Go Back

Ayubu Chapter 15

• 1. HĨNDĨ ĩo Elifazu, ũrĩa Mũtemani, agĩcokia akĩũria atĩrĩ,
• 2. Mũndũ mũũgĩ-rĩ, nĩangĩgĩcokia ũhoro na ũmenyi ũtariĩ ta rũhuho? nĩangĩiyũria nda yake rũhuho ruumĩte na irathĩro?
• 3. Nĩangĩgĩcira akiugaga mohoro matarĩ kĩguni, kana mĩgambo ĩtarĩ na wega ĩngĩrehe?
• 4. Wee-rĩ, nĩ andũ ũraninĩra guoya, na ũkagiria maikare na wĩkĩrĩri ũrĩa wagĩrĩire harĩ Mũrungu.
• 5. Kanua gaku, nĩ waganu waku ũragataara, na nĩ rũrĩmĩ rũa mũndũ mwara wĩthurĩire.
• 6. Kanua gaku mwene nĩko karagũtua mwĩhia, ti niĩ; mĩromo yaku, wee mwene, nĩyo ĩrakuumbũra.
• 7. Wee nĩwe mũndũ ũrĩa waambire gũciarũo? kana nĩ gũkonorũo wagĩkonorirũo o gũtaanagĩa irĩma?
• 8. Wee anga ũrĩ mũthikĩrĩria wa ndundu ya Ngai? ũũgĩ nĩwe wĩrigĩirie naguo?
• 9. Nĩ atĩa ũũĩ, ithuĩ tũtoĩ? nĩ ũndũ ũrĩkũ ũmenyete tũtatũire naguo?
• 10. Ithuĩ tũrĩ na athuri arĩa marĩ mbuĩ, o arĩa akũrũ mũno, arĩa magĩtĩte matukũ maingĩ mũno gũkĩra thoguo.
• 11. Ũthathai ũrĩa uumĩte kwĩ Mũrungu, nĩ kũũira ũũirĩte, ũkaira ũhoro ũcio ũragĩkũhutia o kahora?
• 12. Ngoro yaku ĩragũikia nĩkĩ? na nĩ kĩ gĩgũtũma ũmenamenie maitho,
• 13. Ũgakĩhũgũrĩra Mũrungu roho waku na rũng’athio, o kinya ũgatumũra kanua gaku na ndeto ta icio?
• 14. Mũndũ akĩrĩ kĩo kĩ, atĩ ahote gũtuĩka mũtheru? ũrĩa mũciare nĩ mũndũ mũka-rĩ, akĩrĩ kĩo kĩ, atĩ ahote gũtuĩka mũthingu?
• 15. Atĩrĩrĩ, o kinya arĩa ake atheru, we ndamehokaga; igũrũ o narĩo ti-itherũ maitho-inĩ make.
• 16. Githĩ makĩria ti mũndũ, na nĩ mũmaramaru akabutha o kũbutha, na nĩanyuaga ũgenyũ ta ũrĩa kũnyuagwo maĩ!
• 17. Atĩrĩrĩ, nĩngũkuonia ũhoro; wee ta no kĩnjigue; nguumbũra ũrĩa ndaneonera:
• 18. (Nĩ ũhoro ũtũire ũheanagwo nĩ andũ arĩa ogĩ maheetwo nĩ maithe mao, nao makĩaga kũũhitha;
• 19. Na nĩ arĩa maaheetwo bũrũri ũgĩtuĩka wao oiki, na gũtirĩ mũndũ mũgeni watuĩkanagia kũrĩ o:)
• 20. Nĩ atĩrĩ, Mũndũ mwaganu atũũraga o atandiũkaga matukũ make mothe, mĩaka o ĩrĩa mũnyarirani agereirũo ya gũtũũra.
• 21. Matũ make maikaraga o makĩiguaga mĩrurumo ĩkũmũtuĩkĩria; o rĩrĩa aikaire na thayũ akaharũkĩrũo nĩ mũtahani.
• 22. Ndetĩkagia atĩ nĩagacoka kuuma nduma-inĩ; ũrĩa onaga nĩ atĩ nĩetereirũo nĩ njomo.
• 23. Onaga ta angĩtuĩka wa kũũrũra ahaarage irio, oragie, Ikuoneka kũ? oĩ atĩ mũthenya ũrĩa wa nduma ũmũikarĩte ĩkuhĩ ũmwĩhaarĩrĩirie.
• 24. Mĩnyamaro na ruo rũa ngoro nĩ kũmũmakia imũmakagia; igakĩmũhoota o ta atharĩkĩirũo nĩ mũthamaki wĩthagathagĩire ita:
• 25. Na gĩtũmi nĩ ũndũ nĩ Mũrungu atambũrũkĩirie guoko akamũũgita, agakĩng’athĩria Mwene-Hinya-Wothe:
• 26. Nĩ kũmũguthũkĩra aamũguthũkĩire na nditi eũmĩtie ngingo agwete ngo yake ĩĩ na ngundi iria ndungu:
• 27. Tondũ ningĩ nĩeguĩkĩire ũthiũ wake na ũnoru, na akenoria hũnĩro na mĩnono ya rũambũ;
• 28. Ningĩ nĩetũũrĩire mĩciĩ ĩrĩa yorĩte, agagĩtũũra nyũmba itangĩatũũrirũo nĩ mũndũ, ciatigairie ituĩke o irũndo cia mahiga.
• 29. Ndangĩtũũra e mũtongu; indo ciake itigaikara, ningĩ kĩmera gĩake gĩtigacunjura thĩ.
• 30. Ndarĩ hingo agacoka kuuma nduma-inĩ; honge ciake nĩ kũũmio ĩkomio nĩ rũrĩrĩmbĩ, nake no athiĩ arindũke nĩ mĩhũmũ ya kanua ka Ngai.
• 31. Nĩatige kwĩhoka maũndũ ma tũhũ, ndakehenie, amu ũthũmbi ũrĩa akaruta ho ũgatuĩka o tũhũ.
• 32. Kũhingio ũkahingio o ihinda rĩake rĩtanakinya; mathũmbĩ make matigatũũra me maigũ.
• 33. Agaita thabibu ciake iteruĩte ta ũrĩa mũthabibu ũitaga, na ahũrũrũke mbũĩ ta mũtamaiyũ wa mũgũnda.
• 34. Amu arĩa a thiritũ ya ithagathago matũũraga marĩ athatu, nacio hema cia arĩa endi mahaki nĩ kũrambũrũo irambũragwo nĩ mwaki.
• 35. Ihu rĩrĩa magĩaga narĩo nĩ rĩa kĩũnũhu, na gũciara mageciaragĩra waganu, nda yao no ũrĩa-ma ĩthugundaga.

Home