Go Back

Ayubu Chapter 28

1. MŨTHIMA wa betha nĩkũrĩ, na kũrĩ o handũ ha gũthereria thahabu.
2. Kĩgera nĩkĩrutagwo mũthanga-inĩ, na kĩgera kĩa rũthuku kĩrutagwo mahiga-inĩ nĩ gũtwekio.
3. Andũ nĩmakinyagia nduma o gĩturi-inĩ kĩayo magĩtuĩragia mahiga kinya o mũhaka ũrĩa wa kũrigĩrĩria, magagĩkinyĩrĩra marĩa me nduma-inĩ ĩrĩa nene, o kũu kwĩ nduma ta ya gĩkuũ.
4. Matũrĩkagia irima thĩ makaya gũtigana na kũrĩa andũ matũũraga, magakĩriganĩra makinya ma arĩa mahĩtũkagĩra ho; magacuhaga kuo makĩereraga marĩ o kũu kũraihanĩrĩirie na kĩrĩndĩ.
5. Thĩ igũrũ-rĩ, nĩkuo kuumaga irio, na kũrĩa thĩinĩ nĩ kũhukũranio ĩhukũranagio ĩgaikara ta yomoretwo nĩ mwaki.
6. Mahiga-inĩ mayo nĩkuo kwĩ na yakuti iria ihaana bururu, o na nĩkuo kwĩ mũthanga wa thahabu.
7. Njĩra ĩo-rĩ, gũtirĩ nderi ĩmĩũĩ, na ndĩrĩ yonwo nĩ riitho rĩa hũngũ.
8. Nyamũ iria ii na ngũrũ gũtirĩ ĩrĩ yamĩkinya, mũrũthi, na ũrĩ ũrũme, gũtirĩ ũrĩ wamĩthiĩra.
9. Andũ matambararagia moko makanyita rũaro o rũrĩa rũũmũ mũno; o gwata irĩma nĩ gũturũra maciturũraga o na mĩri.
10. Matũraga mĩirigo o thĩinĩ wa rũhiga, na kĩndũ kĩrĩa kĩĩ bata gũtirĩ gĩtonagwo nĩ maitho mao.
11. Mathingaga mĩnyũrũrũ ya maĩ ĩgatiga gũtherera; kĩndũ kĩrĩa gĩtũire gĩĩ kĩhitharu magakiumĩria ũtheri-inĩ.
12. No ũũgĩ-rĩ, ũngĩkĩoneka kũ? ũtaũku-rĩ, gĩtũũro kĩaguo nĩ ha?
13. Gũtirĩ mũndũ ũũĩ ũrĩa ũngĩgũrũo; kuoneka ndũngĩoneka bũrũri wa arĩa me muoyo.
14. Kũrĩa kũriku mũno gũkuuga atĩrĩ, Ndũrĩ thĩinĩ wakwa; narĩo iria rĩrĩa inene rĩkoiga, Ndũrĩ gũkũ gwakwa.
15. Ndũngĩgũrĩka na thahabu, na thogora waguo ti wa kũgererũo betha.
16. Ndũngĩhota kũringanio na thahabu ya Ofiri, kana onigithi ĩrĩa ĩĩ goro, kana o yakuti.
17. Thahabu kana icicio-rĩ, itingĩhota kũigananio naguo, na ndũngĩhota gũkũũranio na indo cia thahabu, o na ĩrĩa ngembu.
18. Maricani kana ngenyekenyi iria cia goro itingĩgwetanio naguo o na hanini: thogora wa ũũgĩ-rĩ, ũkĩrĩte wa ruru iria ndune.
19. Yakuti ĩhaana ngoikoni, ĩrĩa yumaga Kushi, ndĩngĩigananĩka naguo, na ndũngĩringanĩka na thahabu o na ĩrĩa theru mũno.
20. Hakĩrĩ ũguo-rĩ, ũũgĩ ũngĩkiuma kũ? ũtaũku-rĩ, gĩtũũro kĩaguo nĩ ha?
21. Amu nĩ kũhithwo ũtũire ũhithĩtwo maitho ma arĩa othe me muoyo, o kinya ũkagitanio nyamũ cia rĩera-inĩ itikawone.
22. Ininanĩro-inĩ o nakĩo Gĩkuũ, ikuuga atĩrĩ, Ithuĩ matũ maitũ no ngumo yaguo twanaigua.
23. Ngai-rĩ, nĩwe ũkũũraine njĩra ya kwaguo, nowe ũũĩ harĩa ũtũũraga.
24. Amu we nĩaikagia maitho o kinya ituri cia thĩ, na gũtirĩ handũ atonaga ruungu ruothe rũa igũrũ.
25. Rĩrĩa aathimĩire rũhuho nditi yaruo, o namo maĩ akĩmagera na kĩgeri;
26. Hĩndĩ ĩrĩa aatuĩrĩire mbura watho wa kũmĩathaga, na agĩtemera rũheni rũa marurumĩ njĩra yaruo-rĩ,
27. Nĩrĩo aawonire, na akĩuumbũra, agĩkĩũrũmia, o na gũthuuthuuria akĩũthuuthuuria.
28. Nao andũ akĩmera atĩrĩ, Onei, gwĩtigĩra Mwathani-rĩ, nĩkuo kũũhĩga-kũrĩa-kwa-ma; gũthemaga ũũru-rĩ, nĩkuo gũtaũka.

Home