Go Back

Ayubu Chapter 18

• 1. HĨNDĨ ĩo Bilidadi ũrĩa Mũshuhi agĩcokia akĩũria atĩrĩ,
• 2. Inyuĩ-rĩ, nĩ hingo ĩigana atĩa mũgũikara mũgĩtegaga mĩtego ya kũgwatia ciugo? ambai mũnyite ũhoro wega, tũcoke na ithuĩ tũkĩarie.
• 3. Tũtuĩtwo ta nyamũ nĩkĩ, tũkonwo nĩ inyuĩ ta tũtuĩkĩte andũ me na gĩko?
• 4. Wee ũrehanyũrũra nĩ ũrĩa ũrakaire-rĩ, nĩngarĩ thĩ ĩngĩthamwo nĩ ũndũ waku, kana ndũmba ya ihiga ĩthenge harĩa ĩtũire?
• 5. Ũndũ kũrĩ: mũndũ mwaganu-rĩ, ũtheri wake nĩ gũcingimanio ũgacingimanio, o kinya rũrĩrĩmbĩ rũa mwaki wake rũage kũmũrĩka.
• 6. Ũtheri ũrĩa ũikaraga hema yake ũgatuĩka o nduma, tawa ũrĩa mũcuurie igũrũ rĩake nĩ kũhora ũkahora.
• 7. Mũkinyũkĩrie ũcio wake wa hinya nĩ gũtĩmĩra ũgatĩmĩra, maũndũ marĩa we etaarĩte, nĩmo makamũgũithia thĩ.
• 8. Amu magũrũ make mwene no mamũtware wabu-inĩ ndege, arũndwo nĩyo, tondũ harĩa athiagĩra nĩ harĩa hahithanĩtio ndego.
• 9. Arĩgwatwo nĩ mũtego ndiira ya kũgũrũ, rũrigi rũa mũgwato rũmũnyitĩrĩrie o wega.
• 10. Oimbĩkĩirũo kĩana kĩa rũrigi tĩri-inĩ, na akaimbĩrũo irima njĩra.
• 11. Arĩmakagio nĩ matebebia me mbarĩ ciothe, na ateng’eragio nĩmo marĩ o ndiira-inĩ ciake cia magũrũ.
• 12. Hinya wake ũrĩikaraga ta ũrĩĩtwo nĩ ng’aragu, naguo mũtino ũrĩkoragwo ũmwĩhaarĩrĩirie o rĩrĩa angĩgitũka.
• 13. Ikonde cia mwĩrĩ wake igathũgũnagwo nĩ mũrimũ, ĩĩ-ni, ciĩga ciake igathũgũnagwo nĩ ũrĩa mũrigithathe nĩ gĩkuũ.
• 14. Nĩ gũkonorũo agakonorũo oimio thĩinĩ wa hema yake ĩo ehokete, atwarũo kũrĩ mũthamaki ũrĩa wa matebebia.
• 15. Nayo hema yake ĩgatũũrũo nĩ arĩa matarĩ ake: gĩtũũro gĩake nĩgĩgaitĩrĩrio ũbiriti.
• 16. Mĩri yake nĩ kũũma ĩkomĩra thĩ, na igũrũ, honge ciake ituĩkange.
• 17. Kũririkanwo gwake no kũriganĩre gũthire thĩ, nĩ kwaga akaaga rĩĩtwa o nginya itũũra-inĩ.
• 18. Akarutũrũrũo ũtheri-inĩ athiĩ nduma-inĩ, aingatwo gũkũ mabũrũri-inĩ.
• 19. Ndagakorũo e na mũriũ kana mũcũkũrũwe mũhĩrĩga-inĩ wao, na gũtirĩ mũndũ wake ũgatigara kũu aatũire.
• 20. Andũ arĩa magoka thutha makagegagio nĩ mũthenya ũcio wake, o ta ũrĩa arĩa maarĩ mbere yao maamakirio nĩguo.
• 21. Ũguo nĩguo kũhaanaga itũũro-inĩ cia arĩa matarĩ athingu, ha mũndũ ũrĩa ũtoĩ Mũrungu-rĩ, nĩ ũguo gũtariĩ.

Home