Go Back

Esiteri Chapter 8

• 1. Na rĩrĩ, mũthenya o ro ũcio, Ahasuerusu, mũthamaki, agĩkĩhe Esiteri, mũtumia wake, nyũmba ya Hamani, thũ ĩo ya Ayahudi. Nake Moridekai agĩthiĩ akĩrũgama mbere ya mũthamaki, nĩ ũndũ Esiteri nĩaamwĩrire ũrĩa matarainie.
• 2. Nake mũthamaki akĩruta gĩcũhĩ gĩake kĩrĩa aacokerire Hamani, agĩkĩhe Moridekai. Nake Esiteri agĩtua Moridekai mũnene wa nyũmba ya Hamani.
• 3. Ningĩ Esiteri agĩkĩaria rĩngĩ arĩ mbere ya mũthamaki, akĩmũgũĩra thĩ o magũrũ-inĩ make, akĩmũthaitha akĩrĩraga maithori atĩ eherie ũndũ ũcio wa rũtũrĩko wekĩtwo nĩ Hamani, Mũagagi, O na ũhoro ũcio wake wa wara ekĩte wa gũũkĩrĩra Ayahudi.
• 4. Hĩndĩ ĩo mũthamaki agĩgĩtambũrũkĩria Esiteri rũthanju rũake rũa ũnene rũa thahabu. Na tondũ ũcio Esiteri akĩarahũka, akĩrũgama hau mbere ya mũthamaki,
• 5. akiuga atĩrĩ, Kũngĩkorũo wee, mũthamaki wakwa, nĩũkuona arĩ wega, o na niĩ ngorũo njĩtĩkĩrĩkĩte nĩwe, o naguo ũadũ ũcio wonwo wagĩrĩire mbere yaku, wee, mũthamaki ũyũ, na niĩ nyonwo njagĩrĩire na maitho maku-rĩ, ndagũthaitha ũreke haandĩkwo marũa ma gũthahia macio maandĩkithĩtio nĩ Hamani, mũrũ wa Hamedatha, Mũagagi, na wara, o macio aandĩkithĩtie ma kũninithia Ayahudi arĩa marĩ mabũrũri mothe marĩa maathagwo nĩwe, mũthamaki ũyũ;
• 6. nĩ ũndũ-rĩ, kaĩ ingĩkĩhota gũkirĩrĩria atĩa ngĩonaga ũũru ũrĩa ũgũkora andũ akwa? O na kana ’hote atĩa gũkirĩrĩria ngĩonaga andũ aitũ makĩninwo?
• 7. Hĩndĩ ĩo Ahasuerusu, mũthamaki, agĩkĩĩra Esiteri mũtumia wake, o na Moridekai ũcio Mũyahudi, ũũ: Atĩrĩrĩ, nĩ’heete Esiteri nyũmba ya Hamani; nake mũndũ ũcio nĩarĩkĩtie gũcuurio mũtĩ igũrũ, nĩ ũndũ wa ũrĩa endete kũninithia Ayahudi.
• 8. Rĩu o na inyuĩ andĩkĩrai Ayahudi marũa mũmere ũrĩa mũkwenda, mũmekĩre thaĩri yakwa, niĩ mũthamaki wanyu, mũcoke mũmacinĩrĩre rũũri rũa gĩcũhĩ gĩakwa; nĩ ũndũ marũa marĩa maandĩkĩtwo magekĩrũo thaĩri ya mũthamaki, magacinĩrĩrũo rũũri rũa gĩcũhĩ gĩake, matirĩ mũndũ ũngĩhota kũmathahia.
• 9. Narĩo ihinda rĩu aandĩki-marũa a mũthamaki magĩĩtwo, o mweri wa ĩtatũ, naguo mweri ũcio nĩguo wetagwo Sivani, mũthenya wa mĩrongo ĩĩrĩ na ĩtatũ waguo; naguo ũhoro ũrĩa waandĩkirũo marũa-inĩ macio warĩ wa kũmenyithania maũndũ mothe marĩa Moridekai aathanire mekwo nĩ Ayahudi, o na abarũthi arĩa anene o na anyinyi, o na anene arĩa angĩ a mabũrũri marĩa maathagwo nĩ mũthamaki wao, marutĩrĩirio kwa Ahĩndĩ o nginya Kushi; namo maarĩ mabũrũri igana rĩa mĩrongo ĩĩrĩ na mũgwanja magĩtarũo; o bũrũri ũkĩandĩkĩrũo o ta ũrĩa mwandĩkĩre waguo ũtariĩ, naruo o rũrĩrĩ o ta ũrĩa mwarĩrie waruo watariĩ, o nao Ayahudi makĩandĩkĩrũo o ta ũrĩa mwandĩkĩre wao watariĩ, o na ta ũrĩa mwarĩrie wao watariĩ.
• 10. Nake akĩandĩkithia marũa macio, akĩmekĩra thaĩri ya Ahasuerusu, mũthamaki, agĩcoka akĩmacinĩrĩra rũũri rũa gĩcũhĩ kĩa mũthamaki; thutha wa ũguo akĩmatwarithia na atwari-marũa mahaicĩte mbarathi iria irĩ ihenya, o iria ciahaicagwo cia kũruta wĩra wa mũthamaki, nacio ciaciarĩtwo nĩ mbarathi cia mũthamaki.
• 11. Na rĩrĩ, marũa macio maandĩkĩtwo ma kũmenyithania atĩ mũthamaki nĩetĩkĩrĩte Ayahudi arĩa me matũũra mothe, o itũũra, mecokanĩrĩrie, nĩguo merũĩrĩre mehonokie mĩoyo yao; nao manine, na morage, o na mahukie o kũhukia, andũ othe a bũrũri o na ũrĩkũ, o na a rũrĩrĩ o na rũrĩkũ, arĩa meĩkĩrĩte hinya nĩguo mamatharĩkĩre mameke ũũru, o na kana twana twao o na atumia ao, o na mamatahe indo ciao marigie nacio,
• 12. mũthenya o ro ũmwe, mabũrũri mothe ma Ahasuerusu, mũthamaki, naguo nĩ mũthenya wa ikũmi na ĩtatũ wa mweri wa ikũmi na ĩĩrĩ, naguo nĩguo wĩtagwo Adari.
• 13. Nayo kobi ya marũa macio ĩkĩhunjĩrio ndũrĩrĩ ciothe, ta arĩ watho iheetwo wa kũrũmĩrĩrũo, nakuo gũkĩĩranwo atĩ Ayahudi magaikara methagathagĩte merũĩrĩre rĩrĩa mũthenya ũcio ũgakinya, nĩguo merĩhĩrie harĩ thũ ciao.
• 14. Na tondũ ũcio atwari-marũa arĩa maahaicaga mbarathi iria irĩ ihenya mũno, o icio ciarĩ cia kũruta wĩra wa mũthamaki, makĩgwata gũthiĩ, nao magĩkorũo marĩ ahĩkĩrĩrie mũno, o na makahatĩrĩrio, nĩ ũndũ wa ũrĩa gwaathanĩtwo nĩ mũthamaki; ningĩ ũhoro ũcio waathanĩtwo ũkĩheanwo mũciĩ wa mũthamaki o kũu Shushani.
• 15. Nake Moridekai akiuma he mũthamaki ehumbĩte nguo cia mũthamaki cia rangi wa bururu na rangi mwerũ, na arĩ na tanji nene ya thahabu mũtwe, o na akahumbwo nguo ĩrĩa ya igũrũ ndaya ya gatani ĩrĩa njega, ĩĩ na rangi wa zambarau; nao andũ a itũũra rĩu rĩa Shushani makiuga ngemi, na magĩkena.
• 16. Nao Ayahudi magĩikara matherete gĩthiithi, o na makagĩa na gĩkeno, o na makaigua wega, o na magatĩĩka.
• 17. Na gũgĩtuĩka atĩrĩ, atĩ mabũrũri mothe o bũrũri, na itũũra o itũũra, o kũndũ guothe kũrĩa watho ũcio wa mũthamaki wakinyire, o na ũhoro ũcio waathanĩtwo nĩwe wa kũrũmĩrũo-rĩ, Ayahudi magĩkena na makĩigua wega, magĩkĩruga maruga, o na magĩtinda makenete. O nao andũ aingĩ a mabũrũri macio makĩĩgarũra magĩĩtua Ayahudi, nĩ ũndũ nĩmaagwatirũo nĩ guoya nĩ gwĩtigĩra Ayahudi.

Home