Go Back

Nehemia Chapter 2

• 1. Na gũgĩkinya atĩrĩ, atĩ mweri wa Nisani, mwaka wa mĩrongo ĩĩrĩ ĩrĩa Aritashashita aakorirũo athamakĩte, o hĩndĩ ĩrĩa ndibei yarĩ harĩ we-rĩ, ngĩkĩoya ndibei ĩo, ngĩnengera mũthamaki. Na rĩrĩ, mbere ya hĩndĩ ĩo hatiarĩ hĩndĩ ndanatuka gĩthiithi ndĩ harĩ we.
• 2. Nake mũthamaki agĩkĩnjũria atĩrĩ, Ũtukĩte gĩthiithi nĩkĩ, na ndũkĩrĩ mũrũaru? Nĩngũmenya atĩ ũndũ ũcio ndũngĩoneka tiga o mũndũ akorirũo e na kĩeha ngoro. Hĩndĩ ĩo ngĩgĩĩtigĩra mũno mũno.
• 3. Ngĩkĩĩra mũthamaki atĩrĩ, Mũthamaki wakwa, ũrotũũra tene na tene; kaĩ gĩthiithi gĩakwa kĩngĩkĩaga gũtuka nĩ ũndũ kĩ, kuona atĩ itũũra riitũ, o kũndũ kũrĩa mbĩrĩra cia aa baba irĩ, nĩ ikiru ihooru, o na ihingo ciarĩo igacinwo na mwaki, ikaninwo biũ?
• 4. Nake mũthamaki agĩkĩnjũria atĩrĩ, Ũndũ ũrĩa ũgũkĩenda kũ’hoya nĩ ũrĩkũ? Tondũ ũcio ngĩhoya Ngai wa igũrũ.
• 5. Ngĩcoka ngĩĩra mũthamaki atĩrĩ, Ũngĩkorũo nĩũkuona arĩ wega, mũthamaki ũyũ, na niĩ, ndungata yaku njĩtĩkĩrĩke nĩwe-rĩ, ndekia ’thiĩ Juda, nginye itũũra rĩrĩa rĩrĩ mbĩrĩra cia aa baba, nĩguo ngarĩake.
• 6. Nake mũthamaki akĩnjũria atĩrĩ, (na mũtumia wa mũthamaki agĩkorũo aikarĩte o hau hakuhĩ nake,) Rũgendo rũu rũaku nĩ rũa matukũ maigana? Na ũgagĩcoka rĩ? Mũthamaki agĩkĩona atĩ nĩ wega andekie, ’thiĩ; na niĩ ngĩmwĩra ihinda rĩrĩa ngacoka.
• 7. O na ningĩ ngĩĩra mũthamaki ũũ: Atĩrĩrĩ, ũngĩkorũo nĩũkuona arĩ wega, wee mũthamaki ũyũ-rĩ, reka ’heo marũa ndwarĩre abarũthi arĩa me mũrĩmo ũcio ũngĩ wa rũũĩ rũa Farati, nĩ getha mareke ’hĩtũke o nginya nginye Juda;
• 8. o na ũ’he marũa ma gũtwarĩra Asafu, mũnene wa kĩrĩti kĩa mũthamaki, nĩ getha a’he mĩtĩ, ’thondeke hingĩro cia mĩrango ya nyũmba ĩrĩa yakĩtwo na hinya ĩrĩa ĩgwataine na nyũmba ya Jehova, o na ũndũ wa rũthingo rũa itũũra rĩu, o na ũndũ wa nyũmba ĩrĩa ngatonya ndũũre. Nake mũthamaki akĩnjĩtĩkĩria, nĩ ũndũ wa ũrĩa Ngai wakwa aarĩ hamwe na niĩ andeithie.
• 9. Hĩndĩ ĩo ngĩgĩthiĩ ngĩkinya harĩ abarũthi arĩa maarĩ mũrĩmo ũcio ũngĩ wa rũũĩ rũu, ngĩmane marũa ma mũthamaki. Nake mũthamaki ũcio agĩkorũo nĩaa’heete anene amwe a mbũtũ cia ita, o na andũ arĩa mathiaga mahaicĩte mbarathi, tũthiĩ nao.
• 10. Na rĩrĩ, hĩndĩ ĩrĩa Sanibalati Mũhoroni, na Tobia Mũamoni, ndungata yake, maaiguire ũhoro ũcio, makĩigua ũũru mũno nĩ ũndũ atĩ he mũndũ ũũkĩte gũcaria ũhoro wa kũguna ciana cia Isiraeli.
• 11. Tondũ ũcio ngĩkinya Jerusalemu; na ndanina mĩthenya ĩtatũ kuo,
• 12. ngĩcoka ngĩũkĩra ũtukũ, niĩ mwene twĩ na andũ matarĩ aingĩ; na ndiigana kwĩra mũndũ o na ũmwe maũndũ marĩa Ngai wakwa aanjĩkĩrĩte ngoro-inĩ yakwa njĩke nĩ ũndũ wa Jerusalemu; na ndiarĩ na nyamũ o na ĩmwe ĩngĩ tiga o ĩrĩa ndahaicĩte.
• 13. Ngĩkiuma ũtukũ, ngiumĩra Kĩhingo gĩa Kĩanda, ndorete gĩthima-inĩ kĩrĩa gĩĩtagwo Gĩthima kĩa Ndamathia, o na Kĩhingo gĩa Kĩara-inĩ, ngĩbara thingo cia Jerusalemu iria ciatharũkĩte, na mĩrango yarĩo ĩrĩa yahĩĩte nĩ mwaki.
• 14. Hĩndĩ ĩo ngĩthiathia ngĩkinya Kĩhingo-inĩ gĩa Gĩthima, o na Karia-inĩ ka Mũthamaki; no rĩrĩ, hatiarĩ handũ ha kũhĩtũkĩria nyamũ ĩrĩa yanguuĩte.
• 15. Thutha wa ũguo ngĩkĩambata kũrĩ o ũtukũ, ndĩĩgiritanĩtie na karũũĩ, ngĩbaraga rũthingo rũa itũũra rĩu; ngĩcoka ngĩhũndũka ngĩtonyera Kĩhingo-inĩ gĩa Kĩanda, ngĩgĩcoka itũũra-inĩ.
• 16. Nao aathani akuo matiamenyire na kũrĩa ’thiĩte, kana ũrĩa njĩkĩte; o na kana ngĩĩra Ayahudi ũhoro ũcio, kana athĩnjĩri-Ngai, o na kana andũ arĩa anene, kana aathani a Ayahudi, o na kana andũ arĩa angĩ ndendete marute wĩra.
• 17. Hĩndĩ ĩo ngĩkĩmera atĩrĩ, Nĩmũkuona ũrĩa ũhoro ũyũ twĩ naguo wĩ mũũru, wa atĩ itũũra rĩa Jerusalemu nĩ rĩkiru ihooru, o nacio ihingo ciarĩo igacinwo na mwaki; ũkai tũgacokererie rũthingo rũa Jerusalemu, nĩ getha tũtigacoke kũmenwo.
• 18. Ngĩcoka ngĩmahe ũhoro wa ũrĩa Ngai wakwa arĩ hamwe na niĩ andeithie, o na ngĩmahe ũhoro wa ciugo iria mũthamaki aanjĩrire. Nao magĩkiuga atĩrĩ, Nĩtũgĩũkĩrei twake. Tondũ ũcio magĩkĩĩĩkĩra hinya marute wĩra ũcio mwega.
• 19. No rĩrĩ, hĩndĩ ĩrĩa Sanibalati Mũhoroni, na Tobia Mũamoni, ndungata yake, o na Geshemu Mũarabu, maaiguire ũhoro ũcio, magĩtũthekerera nĩ gũtũnyarara, o na magĩtũmena, magĩtũũria atĩrĩ, Ĩ ũndũ ũyũ mũreka nĩ ũrĩkũ? Kaĩ mũkwenda kũrema mũthamaki mũmũũkĩrĩre?
• 20. Hĩndĩ ĩo ngĩmacokeria, ngĩmera atĩrĩ, Ngai wa igũrũ nĩwe ũgatũma tũgaacĩre; na tondũ ũcio ithuĩ, ndungata ciake, nĩtũgũũkĩra twake; no rĩrĩ, inyuĩ mũtirĩ ho o na hanini ũhoro-inĩ ũyũ twĩ naguo gũkũ Jerusalemu, o na kana mũkagĩa kĩhooto gĩa gũtonya maũndũ-inĩ makuo, o na kana mũkagĩa ũndũ o na ũrĩkũ wa gũtũma mũririkanwo gũkũ Jerusalemu.

Home