Go Back

Ayubu Chapter 31

• 1. Niĩ nĩtwarĩkanĩire na maitho makwa: ingĩkĩhota atĩa gũcoka kwĩrorera mũirĩtu?
• 2. Amu-rĩ, rũgai nĩ rũrĩkũ rũrĩa ingĩtũmĩrũo nĩ Ngai ũrĩ igũrũ? igai nĩ rĩrĩkũ rĩrĩa ingĩkagwata ndũmĩirũo nĩ Mwene-Hinya ũrĩ matu-inĩ?
• 3. Githĩ arĩa matarĩ athingu ti mũtino matũmagĩrũo, arĩa eki maũndũ maaganu-rĩ, rũgai rũao anga ti ndirũ?
• 4. Githĩ we ndonaga ikĩro ciakwa, na makinya makwa mothe akamatara?
• 5. Korũo ndanacangania na ũndũ ũrĩa ũtarĩ wa ma, na kũgũrũ gwakwa gũkĩhiũha gũthiĩ gwĩka ũndũ wa ũhinga-rĩ,
• 6. (Gũthimwo nĩngĩthimwo na ratiri ĩrĩa njigananu wega, nĩguo Ngai amenye wĩkindĩru wakwa;)
• 7. Korũo ikinya rĩakwa rĩanehũka rĩkiuma njĩra-inĩ, ngoro yakwa ĩgagĩthiĩ kũrũmĩrĩra maitho-rĩ, na korũo gwĩ kĩmeni o na kĩnyinyi kĩanangwata moko:
• 8. Hĩndĩ ĩo-rĩ, kũrotuĩka atĩ ndahanda, nĩ mũndũ ũngĩ ũrĩrĩaga; ĩĩ-ni, mĩhando ya mũgũnda wakwa ĩroombororio ĩthire!
• 9. Kũngĩkorũo ngoro yakwa yanahenererio nĩ mũndũ mũka, ngagĩikaraga ngĩcemagĩrĩra mũromo-inĩ wa kwa mũndũ ũngĩ wa itũũra-rĩ,
• 10. Hĩndĩ ĩo mũtumia wakwa arothĩagĩra mũndũ ũngĩ, na andũ angĩ, tiga niĩ, makĩmũraaragĩre!
• 11. Tondũ ũcio watuĩka ũmaramari ũrĩa mũnene; ĩĩ-ni, watuĩka waganu ũrĩa ũngĩherithanĩrio nĩ kĩama.
• 12. Amu ũcio nĩ mwaki ũrambanagia o kinya Ininanĩro-inĩ, na nĩ kuombororia ũngĩombororia uumithio wakwa wothe.
• 13. Korũo kwĩ hingo ndarurũkire cira wa ndungata yakwa, o ya mũndũ mũrũme kana mũirĩtu, rĩrĩa ciagariũranaga na niĩ:
• 14. Ingĩgĩĩka atĩa Mũrungu aarahũka? ingĩkĩmũcokeria ũhoro ũrĩkũ aandokera?
• 15. Ũrĩa niĩ wanyũmbire ihu-inĩ towe wombire ũcio ũngĩ o nake? to ũmwe wagĩtũthondekire twĩ nda?
• 16. Korũo ndanagiria arĩa ahũthũ magĩe na kĩrĩa mendaga, kana maitho ma mũtumia wa ndigwa ngĩtũma mamicamice;
• 17. Na korũo ndanerĩĩra tũirio twakwa ndĩ nyiki, na ciana cia ngoriai itirĩe kĩndũ ho;
• 18. (Na tiguo; amu kuuma ũnyinyi wakwa mwana ta ũcio akũrĩire harĩ niĩ ta arĩ niĩ ithe, na mũtumia ta ũcio ndũire ndĩ mũtongoria wake kinya ndoima nda ya maitũ;)
• 19. Korũo ndanakĩona mũndũ agĩkua nĩ ũndũ wa kwaga nguo, kana ngĩona ũrĩa mũkĩa aagĩte gĩa kwĩhumba-rĩ;
• 20. Korũo thũnũ ciake itianandathima, korũo ndakĩigana kũiguithio ũrugari wa guoya wa ng’ondu ciakwa-rĩ;
• 21. Korũo ndanakĩoera arĩa matarĩ maithe guoko ndĩmahũre, nĩ ũndũ nĩndonaga a kũndeithia kwagĩa cira thome-inĩ-rĩ:
• 22. Hĩndĩ ĩo kĩande gĩakwa kĩroteithũkana na mũrĩnga, nakuo guoko gũtuĩkĩre o gĩtina!
• 23. Amu nĩndetigagĩra mũno mũtino ũrĩa ũngiuma kwĩ Mũrungu, na tondũ wa ũtũũgĩru wake ndirĩ ũndũ ingĩahotire gwĩka.
• 24. Ingĩkorũo kwĩ hĩndĩ ndanatua atĩ thahabu nĩyo kĩĩrĩgĩrĩro gĩakwa, ngĩkĩĩra thahabu ĩrĩa theru, Nĩwe mwĩhoko wakwa-rĩ;
• 25. Korũo nĩndakenaga nĩ ũndũ ũtonga wakwa warĩ mũnene, na tondũ guoko gwakwa kwarĩ kũgwatu indo nyingĩ-rĩ;
• 26. Korũo ndĩ hĩndĩ ndakĩonire riũa rĩkĩara kana ngĩona mweri ũgĩceera na ũcangararu waguo,
• 27. Na ngoro yakwa ĩkĩhenererio na hitho, guoko ngĩkũmumunya na kanua-rĩ:
• 28. Ũguo naguo watuĩka waganu ũrĩa ũngĩherithanĩrio nĩ kĩama, tondũ nĩ gũkaana ingĩakaanire Mũrungu ũrĩa wĩ igũrũ.
• 29. Korũo ndĩ hĩndĩ ndakenire nĩ ũndũ wa iharagana rĩa ũrĩa ũ’thũire, kana rĩrĩa ũũru wamũkorire ngĩgĩĩtũũgĩria;
• 30. (Niĩ-rĩ, o na ndingĩetĩkĩririe kanua gakwa kahĩtie nĩ kũmũgeka, atĩ kahoe oimwo nĩ muoyo;)
• 31. Korũo andũ a hema yakwa matioigaga atĩrĩ, Nũ ũngĩona ũmwe ũtahũnaga nyama ciake?
• 32. Niĩ gwakwa-rĩ, mũndũ mũgeni ndarĩ aaraara nja; mũgendi, niĩ no gũtiirũria ndamũtiirũragĩria;
• 33. Niĩ, korũo ndanarindĩrĩra mehia makwa ta mũtugo wa andũ, ngakĩhitha waganu wakwa o thĩinĩ wa gĩthũri gĩakwa,
• 34. Nĩ ũndũ atĩ nĩndetigĩrĩte kĩrĩndĩ, na ngaguoyithio nĩ rũmena rũa mĩhĩrĩga, ngagĩĩkirĩra, na ndiume nja.
• 35. Ĩ na arĩ korũo ndĩ na wa kũnjigua! (Onei, rũũri rũakwa nĩ rũrũ, Mwene-Hinya nĩakĩnjokerie ũhoro!) Ningĩ na arĩ korũo ndĩ na marũa ma thitako marĩa mũmuku wakwa aandĩkĩte!
• 36. Ndirĩ hĩndĩ itangĩmakuua ndĩmaigĩrĩire o kĩande; nĩ kwĩoha ingĩmeoha ta kĩremba.
• 37. Makinya makwa mothe ndamwĩra mũigana wamo; nĩ gũthengerera ingĩmũthengerera ta ndĩ mũnene.
• 38. Kũngĩkorũo ng’ũndũ yakwa nĩĩra’thitaka, ĩka’negenera, mĩkururo ya mũraũ ĩkĩrĩraga maithori o hamwe;
• 39. Korũo ndũire ndĩaga maciaro mayo itaamĩrutĩire mbia, kana ngĩtũma ene yo moimwo nĩ muoyo-rĩ:
• 40. Hĩndĩ ĩo, ithenya rĩa ngano kũromeraga ciigua, na handũ ha cairi kũmerage o mahuti! Ndeto cia Ayubu nĩciathira.

Home