Go Back

Ayubu Chapter 1

• 1. KWARĨ mũndũ bũrũri wa Uzu, wetagwo Ayubu; na mũndũ ũcio ndaarĩ na ũcuke na kũrũngĩrĩra aarĩ o mũrũngĩrĩru, na nĩ mũndũ wetigĩrĩte Ngai, na agathemaga maũndũ marĩa moru.
• 2. Na nĩeciarĩire ariũ mũgwanja na airĩtu atatũ.
• 3. Ningĩ ũhiũ wake warĩ ng’ondu ngiri mũgwanja, na ngamĩra ngiri ithatũ, na ndegwa cia kũiganĩra macoki magana matano, na ndigiri cia mĩgoma magana matano, na aarĩ na ndungata ciake cia mũciĩ nyingĩ mũno; mũndũ ũcio agagĩtuĩka nĩ mũnene kũrĩ andũ othe a mwena ũrĩa wa irathĩro.
• 4. Na rĩrĩ, ariũ ake maathiaga makagĩa na iruga kwa mũndũ o mũndũ wao, o mũthenya wake wakinya; o na nĩmaarekanagia magetaga airĩtu acio atatũ a ithe wao moke marĩe na manyue hamwe nao.
• 5. Na nĩgwekaga atĩrĩ, mĩthenya ĩo ya maruga macio mao yatũngana, Ayubu nĩ gũtũmana aatũmanaga akamatheria, agokagĩra rũcinĩ tene, akaruta mahaki ma njino maringaine na mũigana wao othe, nĩ gũkorũo Ayubu oigaga atĩrĩ, Ariũ akwa no gũtuĩka nĩmahĩtĩtie makaruma Ngai na ngoro. We Ayubu ndarĩ hingo aatĩragĩria gwĩka ũguo.
• 6. Na rĩrĩ, kwĩ mũthenya ariũ a Ngai maathiire kũrũgama mbere ya Jehova, na Shaitani o nake agĩthiĩ hamwe nao.
• 7. Nake Jehova akĩũria Shaitani atĩrĩ, Uuma kũ? Nake Shaitani agĩcokeria Jehova akiuga, Nyuma kũriũnga thĩ, ningĩ gũceeranga kuo o handũ na handũ.
• 8. Nake Jehova agĩcoka akĩũria Shaitani atĩrĩ, Nĩũroranĩtie ũhoro wa ndungata yakwa Ayubu, ũkona atĩ kũu thĩ gũtirĩ mũndũ ũngĩ ũhaana take, nĩ gũtuĩka nĩ mũndũ ũtarĩ ũcuke na kũrũngĩrĩra nĩ mũrũngĩrĩru, mũndũ wĩtigĩrĩte Ngai na agathemaga maũndũ marĩa moru?
• 9. Hĩndĩ ĩo Shaitani agĩcokeria Jehova akiuga,
• 10. He! Ayubu-rĩ, kaĩ etigĩrĩte Ngai o tũhũ? Githĩ ti kũmũirigĩra ũmũirigĩire mĩena yothe, nyũmba yake, na indo ciothe iria e nacio? Kũrathima nĩũrathimĩte wĩra wa moko make, naguo ũhiũ wake ũgakĩingĩha thĩinĩ wa bũrũri.
• 11. No rĩrĩ, rĩu ta coka ũtambũrũkie guoko, ũhutie indo ciothe icio e nacio, nake ndarĩ hingo ategũkũruma o ũthiũ-inĩ waku.
• 12. Nake Jehova akĩĩra Shaitani, Atĩrĩ, indo ciake ciothe nĩndaiga moko-inĩ maku, nowe mwene-rĩ, menya ũmũtambũrũkĩrie guoko ũmũhutie. Nake Shaitani agĩkiuma hau ũthiũ-inĩ wa Jehova.
• 13. Na gũgĩkinya atĩrĩ, mũthenya ũmwe rĩrĩa ariũ ake na airĩtu ake maakorirũo makĩrĩa na makĩnyua ndibei nyũmba ya ũrĩa mũkũrũ wao,
• 14. atĩ gũgĩũka mũkinyia-mbu, agĩkora Ayubu, akĩmwĩra atĩrĩ, Ndegwa-rĩ, ikorirũo ikĩenja na mĩraũ, nacio ndigiri ii ho ikĩrĩa hakuhĩ nacio,
• 15. Asabea maaciharũka, maataha; nacio ndungata-rĩ, nĩ kũũraga maciũragĩte na ũũgĩ wa rũhiũ; no niĩ nyiki ndahonoka ndagĩũka gũkũrehere ũhoro.
• 16. O hĩndĩ ĩo ataananina kwaria, hagĩũka mũndũ ũngĩ, akiuga, Mwaki wa Ngai nĩwagũa uumĩte igũrũ, wacina ng’ondu, o na ndungata, wanina buru! no niĩ nyiki ndahonoka ndagĩũka gũkũrehere ũhoro.
• 17. O kahinda o kau ũcio ataananina kwaria, hagĩũka mũndũ ũngĩ, akiuga, Akalidei meũmba mbũtũ ithatũ, maatharĩkĩra ngamĩra, maataha, nacio ndungata maaciũraga na ũũgĩ wa rũhiũ; no niĩ nyiki ndahonoka ndagĩũka gũkũrehere ũhoro.
• 18. Ningĩ kahinda o kau, hagĩũka o ũngĩ, akiuga atĩrĩ, Ariũ aku na airĩtu aku nĩ kũrĩa mekũrĩaga makĩnyuaga ndibei nyũmba ya ũrĩa mũkũrũ wao,
• 19. na rĩrĩ, hĩndĩ ĩo gwoka rũhuho rũnene rũoima na werũ-inĩ, rũahũra nyũmba ĩo ituri ciayo o ciothe cio inya, nayo yagũĩra ciana, na nĩciakua; no niĩ nyiki ndahonoka ndagĩũka gũkũrehere ũhoro.
• 20. Hĩndĩ ĩo Ayubu agĩũkĩra, agĩtehũranga nguo yake ya igũrũ, ningĩ akĩenjwo mũtwe, agĩcoka akĩĩgũithia thĩ, akĩinamĩrĩra Ngai,
• 21. akiuga atĩrĩ, Ndoimire nda ya maitũ ndĩ ũtheri, na ngacoka kuo o ũguo ndĩ ũtheri: nĩ Jehova waheanire, na nĩ Jehova wacokera; rĩĩtwa rĩa Jehova rĩrogathwo!
• 22. Thĩinĩ wa maũndũ macio mothe Ayubu ndaigana kũhĩtia, kana akĩona ta Ngai ekĩte ũndũ ũtaagĩrĩire.

Home