Go Back

Ayubu Chapter 12

• 1. HĨNDĨ ĩo Ayubu agĩcokia ũhoro akiuga,
• 2. Kaĩ no kwĩrũo nĩ inyuĩ kĩrĩndĩ inyuiki-ĩ! ũũgĩ-ũrĩa-wa-ma ũgathiranĩra na inyuĩ o rĩrĩa mũgakua!
• 3. No rĩrĩ, niĩ na niĩ ndĩ na meciria o ta inyuĩ; niĩ ti atĩ ndĩ kĩrimũ kũrĩ inyuĩ: maũndũ ta macio nũ ũtamoĩ?
• 4. Niĩ-rĩ, nĩ kũhaana ’haanĩte ta ũrĩa ũtuĩkĩte itheko harĩ andũ a kwao, o niĩ mũndũ wathathayagia Ngai, nake akamwamũkĩria; mũndũ mũthingu, o ũrĩa ũtarĩ ũcuke-rĩ, agagĩtuĩka itheko rĩa gũthekagĩrĩrũo.
• 5. Ũrĩa ũtũire earaganĩtie-rĩ, we agĩĩciria, mũtino wene nĩ kũũraria aũraragia; kĩrario kĩu gĩtũũraga kĩĩhaarĩrĩirie arĩa magũrũ mao matirũkaga.
• 6. Hema cia atunyani nĩcio ciikaraga igaacĩire; andũ arĩa marakaragia Mũrungu-rĩ, nĩo maikaraga na mwĩhoko; moko-inĩ mao Ngai nĩaitagĩrĩra indo.
• 7. Ta no kĩũrie nyamũ, nacio ikũrute ũhoro; kĩũrie nyoni cia rĩera-inĩ, o nacio nĩigũkwĩra.
• 8. Kana ũkĩarĩrie thĩ, nayo nĩĩgũkũruta; o gwata ciũngũyũ cia iria-inĩ nĩigũkuumbũrĩra.
• 9. Indo icio ciothe-rĩ, nĩ kĩrĩkũ gĩtoĩ atĩ nĩ guoko kwa Jehova gwĩkaga ũguo?
• 10. Nake, muoyo wa kĩndũ gĩothe gĩtũũraga ũrĩ o rũhĩ-inĩ rũake, o gwata mĩheehũ ya mĩĩrĩ ya andũ othe.
• 11. Githĩ gũtũ gũtiroragia ciugo o ta ũrĩa karakara ĩĩcamagĩra irio?
• 12. Ũũgĩ, atĩ, wĩ na athuri arĩa akũrũ, na kũraihia matukũ nĩkuo kwene ũtaũku.
• 13. Atĩrĩrĩ, ũũgĩ o na ũhoti, mwene cio nĩ Ũcio; ũtaaro o na ũtaũku-rĩ, nĩwe wĩ nacio.
• 14. We nĩamomoraga, gũkarema gũcoka gwakĩka; ahingagĩra mũndũ, na kũmũhingũrĩra gũtingĩhoteka.
• 15. We-rĩ, nĩarigagĩrĩria maĩ, namo makahũa; rĩrĩ rĩngĩ akamatũma, magagĩtugũrania thĩ.
• 16. Nĩwe mwene hinya o na mũhingia wa maũndũ; mũhenio na mũhenania, erĩ no ake.
• 17. Ene-kĩrĩra, amatwaraga agathiĩ nao marĩ acume, na atui-cira nĩatũmaga matuĩke irimũ.
• 18. Wohani wa athamaki nĩaũregerũraga, nao ene akamoha njohero na mũkwa.
• 19. Athĩnjĩri-Ngai o nao, amatwaraga agathiĩ nao marĩ acume, na akang’aũra andũ arĩa njamba.
• 20. Andũ arĩa mehokeirũo ũciri, nĩaagaagagia mĩario yao, na athuri akamatunya ũthurania.
• 21. Anene-rĩ, nĩ kũmaagithia amaagithagia bata, na nĩaregeragia ndoho cia andũ arĩa me hinya.
• 22. Aguũragia maũndũ marĩa marikĩru akamaruta nduma-inĩ, gwata nduma ĩrĩa nene ta ya gĩkuũ akamiumĩria ũtheri-inĩ.
• 23. Nĩwe ũnenehagia ndũrĩrĩ, agacoka akainina; atũmaga ndũrĩrĩ ithegee, na agacoka agacitwara ũkombo-inĩ.
• 24. Atongoria a irĩndĩ cia thĩ, nĩamaagaagagia meciria, agatũma matororage baraganya-inĩ, o kũrĩa gũtarĩ njĩra;
• 25. Magatũũra mahambatangaga nduma-inĩ matarĩ ũtheri mangĩona, agagĩtũma matũgũgage ta mũndũ mũrĩu.

Home