Go Back

Ayubu Chapter 24

• 1. Nĩ kĩ kĩgiragia Mwene-Hinya araaragĩrie mahinda? nĩ kĩ gĩkĩgiragia arĩa mamũũĩ mone mĩthenya ĩo yake?
• 2. Kũrĩ andũ makũũraga itĩ cia mũhaka; kũrĩ matunyanaga ndũru cia mbũri makerĩithĩria.
• 3. Maingataga ndigiri ya ũrĩa ũtarĩ ithe magathiĩ nayo, na magathiĩ na ndegwa ya mũtumia wa ndigwa ĩtuĩke ngwatio ya thirĩ.
• 4. Nĩ gũthengia mathengagia andũ arĩa akĩa njĩra, athĩni a thĩ makaya kwĩhitha meturanĩire hamwe.
• 5. Ta monei, no ũndũ ũmwe na njagĩ irĩ werũ-inĩ, noguo marokagĩra wĩra wao wa kũhaara gĩa kũrĩa; gĩthaka-inĩ nĩkuo marutaga irio cia kũhe ciana ciao.
• 6. Nĩmetuagĩra ngaragatha mĩgũnda-inĩ, na makeoyagĩra matigari ma thabibu cia andũ acio aaganu.
• 7. Maraaraga njaga, matarĩ na nguo, nĩ kwaga maagaga gĩa kwĩhumbĩra heho-inĩ.
• 8. Maconjoragio nĩ mbura ĩrĩa ya irĩma-inĩ, makahĩmbagĩria ndũmba ya ihiga nĩ kwaga ha kwĩũa.
• 9. Kũrĩ andũ mahuragia mwana wa ngoriai o nyondo-inĩ, magakĩĩnyitĩra ngwatio ya thirĩ o harĩ athĩni acio:
• 10. Nao magagĩthiaga njaga, matarĩ na nguo, na magakuuaga itĩa cia ngano o na marĩ ahũtu;
• 11. Nĩo a gũthondekaga maguta kwa andũ acio nja; nĩo makinyaga ihihĩro ciao cia ndibei o makĩrĩagwo nĩ nyota.
• 12. Thĩinĩ wa itũũra kũrĩa andũ maingĩhĩire nĩ gũcayũo gũcayagwo, na gũgaikara gũgĩkayagwo nĩ ngoro cia andũ arĩa agurarie: na ũrimũ mũũru ũcio ũrekwo kuo, Ngai ndaũrũmbũyagia.
• 13. Aya ningĩ nĩ a gĩkundi kĩa arĩa meregithanĩtie na ũtheri; njĩra ciaguo matingĩmenyana nacio, o na kana marũmanĩrĩre na mĩirigo yaguo:
• 14. Mũũragani-rĩ, okagĩra o gwatherathera akorage andũ arĩa athĩni, o acio aagi, na ũtukũ agatuĩka ta mũici.
• 15. Riitho rĩa gĩtharia narĩo rĩetagĩrĩra kũgĩe mairia, nakĩo gĩkoiga atĩrĩ, Gũtirĩ riitho o na rĩmwe rĩngĩnyona: na gĩgekunĩkania ũthiũ.
• 16. Rĩrĩa kwĩ nduma nĩmenjaga nyũmba; mũthenya magatinda mehingĩire: matingĩmenyana na ũtheri.
• 17. Amu harĩ o othe rũcinĩ nĩ ta nduma ya gĩkuũ, amu nduma ya gĩkuũ nĩmoĩ matebebia mayo.
• 18. Inyuĩ mũkuuga atĩ mũndũ ta ũcio ahutũkaga narua ta arĩ o maĩ igũrũ: rũgai rũao gũkũ thĩ nĩ kũrumwo rũĩ rũrume; ndacokaga gũkerũra na ya mĩgũnda ya mĩthabibu.
• 19. Riũa na ũrugarĩ nĩininaga maĩ ma tharunji, na noguo kwa-ngoma kũninaga andũ arĩa mehagia.
• 20. Nda ĩrĩa yamũciarire nĩ kũriganĩrũo ĩkariganĩrũo nĩwe; akarĩo nĩ igunyũ ikĩiguaga mũrĩo; ndarĩ hingo agacoka kũririkanwo: wogogani-rĩ, nĩ gũthuthĩka ũgathuthĩka o ta mũtĩ.
• 21. Amu nĩarĩaga indo cia atumia arĩa thata mataciaraga akainina, na ndekaga mũtumia wa ndigwa wega.
• 22. No rĩrĩ, ing’ara icio Ngai nĩ gũtũũria aitũũragia na ũhoti wake: nĩciũkagĩra, o na rĩrĩa itangĩĩtĩkia atĩ ciacoka gũikara muoyo.
• 23. We nĩetĩkagĩria andũ acio matũũre na mwĩgangaro, nao makehoka ũhoro ũcio, o na maitho make nĩmacũthagĩrĩria njĩra ciao.
• 24. Gũtũũgĩra nĩmatũũgĩraga, na ihinda inyinyi rĩathira, makeeherera; ĩĩ-ni, nĩ gũcokio macokagio na thĩ, magathengio o ta andũ arĩa angĩ othe, magakĩrengwo ta igira cia mwere.
• 25. Na akorũo tiguo gũtariĩ, nũ ũkũ’hoota nduĩke mũhenania, agĩthatie ũhoro ũcio ndaaria?

Home