Go Back

Esiteri Chapter 3

1. Na rĩrĩ, thutha wa maũndũ macio Ahasuerusu, mũthamaki, agĩtũũgĩria Hamani, mũrũ wa Hamedatha, Mũagagi, akĩmũnenehia, nakĩo gĩtĩ gĩake agĩkĩigithia mbere ya itĩ cia anene arĩa angĩ othe arĩa maaikaranagia nake.
2. Nacio ndungata ciothe cia mũthamaki, iria ciarĩ kũu kĩhingo-inĩ kĩa mũciĩ wa mũthamaki, ciainamagĩrĩra ĩkamwĩnyihĩria; nĩ ũndũ ũguo nĩguo gwaathanĩtwo nĩ mũthamaki ũhoro-inĩ wa Hamani. No rĩrĩ, Moridekai ndaigana kũinamĩrĩra kana akĩmwĩnyihĩria.
3. Hĩndĩ ĩo ndungata cia mũthamaki iria ciaikaraga kĩhingo-inĩ kĩa mũciĩ wa mũthamaki ikĩũria Moridekai ũũ: Atĩrĩrĩ, nĩ kĩ gĩtũmĩte ũrege gwĩka ũrĩa gwathanĩtwo nĩ mũthamaki?
4. Na gũgĩkinya atĩrĩ, atĩ hĩndĩ ĩrĩa ciatũire imwaragĩria ũguo o mũthenya, o akĩregaga gũciigua-rĩ, igĩgĩcoka ikĩhe Hamani ũhoro ũcio, nĩ getha imenye kana hihi ũndũ ũcio Moridekai ekaga wahota gũikara ũtekũũrio; nĩ ũndũ Moridekai nĩaaciĩrĩte atĩ nĩ Mũyahudi.
5. Na rĩrĩ, Hamani ona atĩ Moridekai ndekũmũinamĩrĩra o na kana akamwĩnyihĩria-rĩ, agĩgĩtũkũyana mũno.
6. No agĩĩciria atĩ kũnyitithia Moridekai wiki gũtingĩmũguna, tondũ ndungata icio nĩciakorirũo imũmenyithĩtie rũrĩrĩ rũa aa Moridekai: na tondũ ũcio Hamani agĩgĩcaria njĩra ya kũninithia Ayahudi othe arĩa maarĩ mabũrũri mothe marĩa maathagwo nĩ Ahasuerusu, o rũrĩrĩ rũu ruothe rũa aa Moridekai.
7. Naguo mweri wa mbere, o ũcio wetagwo Nisani, wa mwaka wa ikũmi na ĩĩrĩ ĩrĩa Ahasuerusu aakorirũo athamakĩte-rĩ, Hamani agĩcukithĩria ’Puri’ harĩ we, naguo ũguo nĩ ta kuuga agĩcukithia mĩtĩ ya mũthenya o mũthenya, o na mweri o mweri, o nginya mweri wa ikũmi na ĩĩrĩ, naguo nĩguo Adari, ũkĩgũĩrũo nĩyo.
8. Nake Hamani agĩkĩĩra Ahasuerusu mũthamaki atĩrĩ, Nĩkũrĩ rũrĩrĩ rũmwe rũharaganĩirie thĩinĩ wa andũ aku arĩa matũũraga mabũrũri mothe marĩa ũthamakaga, naruo rũikaraga rũĩamũrĩte, o namo mawatho maruo, ma maũndũ marĩa rũĩkaga, nĩmaraihanĩrĩirie na ma andũ arĩa angĩ othe; na ningĩ andũ acio matimenyagĩrĩra mawatho maku, wee mũthamaki witũ; tondũ ũcio, wee mũthamaki witũ, ndwagĩrĩirũo nĩ kũreka maikare o ro ũguo.
9. Nawe, mũthamaki witũ, ũngĩona arĩ wega-rĩ, reke ũhoro wandĩkwo atĩ andũ acio maninwo; na niĩ nĩngũruta taranda ngiri ikũmi cia betha, ciigwo moko-inĩ ma andũ arĩa makũroragĩra indo ciaku, wee mũthamaki witũ, nĩ getha ikaigwo kũndũ kũrĩa kũigagwo mũthithũ wa indo ciaku cia bata, wee mũthamaki witũ.
10. Nake mũthamaki agĩkĩruta gĩcũhĩ gĩake guoko, agĩkĩnengera Hamani, mũrũ wa Hamedatha, Mũagagi, ũcio thũ ya Ayahudi.
11. Ningi mũthamaki akĩĩra Hamani atĩrĩ, Ikara o na betha icio wagweta; o nao andũ acio-rĩ, meke o ta ũrĩa ũrĩona kwagĩrĩire.
12. Hĩndĩ ĩo aandĩki-marũa a mũthamaki magĩĩtwo, o mweri ũrĩa wa mbere, mũthenya wa ikũmi na ĩtatũ waguo, nakuo gũkĩandĩkwo marũa ma kũmenyithia abarũthi arĩa anene o na arĩa anyinyi arĩa maathaga mabũrũri mothe ma mũthamaki ũcio, o na aathani a ndũrĩrĩ ciothe ciamo, maũndũ maringaine na marĩa Hamani aathanire mekwo; namo marũa macio magĩtwarũo o bũrũri, maandĩkĩtwo o ta ũrĩa mwandĩkĩre waguo watariĩ, o na ndũrĩrĩ-inĩ ciothe, o rũrĩrĩ na ciugo cia mwarĩrie waruo kĩũmbe; naguo ũhoro ũrĩa waandĩkĩtwo marũa-inĩ macio ũgĩĩkĩrũo thaĩri ya Ahasuerusu, mũthamaki, naguo ũgĩcinĩrĩrũo rũũri rũa gĩcũhĩ gĩake.
13. Ũguo nĩguo marũa maatwarirũo nĩ atwari-marũa mabũrũri mothe ma mũthamaki ũcio, maandĩkĩtwo atĩrĩ, atĩ Ayahudi moragwo maninwo biũ, mahukio o kũhukio, arĩa ethĩ na arĩa akũrũ, na twana tũnini, o na andũ-a-nja, mũthenya o ro ũmwe; naguo mũthenya ũrĩa wathurirũo warĩ mũthenya wa ikũmi na ĩtatũ wa mweri wa ikũmi na ĩĩrĩ, o ũcio wĩtagwo Adari; o na ningĩ marũa macio makoiga atĩ Ayahudi magatahwo indo ciao ithio nacio.
14. Nayo kobi ya marũa macio ĩkĩhunjĩrio ndũrĩrĩ ciothe, nĩguo watho ũcio waathanĩtwo ũtuĩke wa kũrũmĩrĩrũo nĩcio, ikĩĩrũo igaikara ciĩthagathagĩte nĩ ũndũ wa mũthenya ũcio.
15. Nao andũ acio atwari-marũa makiuma magĩthiĩ narua nĩ ũndũ wa ũrĩa maathĩtwo nĩ mũthamaki, ningĩ watho ũcio wa kũrũmĩrĩrũo ũkĩheanwo mũciĩ wa mũthamaki o kũu Shushani; nake mũthamaki me na Hamani magĩikara thĩ manyue njohi; no rĩrĩ, arĩa maatũire itũũra rĩa Shushani magĩikara marigĩtwo mũno nĩ ũhoro ũcio.

Home