Go Back

Esiteri Chapter 6

• 1. Na rĩrĩ, ũtukũ ũcio mũthamaki akĩũrũo nĩ toro, nake agĩkiuga atwarĩrũo ibuku rĩrĩa rĩaandĩkĩtwo maũndũ ma mahinda macio, nake agĩthomerũo maũndũ marĩo.
• 2. Hakĩonwo haandĩkĩtwo thĩinĩ warĩo atĩ Moridekai nĩwe woimbũrire ũhoro wa Bigithani na Tereshu, o andũ acio maacarĩtie njĩra ya kũũraga Ahasuerusu, mũthamaki, nao erĩ maarĩ a thiritũ ya arĩa mehokeirũo maũndũ ma nyũmba ya mũthamaki, thĩinĩ wa arĩa maaikaragia mũrango.
• 3. Nake mũthamaki agĩkĩũria atĩrĩ, Ĩ Moridekai ũcio aaheirũo gĩtĩo kĩrĩkũ, o na kana ũnene, nĩ ũndũ wa ũndũ ũcio ekire? Hĩndĩ ĩo ndungata cia mũthamaki iria ciamũtungatagĩra ikiuga atĩrĩ, Hatirĩ ũndũ o na ũmwe ekirũo.
• 4. Nake mũthamaki agĩkĩũria atĩrĩ, Nũ wĩ nja? Nake Hamani agĩkorũo nĩ hĩndĩ aatonya nja ĩrĩa ya nyumĩrĩra ya na nja ya nyũmba ya mũthamaki, nĩguo akaarie na mũthamaki ũhoro wa gũcuuria Moridekai mũtĩ igũrũ ũcio aathondekithĩtie nĩ ũndũ wake.
• 5. Nacio ndungata cia mũthamaki ikĩmwĩra ũũ: Atĩrĩrĩ, nĩ Hamani ũrũgamĩte nja. Nake mũthamaki agĩkiuga atĩrĩ, Mwĩrei atonye.
• 6. Tondũ ũcio Hamani agĩgĩtonya. Nake mũthamaki akĩmũũria ũũ: Mũndũ ũrĩa mũthamaki endete gũtĩithia-rĩ, nĩ atĩa angĩĩkwo? Hĩndĩ ĩo Hamani akĩĩũria na ngoro atĩrĩ, Nĩ mũndũ ũrĩkũ ũngĩ hihi mũthamaki angĩenda gũtĩithia tiga o niĩ?
• 7. Nake Hamani agĩkĩĩra mũthamaki atĩrĩ, Ha ũhoro wa mũndũ ũrĩa mũthamaki endaga gũtĩithia-rĩ,
• 8. nĩ wega nguo cia mũthamaki iria wee, mũthamaki witũ, ũmenyerete kwĩhumba, igĩĩrũo, o nayo mbarathi ĩrĩa ũhaicaga, o ĩo ĩĩkagĩrũo tanji ya ũnene mũtwe, ĩgĩĩrũo;
• 9. nacio nguo icio, o na mbarathi ĩo, itwarũo, ineo mũndũ ũmwe wa anene aku, ũrĩa mũtĩĩku mũno, nĩ getha mũndũ ũcio ũkwenda gũtĩithia, wee mũthamaki witũ, ahumbwo nguo icio nĩwe, acoke agaceerio njĩra-inĩ ya itũũra, ahaicĩtio igũrũ rĩa mbarathi ĩo; naguo ũhoro wanĩrĩrũo nĩ mũndũ e mbere yake, kuugwo ũũ: Atĩrĩrĩ, ũũ nĩguo mũndũ ũrĩa mũthamaki endete gũtĩithia ekagwo.
• 10. Hĩndĩ ĩo mũthamaki agĩkĩĩra Hamani atĩrĩ, Thiĩ narua, woe nguo icio, o na mbarathi ĩo, o ta ũguo uugĩte, ũcoke wĩke Moridekai, ũcio Mũyahudi ũrĩa ũikaraga kĩhingo-inĩ kĩa nyũmba ya mũthamaki, maũndũ macio. Menya ũreke ũndũ o na ũmwe wa maũndũ macio mothe uugĩte wage gwĩkwo.
• 11. Hĩndĩ ĩo Hamani agĩkĩoya nguo icio, agĩcihumba Moridekai, agĩcoka akĩoya mbarathi ĩo, akĩmũgereria njĩra-inĩ ya itũũra aceerangio kuo amĩhaicĩte, akĩanĩrĩra arĩ mbere yake ũũ: Atĩrĩrĩ, ũũ nĩguo mũndũ ũrĩa mũthamaki endaga gũtĩithia ekagwo.
• 12. Nake Moridekai agĩgĩcoka o kĩhingo-inĩ kĩa nyũmba ya mũthamaki. No Hamani akĩinũka gwake mũciĩ na ihenya, e na kĩeha, na akehumba mũtwe.
• 13. Nake Hamani agĩkĩhe Zereshu, mũka, o na arata ake othe, ũhoro wa maũndũ mothe marĩa maamũkorete. Hĩndĩ ĩo andũ ake arĩa ogĩ, o na Zereshu, mũka, makĩmwĩra atĩrĩ, Kũngĩkorũo Moridekai, ũcio waambĩrĩria gũgũtoria, nĩ wa mbeũ ya Ayahudi-rĩ, ndũmũhoota; no ndarĩ hingo ategũgũtoria biũ.
• 14. Na rĩrĩ, o ihinda rĩu maaragia nake-rĩ, andũ amwe arĩa mehokeirũo maũndũ ma nyũmba ya mũthamaki magĩkinya harĩ Hamani, makamũtware na ihenya iruga-inĩ rĩrĩa Esiteri aarugithĩtie.

Home