Go Back

Ayubu Chapter 20

• 1. HĨNDĨ ĩo Zofaru ũrĩa Mũnaamathi agĩcokia akiuga atĩrĩ,
• 2. Tondũ wa ũhoro ũcio-rĩ, meciria makwa nĩmaanjĩra njokie, tondũ wa kũhiũhahiũha kũrĩa ngoro yakwa ĩĩ nakuo.
• 3. Ndĩ kũigua mũcirĩre wanjonorithia, no roho wakwa ũrĩa wĩ mbuguĩro nĩũra’he macokio.
• 4. Githĩ ndũũĩ ũhoro ũyũ, ũrĩa ũtũire kuuma o tene, gwata o rĩrĩa kwaambire kũigwo mũndũ gũkũ thĩ,
• 5. Atĩ kũrũhia kwa andũ arĩa aaganu nĩ kwa hingo nguhĩ, gũkena kwa mũndũ gĩthagathago-rĩ, no gwa kaninda kanini?
• 6. O na mwĩtũũgĩrio wake wakorũo ũhaicĩrĩire o kinya igũrũ, kĩongo gĩake gĩgagĩkinya o matu-inĩ-rĩ,
• 7. Ndarĩ hingo atarĩtoma nginya tene o ta mai make mwene: arĩa maramuonaga nĩ kũũria makoragia, Kaĩ aagĩire kũ?
• 8. Kũirĩra arĩirĩra ta kĩroto na ndacoke kuoneka: ĩĩ-ni, arĩingatwo ore, o ta kĩoneki gĩa ũtukũ.
• 9. Riitho rĩrĩa rĩramuonaga rĩtigacoka kũmuona rĩngĩ, o na handũ harĩa aikaraga hatigacoka kũmwĩrorera.
• 10. Ciana ciake igatuĩka cia kwĩendereria harĩ andũ arĩa ahũthũ; moko make mwene magacokia indo ciake na kũrĩa aacirutire.
• 11. Mahĩndĩ make rĩu nĩmaiyũire hinya wa wĩthĩ wake, no ndũrĩ hingo ũtarĩkoma hamwe nake rũkũngũ-inĩ.
• 12. O na gwatuĩka atĩ ũũru wĩ mũrĩo wĩ kanua gake, na akauumbĩka ruungu rũa rũrĩmĩ,
• 13. Ningĩ o na gwatuĩka nĩaũiguagĩra tha, akarega kũũrekia, agakĩũikaria thĩinĩ wa kanua-rĩ,
• 14. Irio icio ciake nĩ kũgarũrũka imũgarũrũkaga ii thĩinĩ wa nda, thĩinĩ wake igagĩtuĩka o nyongo ya nduĩra.
• 15. Kũmeria nĩameretie ũtonga, na no nginya acoke kũũtahĩka; Mũrungu nĩ kũhurũra arĩũhurũra kũu thĩinĩ wa nda yake.
• 16. Nĩ ũrũrũ wa nduĩra ongete, na nĩ rũrĩmĩ rũa nyamũ-ya-thĩ rũgakĩmũũraga.
• 17. We ndakerorera mĩtaro ĩrĩa, kana njũĩ iria igũikũrũkia ũũkĩ na ngorono.
• 18. Kĩrĩa arĩmĩte o na thĩna nĩ gũcokia agagĩcokia, tiwe ũkameria; ũguo uumithio wake ũigana, tiguo arĩkenaga nĩguo.
• 19. Nĩ gũkorũo aanahinyĩrĩria andũ arĩa ahũthũ agacoka akamatiganĩria; gũtunya aanatunyana nyũmba na hinya atarĩ we wamĩakire.
• 20. Tondũ nda yake ndĩarĩ hĩndĩ ĩngĩmũhurũkia, ndarĩ kĩndũ akahonokia, icio eriragĩria.
• 21. Ndarĩ kĩndũ aatigaririe atarĩĩte; tondũ ũcio wega ũcio onaga o naguo ndũgatũũra.
• 22. Hĩndĩ ĩrĩa aiganĩtie indo o kũigania nĩrĩo agatonya hatĩka-inĩ; nĩ gũkinyĩrĩrũo agakinyĩrĩrũo nĩ moko ma arĩa othe a kĩnyamaro.
• 23. Nĩguo nda yake ihũne-rĩ, Ngai akarekia marakara make marĩa maakanu mamũgũĩre, amuurĩrie maingĩ o ta mbura, matuĩke mo irio ciake.
• 24. Akorĩra itimũ rĩa kĩgera, arathwo na ũta wa rũthuku, ahunguranio.
• 25. Akarika gwĩcomora mũguĩ, naguo ũtuĩke ũkũmuuma o mwĩrĩ; ĩĩ-ni, mũguĩ ũcio mũkengu ũkoima o nyongo yake thĩinĩ; nake agwatwo nĩ matebeba.
• 26. Nduma yothe nĩyo aigĩirũo ĩtuĩke mũthithũ wake: mwaki ũtarĩ mũndũ ũhuhĩrĩirie nĩguo ũkamũrambia, na uninũkie o na kĩrĩa gĩtigĩtwo hema yake.
• 27. Igũrũ matu-inĩ nĩgũkaguũranĩria waganu wake, o nayo thĩ kũmũũkĩrĩra ĩmũũkĩrĩre.
• 28. Wongerereku wa indo cia gwake nĩ kwehuta ũkamwehutĩra, indo icio ithiĩ na kĩguũ mũthĩ ũcio wa marakara ma Ngai.
• 29. Rũu nĩruo rũatũ rũrĩa mũndũ mwaganu aatũragĩrũo nĩ Ngai, nĩrĩo igai rĩrĩa aathĩrĩirũo nĩ Mũrungu.

Home