Go Back

Ayubu Chapter 19

• 1. HĨNDĨ ĩo Ayubu agĩcokia akĩũria atĩrĩ,
• 2. Nĩ hingo ĩigana atĩa mũgũikara o mũkĩnjĩkagĩra kĩeha ngoro, na mũkĩ’hehenjaga na ciugo?
• 3. Mũnjukĩte maita o ta ikũmi, na mũtingĩconoka nĩ ũguo mũnyũmĩire nda.
• 4. O na ingĩtuĩka atĩ ndirĩ hingo itahĩtĩtie-rĩ, ihĩtia rĩu rĩakwa no niĩ ngũgĩikara narĩo.
• 5. Ongorũo no mũkwĩĩ’neneheria, mũkĩngwetagĩra ũmene ũrĩa ’menetwo,
• 6. No kĩmenyei atĩ ũhoro wakwa nĩ Ngai ũũinamanĩtie, nĩwe ũndigicĩirie na wabu yake ya kũndega.
• 7. Nĩ rĩrĩi, ngayaga ngoiga ndĩ mũhũre, no ndingĩiguwo; ngoiga nĩndeithio, no gũtuĩrũo na kĩhooto ndingĩona.
• 8. Nĩ kũhinga a’hingĩire njĩra, ngaremwo nĩ kũhĩtũka, mĩirigo yakwa amĩĩkĩrĩte o nduma.
• 9. Riri wakwa nĩ kũnjuma anjumĩte, na akanduta thũmbĩ yakwa mũtwe.
• 10. Nĩ kũ’momora a’momorete mbarĩ ciothe, ngarindũka: nĩ gũkũũra akũũrĩte kĩĩrĩgĩrĩro gĩakwa ta mũtĩ.
• 11. Anjakanĩirie marakara make ta mwaki, agakĩngeranĩria na arĩa me muku nake.
• 12. Ita ciake injerekagĩra irehanĩte o hamwe, na ikenja njĩra ikĩmĩhaicagĩrĩria ya kũnginyĩrĩra, na ikarigicĩria hema yakwa na iraaro ciacio.
• 13. Andũ aitũ nĩamathengetie haraya na niĩ, na andũ arĩa tũratũire tũmenyaine meĩndigithĩtie o kwĩĩndigithia.
• 14. Arĩa a gĩthaku giitũ nĩ kũnjeherera manjehereire, na arata arĩa tũrarĩ thiritũ makariganĩrũo nĩ niĩ.
• 15. Andũ a gwakwa mũciĩ, nginya ndungata ciakwa cia airĩtu, manduĩte ta mũgeni: monaga ta ndĩ mũrũrĩrĩ.
• 16. Ndungata yakwa ngamĩĩta ĩkarega gwĩtĩka, no ndĩmĩthaithire na kanua o kũmĩthaitha.
• 17. Mĩrukĩ ya kanua gakwa nĩ mĩthũũre nĩ mũtumia wakwa, o nacio ciana cia nda ya maitũ ikaigua ta ndĩ mũnungu.
• 18. ’Menetwo nĩ kinya tũhĩĩ tũrĩa tũnini; rĩrĩa ngũũkĩra, tuo nĩ kũnyũrũria tũ’nyũrũragia.
• 19. Arata arĩa a ngoro yakwa othe nĩma’thũũrĩte, andũ o arĩa ndĩrendete nĩo mangarũkĩte.
• 20. Mahĩndĩ makwa nĩmagwatanĩte na rũũa o na nyama; ’honokete na kĩni kĩa magego o giiki.
• 21. Mũtikĩnjiguĩre tha, mũtikĩnjiguĩre tha, inyuĩ arata akwa! amu nĩ guoko kwa Ngai kũ’hutĩtie.
• 22. Mũthingatanĩte na niĩ nĩkĩ ta arĩ inyuĩ Mũrungu, na mũkandĩaga nyama cia mwĩrĩ mũtekũiganwo?
• 23. Na arĩ korũo ciugo ciakwa nĩ kwandĩkwo ikĩandĩkĩtwo! korũo nĩ gũtemwo itemetwo thĩinĩ wa ibuku!
• 24. Na arĩ korũo icanĩtwo na karamu ga kĩgera na igekĩrũo ngocorai, nĩguo itũũre ii njane ndũmba-inĩ ya ihiga kinya tene!
• 25. No ningĩ nĩnjũĩ atĩrĩ, atĩ Mũngũũri arĩ o kuo, e muoyo, na atĩ marigĩrĩrio-inĩ nĩwe ũkarũgama tĩri-inĩ ũyũ;
• 26. Na ikonde ici ciakwa ciakĩrĩkia kwĩha, na mwĩrĩ wakwa ũyũ wa nyama wagĩkorũo ndũrĩ ho, hĩndĩ ĩo nĩngona Ngai;
• 27. Nĩ kwĩonera ngamwĩonera arĩ wa mwena wakwa, maitho makwa nĩmo makamwĩrorera, na ti ta e mũgeni. Ngoro yakwa ĩgũkĩringĩka thĩinĩ wakwa!
• 28. Akorũo inyuĩ muugĩte atĩrĩ, Nĩtũgũthingatana nake ma! nĩ ũndũ, atĩ, gatũũrũ ka ũhoro ũyũ karĩ o thĩinĩ wakwa-rĩ,
• 29. Tuĩkai a gwĩtigĩra njomo! amu mĩherithanĩrie ya rũhiũ nĩ ya marũrũ, mũmenye no kũrĩhanagĩrio.

Home