa mũndũ makĩria, atĩ aambe akinye mbere ya Mũrungu nĩguo acirithio.
• 24. Arĩa ihoti-rĩ, amahehenjaga na ategũtinda akĩhaarana, na mathenya mao agacokia andũ angĩ.
• 25. Kwĩmenyera nĩakĩĩmenyagĩra ũrĩa mekaga, agakĩmang’aũra ũtukũ, magathuthurĩka.
• 26. Amaringaga ta ũrĩa aringaga arĩa imaramari, o harĩa mekuonerũo wega nĩ andũ arĩa angĩ;
• 27. Nĩ ũndũ nĩ kwehũka mehũkire magĩtiga kũmũrũmĩrĩra, magĩkĩrega kũrũmbũria njĩra ciake o na ĩrĩkũ;
• 28. Magĩgĩtũma akinyĩrĩrũo nĩ mũkayo wa andũ arĩa ahũthũ, akĩigua gũkaya kwa arĩa maathĩnagio.
• 29. We rĩrĩa arehete ũhoreri-rĩ, nũ ũngĩhota kũmũtua mwĩhia? ningĩ ehitha ũthiũ, nũ ũngĩkĩhota kũmuona? o na gwatuĩka nĩ rũrĩrĩ rũĩkĩtwo ũguo, kana mũndũ, o ũndũ ũmwe:
• 30. Nĩ getha mũndũ gĩthagathago ndagatũũre athamakaga, gũtigakĩgĩe mũndũ ũngĩgwatia kĩrĩndĩ na mũtego.
• 31. Mũrungu-rĩ, gũkĩrĩ mũndũ wanamwĩra ũũ, ’Herithĩtio, na hatarĩ ũũru njĩkĩte:
• 32. Ũndũ ũrĩa itoine, kĩnyonererie arĩ wee; korũo kwĩ wogogi ndĩ naguo, ndigacokera?
• 33. Irĩhi rĩake githĩ no rĩtuwo ta ũrĩa wee ũkwenda, tondũ ũrarĩrega? hau-rĩ, nowe ũngĩthura, ti niĩ: no kĩarie uuge ũrĩa ũkũmenya.
• 34. Andũ arĩa me na mbuguĩro-rĩ, ũrĩa mangĩnjĩra, o mũndũ ũrĩa mũũgĩ ũkũigua ngĩaria, no atĩrĩ,
• 35. Atĩ Ayubu aarĩtie ta atarĩ na ũmenyi, na ũhoro wake ũkaaga ũgerekereri.
• 36. Na arĩ korũo Ayubu aatũũra ageragio o nginya gĩturi, nĩ ũndũ wa ũrĩa acoketie ũhoro ta andũ arĩa aaganu!
• 37. Tondũ nĩonganĩrĩirie ũhĩtia wake na ũremi; ahũrĩte hĩ o haha tũrĩ, na akaingĩhia ciugo ciake cia kũng’athĩria Mũrungu.

Home