Go Back

Ayubu Chapter 29

• 1. NAKE Ayubu agĩcoka agĩtwara thimo ciake na mbere, akiuga atĩrĩ,
• 2. Na arĩ korũo ndariĩ ta ũrĩa ndahaanaga mĩeri ĩrĩa ya tene, o ũrĩa ndatariĩ matukũ marĩa Ngai aa’menyagĩrĩra;
• 3. Rĩrĩa tawa wake wamũrĩkaga igũrũ rĩa mũtwe wakwa, ngakĩhunguragĩra nduma-inĩ nĩ ũndũ wa ũtheri wake!
• 4. Korũo ndariĩ ta ũrĩa ndahaanaga rĩrĩa matukũ makwa maarĩ makũgũku, rĩrĩa-ni ndundu ya Ngai yaikaire ĩhumbĩire hema yakwa;
• 5. Mwene-Hinya ataanatiga gũikarania na niĩ, na ciana ciakwa no ciandigicĩirie;
• 6. O rĩo rĩrĩa makinya makwa maathiaga magĩthambagio nĩ iria imata, naruo rũaro rũa ihiga rũga’therũkagĩra njũĩ cia maguta!
• 7. Hĩndĩ ĩo ndoima na gwakwa ngathiĩ kĩhingo-inĩ gĩa itũũra, ndaiga gĩtĩ gĩakwa hau kĩaraho-inĩ-rĩ,
• 8. Aanake makanyona, magoka o magethengera, athuri nao magokĩra magakĩrũgama;
• 9. Athamaki nĩmaatigaga kwaria, magakĩĩhumba tũnua na hĩ;
• 10. Mĩgambo ya atongoria ĩgakira, nĩmĩ ciao ikagwatana na karakara.
• 11. Nĩ amu gũtũ rĩrĩa kwaigua ũhoro wakwa no kũndathima kwandathimaga, narĩo riitho rĩrĩa rĩanyona rĩkaheana ũira wakwa:
• 12. Nĩ ũndũ mũndũ mũthĩni aakaya nĩndamũhatũraga, o nake ũrĩa ũtarĩ ithe, ũrĩa wagĩte mũmũteithia.
• 13. Ndagũagĩrũo nĩ kĩrathimo kĩa ũrĩa wakiriĩ gũthira, nayo ngoro ya mũtumia wa ndigwa ngatũma ĩkũngũiye nĩ gũkena.
• 14. Nĩ ũthingu ndeguĩkĩte, naguo ũkeĩ’humba, ũciri wakwa wa kĩhooto ũgakĩnjikaraga ta nguo ya igũrũ, o na ta kĩremba ndĩ nakĩo mũtwe.
• 15. Nĩ niĩ ndarĩ maitho ma ũrĩa mũtumumu, na nĩ niĩ ndarĩ magũrũ ma ũrĩa gĩthua.
• 16. Ũrĩa mũkĩaru-rĩ, ndatuĩkaga ta ithe, na nĩndoiruragia cira wa mũndũ itoĩ.
• 17. Mũndũ ũrĩa muogogani, nĩndamuunaga ngambucu, ngĩrũmũkithagia ndĩa ĩrĩa arũmĩtie na magego make.
• 18. Hingo ĩo ndeĩraga atĩrĩ, Ngakuĩra o kĩmamo-inĩ gĩakwa, matukũ makwa ngamakĩrĩrĩria maigane ta mũthanga;
• 19. Mũri wakwa ũtambĩte ũgakinya o maĩ-inĩ, namo mathũmbĩ makwa maraaraga marĩ o na ireera,
• 20. Riri wakwa ũtũũraga ũrĩ o mwanakahu, naguo ũta wakwa ũkerũhagio ũrĩ o guoko gwakwa.
• 21. Niĩ-rĩ, andũ nĩmaandegagĩra matũ, na mageterera, magakira ki, rĩrĩa ngũheana kĩrĩra.
• 22. Ndanina ũhoro wakwa, o matiagĩcokaga kwaria; ciugo ciakwa ciamataatagĩra ta mataata.
• 23. Magakĩnjeterera o ta ũrĩa gũtanyagwo mbura, magaathamagia tũnua ta ũrĩa kũnyotagĩrũo mbura ĩrĩa ya kũrigĩrĩria.
• 24. Rĩrĩa maakorũo morĩtwo nĩ mwĩhinyo, nĩ niĩ ndamathekathekagia, nao ũtheri wa gĩthiithi gĩakwa matingĩtũma ũiname.
• 25. Nĩ niĩ ndamathuragĩra njĩra, ngaikara ta ndĩ mũnene wao, ngatũũra ndĩ ta mũthamaki wĩ gatagatĩ ga ita ciake, ngatuĩka ningĩ ta mũthathayani ũgũthathaya arĩa maracakaya.

Home