Go Back

Ayubu Chapter 32

• 1. NAO andũ acio atatũ magĩgĩtiga gũcokagĩria Ayubu ũhoro, nĩ ũndũ we mwene maitho make eonaga ta e mũthingu.
• 2. Hĩndĩ ĩo Elihu, mũrũ wa Barakeli ũrĩa Mũbuzi, wa mbarĩ ya Ramu, agĩakanwo nĩ marakara: marakara make magĩakanĩra Ayubu, nĩ ũndũ nĩetuĩte wa kĩhooto gũkĩra Ngai.
• 3. O nao arata acio ake atatũ, marakara make makĩmaakanĩra, nĩ ũndũ nĩmaagĩte icokia rĩrĩa mangĩcokia, no Ayubu-rĩ, magakĩmũtua mwĩhia.
• 4. Na rĩrĩ, ũcio Elihu nĩ gweterera etereire aarĩrie Ayubu, nĩ ũndũ acio angĩ maarĩ akũrũ kũrĩ we.
• 5. Nake Elihu aakĩona atĩ kanua ka andũ acio atatũ gatirĩ na icokia rĩrĩa kangĩcokia, nĩrĩo aagĩakanirũo nĩ marakara.
• 6. Nake ũcio Elihu, mũrũ wa Barakeli ũrĩa Mũbuzi, agĩcokia ũhoro akiuga atĩrĩ, Niĩ ndĩ mũnyinyi, na inyuĩ mũrĩ akũrũ mũno; tondũ ũcio nĩ kwĩhata ngwĩhatĩte, na ndingĩeta kũmuonia ũrĩa na niĩ nguona.
• 7. Nguugĩte atĩrĩ, atĩ, Matukũ nĩmo mangĩaria, na ũingĩ wa mĩaka nĩguo ũngĩrutana ũũgĩ.
• 8. No rĩrĩ, thĩinĩ wa mũndũ nĩkũrĩ roho, mĩheeho ya Mwene-Hinya-rĩ, nĩyo ĩtũmaga andũ mataũke.
• 9. Arĩa akũrũ to-o ogĩ, o na to athuri moĩ gũtua ũhoro.
• 10. Hakĩrĩ ũguo-rĩ, ngũkiuga atĩrĩ, ’Thikĩrĩriai; niĩ na niĩ nĩnguonania ũrĩa nyonete.
• 11. Atĩrĩrĩ, nĩ gweterera ngwetereire ũrĩa mũngiuga, ngũthikĩrĩirie njigue ihooto iria mwĩ nacio, ngagĩeterera o mũgĩtuĩragia ũrĩa mũngĩaria.
• 12. Ĩĩ-ni, kũrũmbũria nĩngũmũrũmbũragia, na rĩrĩ, thĩinĩ wanyu gũtirĩ mũndũ wahoota Ayubu, gũtirĩ ũmenyire gũcokia ciugo ciake.
• 13. Menyai muuge atĩrĩ, Nĩ hĩndĩ tũkorereire ũũgĩ, no Mũrungu ũngĩmũtoria, thengia mũndũ:
• 14. Amu niĩ ndarĩ arangerekera ciugo ciake, na niĩ ndeto cianyu ticio ngũmũcokeria nacio.
• 15. O no kũgegeara magegearĩte, matirĩ na ũndũ ũngĩ megũcokia; nĩ kũrigwo marigĩtwo nĩ ũrĩa mangiuga.
• 16. Ĩ nĩnjeterere, niĩ, nĩ ũndũ atĩ o matikwaria, nĩ ũndũ atĩ marũngiĩ o ũguo, na maticokie ũhoro ũngĩ?
• 17. Niĩ na niĩ-rĩ, nĩngũcokia ũhoro ũcio kamũrurumo, nĩngũkĩonania ũrĩa na niĩ nguona.
• 18. Amu ndeto nĩcinjiyũire; roho ũrĩa wĩ thĩinĩ wakwa nĩ kũ’hatĩrĩria ũrakĩ’hatĩrĩria.
• 19. Nda yakwa ĩhaanĩte ta ndibei ĩrĩa yagĩte huhĩrio, no ta mondo njerũ cia ndibei ikiriĩ gũtuthũka.
• 20. Kwaria nĩngwaria, nĩguo ’hũcũke; ngũgĩtumũra mĩromo njokie ũhoro.
• 21. Ta ndekerai ndige gũtĩĩra mũndũ o na ũmwe maũthĩ, na ndikahe mũndũ o na ũrĩkũ rũgooco rũa kũmwanjanja.
• 22. Amu niĩ ndiũĩ kũheana rũgooco rũa kwanjanjana: korũo nĩguo, Mũnyũmbi nĩ kũnjehutia angĩnjehutia o narua.

Home