Go Back

Ayubu Chapter 13

1. Atĩrĩrĩ, maũndũ macio mothe riitho rĩakwa nĩrĩmonete, gũtũ gwakwa nĩkũmaiguĩte na gũgataũkĩrũo nĩmo.
2. Ũrĩa inyuĩ mũũĩ, o na niĩ nĩndĩũũĩ: niĩ ti atĩ ndĩ kĩrimũ kũrĩ inyuĩ.
3. No niĩ-rĩ, ndenda njarie na Mwene-Hinya, Mũrungu nĩwe ngwĩrirĩria tũcire nake.
4. Inyuĩ-rĩ, mũrĩ athondeki ndeto cia maheni, inyuothe mũrĩ o ahuhi-aimbia.
5. Na arĩ korũo mwetĩkĩra gũkira ki! ũguo watuĩka ũũgĩ harĩ inyuĩ.
6. Rĩu iguai ihooto ciakwa, thikĩrĩriai ndeteri ici cia mĩromo yakwa.
7. Nĩ Mũrungu mũracirĩrĩra na wogogi? na nĩ ũndũ wake mũraaria ũrĩa-ma?
8. Nĩ kũmũtĩa mũmũtĩĩire maũthĩ? nĩ Mũrungu mwendete kũrũĩrĩra?
9. Angĩkĩmũtuĩria-rĩ, ũguo watuĩka wega? kana nĩmũngĩmũhenia, ta ũrĩa mũndũ ahenagia ũrĩa ũngĩ?
10. We ndarĩ hingo atarĩmũkũma, mwatuĩka a gũtĩanĩra maũthĩ na hitho.
11. Githĩ ũtũũgĩru wake ndũngĩgĩtũma mũmake, na mũgũĩrũo nĩ guoya nĩ ũndũ wake?
12. Mĩgambo ĩo yanyu ya ũcamba nĩ thimo hũthũ o ta mũhu, ihooto cianyu no ta mĩĩgito ya rĩũmba.
13. Ta ĩkirĩrei, mũndige, niĩ ndĩĩarĩrĩrie, o ũrĩa ndĩĩkĩona, nyone!
14. No kwĩrĩa ngwĩrĩa mwĩrĩ wakwa na magego, ngũkĩanĩka muoyo wakwa na hĩ.
15. Kũnjũraga nĩekũnjũraga; ndirĩ ũndũ ũngĩ njetereire; no ndirĩ hingo itegũtiirĩrĩra ikĩro ciakwa ndĩ o harĩ we.
16. Ũndũ ũyũ naguo nĩguo ũgũtuĩka wa gũtũma ’honoke, atĩ gũtirĩ gĩthagathago kĩngĩkinya mbere yake.
17. Ta gĩthikĩrĩriei ũhoro wakwa wega, ũguo nguuga-rĩ, ta nĩũtonye matũ manyu.
18. Cira wakwa nĩndĩũthuranĩire; nĩnjũĩ atĩ ngũkorũo ndĩ o wa kĩhooto.
19. Nũ ũngĩhota kũngararia? korũo nĩkũrĩ, no gũtumia ngũgĩtumia, nduĩkane.
20. No rĩrĩ, ndigithia o maũndũ maya merĩ, na ndigũkĩĩhitha ũthiũ waku:
21. Atĩrĩ, guoko gwaku, kweherie haraya na niĩ, narĩo itebebia rĩaku, reke rĩtige kũndua nda.
22. Hĩndĩ ĩo no gĩĩtane, na nĩngwĩtĩka; kana ũreke niĩ njarie, nawe ũnjokerie.
23. Nĩ rĩrĩ, mawaganu makwa, na mahĩtia, nĩ maigana? wĩhia wakwa, o gwata ũhĩtia-rĩ, kĩ’menyithie.
24. Wĩhithĩte ũthiũ nĩ ũndũ kĩ, ũgakĩndua thũ yaku?
25. Nĩũngĩgariũrana na ithangũ rĩragũrũkio nĩ rũhuho? nĩũngĩthingatana na maragara?
26. Amu nĩ maũndũ marũrũ wandĩkĩte nĩ ũndũ wakwa, ũgakĩngaĩra igai rĩa mawaganu ndekire rĩrĩa ndarĩ mũnyinyi;
27. Na nĩũnjohereire ndungu cia mĩtĩ magũrũ, na ũkandĩithagia ikĩro ciakwa ciothe; ũkururĩte mũkururo ũgathiũrũrũkĩria makinya ma magũrũ makwa,
28. Niĩ mũndũ ũtuĩkĩte ta kĩndũ kĩoru, kĩrĩa kĩrathirĩrĩkĩra, akahaana ta nguo ndĩĩku nĩ tũgunyũ.

Home