Go Back

Ayubu Chapter 10

• 1. Ngoro yakwa nĩĩgĩĩte na kĩnyiria nĩ gũtũũra muoyo: nĩngwĩtetera itekwĩrigĩrĩria; ngwaria nĩ ũrĩa ngoro yakwa ĩĩ na ũcũngũ.
• 2. Ngwĩra Ngai atĩrĩ, Tiga gũkĩndua mwĩhia; nyonia ũndũ ũrĩa ũrandũithĩria.
• 3. Githĩ wona arĩ wega ũhinyanĩrĩrie, ũrurũke wĩra wa moko maku, nakĩo kĩrĩko kĩa andũ arĩa aaganu ũkĩmũrĩkĩre?
• 4. Anga maitho maku no ta ma mwĩrĩ, kana muonere waku anga ũkĩrĩ ta wa mũndũ?
• 5. Anga matukũ maku namo no ta ma mũndũ, mĩaka yaku anga no ta matukũ ma andũ,
• 6. Tondũ ũrakĩũrĩrĩria waganu wakwa, na ũgatuĩria ũrĩa ’hĩtĩtie?
• 7. Na no ũkĩũĩ ndirĩ mwaganu, ningĩ gũtirĩ ũngĩhota gũteithũra mũndũ guoko-inĩ gwaku.
• 8. Moko maku nomo maangũmbanirie, ũgĩkĩnyũmba ũkĩndũngania mbarĩ ciothe; ningĩ rĩu ũgacoka kũnyananga.
• 9. Ta no kĩririkane atĩ wanyũmbire ta rĩũmba: ningĩ nĩũcoke ũndue o rũkũngũ?
• 10. Anga ndwanyonoririe ta iria, ũgĩcoka ũkĩ’matia ta makindi marĩo?
• 11. Wa’humbĩrire na rũũa na nyama, na ũkĩndathĩkania na mahĩndĩ na mĩkiha.
• 12. Wanjĩtĩkĩririe kũgĩa na muoyo, na gũtuga ũkandugaga, naguo ũmenyereri waku noguo ũtũirie roho wakwa.
• 13. No rĩrĩ, maũndũ maya-rĩ, ũgĩkorũo o ũmahithĩte ngoro-inĩ yaku; nĩnjũĩ atĩ ũhoro ũyũ ũtũire o naguo.
• 14. Ndahĩtia, nĩũnjĩkagĩra rũũri, na ndũngĩnjohora ũtige kũnjũria waganu wakwa.
• 15. Ndakĩagana-rĩ, kaĩ ndĩ na mũtino mũnene-ĩ! na ndatuĩka mũthingu, o narĩo ndingĩinamũra mũtwe, nĩ ũrĩa ’nyararĩkĩte o ngĩonaga mĩtandiũko ĩno ndĩ nayo.
• 16. Na mũtwe wakwa wetiira-rĩ, wee ũgakĩnguĩma ta mũrũthi, ũkanjĩka o rĩngĩ maũndũ ma kũgegania.
• 17. Nĩ gwĩthĩhia wĩthĩhagia aira aku a kũnyumbũra, o ũkĩngĩragĩrĩria mang’ũrĩka maku; ngakĩharũkagĩrũo nĩ ita o igĩkũũranaga na ingĩ.
• 18. Nĩ ũndũ ũrĩkũ wagĩtũmire ũndute ihu-inĩ? nĩ gũtuĩkana ingĩatuĩkanire, na ndionwo nĩ maitho ma mũndũ o na ũmwe:
• 19. Ingĩatuĩkĩte ta itarĩ ndagĩa; no gũkuuo ingĩakuuirũo ndwarũo mbĩrĩra-inĩ o ndoima ihu-inĩ.
• 20. Matukũ makwa githĩ to manyinyi? No gĩtige; tigana na niĩ, nĩguo ngenyũke hanini,
• 21. Itanathiĩ kũndũ kũrĩa itagacoka kuuma, bũrũri ũrĩ nduma, gwata ĩrĩa nene ya gĩkuũ;
• 22. Nĩguo bũrũri ũrĩa wĩ nduma ndumanu, no ta nduma yo nyene; ũrĩa ũtũũraga o nduma ya gĩkuũ, ũkaaga ũndũ o na ũrĩkũ mũhaarĩrie, na ũtheri wakuo ũhaananaga o na nduma.

Home