Go Back

Ayubu Chapter 23

• 1. HĨNDĨ ĩo Ayubu agĩcokia akiuga atĩrĩ,
• 2. O na ũmũthĩ ningĩ gũteta gwakwa no kũrũrũ: ihũra rĩrĩa ’hũrĩtwo nĩ iritũ gũkĩra mũcaĩre ũyũ ndĩ naguo.
• 3. Na arĩ korũo nĩnjũĩ harĩa ingĩmuona, nginye o hau gĩikaro-inĩ gĩake!
• 4. Ndatandaiya cira wakwa mbere yake, njiyũrie kanua gakwa ihooto.
• 5. Ndenda kũmenya ciugo iria angĩnjokeria, njigue wega ũrĩa we angĩnjĩra.
• 6. Nĩ kũgariũrana angĩgariũrana na niĩ na ũhoti ũcio wake mũnene? Aca! nĩ kũrũmbũiya angĩrũmbũiya ũhoro wakwa.
• 7. Hau-rĩ, mũndũ mũrũngĩrĩru aahota gũcokanĩria ũhoro nake; nĩ kuohorũo ingĩkĩohorũo, ndekio nĩ mũnduĩri nginya tene.
• 8. Atĩrĩrĩ, kwĩ hĩndĩ ngũmwetha na mbere, no ndangĩkorũo ho; rĩngĩ ngacoka na thutha, no ndingĩona harĩa arĩ:
• 9. Ngarora ningĩ na mwena wa ũmotho harĩa araruta wĩra, na ndingĩmũringia riitho; we ekwĩhitha na mwena wa ũrĩo, ngakĩremwo nĩ kũmuona.
• 10. No rĩrĩ, nĩamenyaga njĩra ĩrĩa ndĩrathiĩ nayo; aarĩkia kũngeria, ngoimĩra ’haana o ta thahabu.
• 11. Kũgũrũ gwakwa kũrũmagia o mũrato wa makinya make; njĩra yake nĩyo ndũire nũmĩrĩire, na ndirĩ ndamĩehũka.
• 12. Ndirĩ ndahũndũka ngatigana na watho wa mĩromo yake; ciugo cia kanua gake ndĩcituĩte mũthithũ wĩ bata gũkĩra kwĩatha niĩ mwene.
• 13. No ĩndĩ we nĩ wa kĩrĩko o kĩmwe, nũ ũngĩkĩhota kũmũgarũra? o ũrĩa ngoro yake ĩkwenda-rĩ, noguo ekaga.
• 14. Ũndũ ũrĩa njathĩrĩirĩo nĩguo arahingia; nake nĩ wa maũndũ maingĩ mahaana ũguo.
• 15. Tondũ ũcio nĩ gũtebeba ndebebaga ndĩ ũthiũ-inĩ wake; ndecũranĩria ũhoro wake, ngakĩmũguoyohera.
• 16. Nĩ amu Mũrungu nĩaagithĩtie ngoro yakwa hinya, we Mwene-Hinya nĩwe ũkĩndebebetie;
• 17. Nĩ gũkorũo ti nduma ĩno ĩtũmĩte ’make, na ndimakĩte nĩ ũndũ atĩ ndĩ mũhumbe ũthiũ nĩ nduma ndumanu.

Home