Go Back

Ezara Chapter 8

• 1. Na rĩrĩ, aya nĩo atongoria a nyũmba cia maithe ma andũ acio, naruo rũrũ nĩruo rũciaro rũa andũ arĩa maambatanirie na niĩ moimĩte Babuloni, rĩrĩa Aritashashita aarĩ mũthamaki kuo.
• 2. Thĩinĩ wa ariũ a Finehasi, nĩ Gerishoni; na thĩinĩ wa ariũ a Ithamaru, nĩ Danieli; na thĩinĩ wa ariũ a Daudi, nĩ Hatushu.
• 3. Ningĩ thĩinĩ wa ariũ a Shekania; wa ariũ a Paroshu, nĩ Zekaria; na nĩkwarĩ arũme igana rĩa mĩrongo ĩtano maataranĩirio nake o ta ũrĩa marũa ma njiaro ciao maatariĩ.
• 4. Thĩinĩ wa ariũ a Pahathu-moabi, nĩ Eliehoenai wa Zerahia; na nĩkwarĩ arũme angĩ magana merĩ hamwe nake.
• 5. Thĩinĩ wa ariũ a Shekania, nĩ mũrũ wa Jahazieli, na nĩkwarĩ arũme angĩ magana matatũ hamwe nake.
• 6. Na thĩinĩ wa ariũ a Adina, nĩ Ebedi wa Jonathani; na nĩkwarĩ arũme mĩrongo ĩtano hamwe nake.
• 7. Ningĩ thĩinĩ wa ariũ a Elamu, nĩ Jeshaia wa Athalia; na nĩkwarĩ arũme mĩrongo mũgwanja hamwe nake.
• 8. Thĩinĩ wa ariũ a Shefatia, nĩ Zebadia wa Mikaeli; na nĩkwarĩ arũme mĩrongo ĩnana hamwe nake.
• 9. Thĩinĩ wa ariũ a Joabu, nĩ Obadia wa Jehieli; na nĩkwarĩ arũme magana merĩ na ikũmi na anana hamwe nake.
• 10. Thĩinĩ wa ariũ a Shelomithu, nĩ mũrũ wa Josifia; na nĩkwarĩ arũme angĩ igana rĩa mĩrongo ĩtandatũ hamwe nake.
• 11. Ningĩ thĩinĩ wa ariũ a Bebai, nĩ Zekaria wa Bebai; na nĩkwarĩ arũme angĩ mĩrongo ĩĩrĩ na anana hamwe nake.
• 12. Thĩinĩ wa ariũ a Azigadi, nĩ Johanani wa Hakatani; na nĩkwarĩ arũme angĩ igana na ikũmi hamwe nake.
• 13. Thĩinĩ wa ariũ a Adonikamu, na nĩo mokire thutha, marĩĩtwa mao nĩmo maya, Elifeleti, na Jeueli, na Shemaia; na nĩkwarĩ arũme angĩ mĩrongo ĩtandatũ hamwe nao.
• 14. Na thĩinĩ wa ariũ a Bigivai, nĩ Uthai na Zabudu; na nĩkwarĩ arũme angĩ mĩrongo mũgwanja hamwe nao.
• 15. Nao andũ acio-rĩ, ngĩmacokanĩrĩria hamwe o kũu rũũĩ-inĩ rũrĩa rũthererete rũgakinya Ahava; kũu nĩkuo twaambire hema ciitũ tũgĩikara kuo mĩthenya ĩtatũ; thutha wa ũguo ngĩthũrima andũ, o na athĩnjĩri-Ngai, na ndiigana kuona mũndũ o na ũmwe wa ariũ a Lawii.
• 16. Ngĩkĩrekia mũndũ agete Eliezeri, na Arieli, na Shemaia, na Elinathani, na Jaribu, na Elinathani, na Nathani, na Zekaria, na Meshulamu, arĩa maarĩ anene; o na ngĩĩtithia Joiaribu, na Elinathani, arĩa maarĩ arutani.
• 17. Ngĩcoka ngĩmatũma mathiĩ kwĩ Ido, ũrĩa mũnene watũire kũrĩa gwĩtagwo Kasifia, na ngĩkĩmera ũrĩa megũthiĩ kwĩra Ido, o na ariũ a ithe arĩa Anethini, kũu gwĩtagwo Kasifia, naguo nĩ atĩ matũrehithĩrie atungati a gũtungata nyũmba ya Ngai witũ.
• 18. Na tondũ wa ũrĩa Ngai witũ aarĩ hamwe na ithuĩ atũteithie-rĩ, andũ acio magĩtũrehithĩrie mũndũ ũmwe wa ariũ a Mahali, mũrũ wa Lawii wa Isiraeli, warĩ na ũhoti wa kũbarĩrĩra wega maũndũ, nake nĩ Sherebia, arĩ hamwe na ariũ ake o na ariũ a ithe, nao maarĩ ikũmi na anana,
• 19. o na Hashabia, na hamwe nake gũkĩgĩa Jeshaia, wa ariũ a Merari, na ariũ a ithe, na ariũ ao, andũ mĩrongo ĩĩrĩ;
• 20. o na thĩinĩ wa Anethini, arĩa Daudi o na anene ake maaheanĩte matuĩke a gũtungatĩra Alawii, gũkĩgĩa Anethini magana merĩ ma mĩrongo ĩĩrĩ; nao othe nĩmaandĩkĩtwo marĩĩtwa mao.
• 21. Hĩndĩ ĩo ngĩhunjanĩria ũhoro atĩ andũ mehinge kũrĩa irio, kũu gũkuhĩ na rũũĩ rũu rũa Ahava, nĩguo twĩnyihĩrie mbere ya Ngai witũ, na tũmũrongorie nĩguo atũrũngĩrĩrie njĩra ithuene o na ciana ciitũ, o na indo ciitũ ciothe.
• 22. Nĩ ũndũ nĩndaconokire nĩ kũhoya mũthamaki gĩtungati gĩa athigari, o na kĩa andũ arĩa mathiaga mahaicĩte mbarathi, a gũtũteithia harĩ thũ ciitũ njĩra-inĩ, nĩ ũndũ nĩtwaarĩtie na mũthamaki, tũkamwĩra atĩ Ngai witũ e hamwe na andũ othe arĩa mamũrongoragia, nĩguo amateithie mone maũndũ mega; no hinya wake ũũkagĩrĩra andũ othe arĩa matiganaga nake, o na marakara make.
• 23. Tondũ ũcio tũgĩkĩĩhinga kũrĩa irio o ro ũguo, na tũgĩthaitha Ngai witũ atũteithie na ũndũ ũcio; nake agĩĩtĩkĩra kũigua gũthaithana gwitũ.
• 24. Hĩndĩ ĩo ngĩkĩamũra anene ikũmi a athĩnjĩri-Ngai, nao nĩo Sherebia, na Hashabia, o na andũ angĩ ikũmi a ariũ a ithe wao hamwe nao.
• 25. Ngĩcoka ngĩmathimĩra betha, o na thahabu, o na indo ingĩ, nacio nĩcio iria ciarutĩtwo cia wĩra wa nyũmba ya Ngai witũ, o iria mũthamaki, o na andũ ake arĩa mamũheaga kĩrĩra, o na anene ake, o na Aisiraeli othe arĩa maarĩ ho, maarutĩte,
• 26. ngĩkĩmathimĩra ngĩmane taranda magana matandatũ ma mĩrongo ĩtano cia betha, o na indo ithondeketwo na betha cia taranda igana rĩmwe, o na taranda igana rĩmwe cia thahabu,
• 27. o na mbakũri mĩrongo ĩĩrĩ cia thahabu ingiuma mbaũni ngiri ĩmwe, o na thani igĩrĩ cia gĩcango kĩrĩa kĩega gĩtheru mũno kĩĩ goro o ta thahabu.
• 28. Ngĩkĩmera atĩrĩ, Rĩu-rĩ, inyuĩ nĩmwamũrĩirũo Jehova, o nacio indo icio nĩ nyamũre, o nacio betha o na thahabu ici nĩcio indo iria irutĩirũo Jehova, Ngai wa maithe manyu, na ũndũ wa kwĩendera.
• 29. Ĩkaragai mwĩhũgĩte, mũcimenyerere, o nginya hĩndĩ ĩrĩa mũgacithimĩra mbere ya anene a athĩnjĩri-Ngai, o na Alawii, o na atongoria a nyũmba cia maithe ma andũ a Isiraeli, kũu Jerusalemu tũnyũmba-inĩ thĩinĩ twa nyũmba ya Jehova.
• 30. Ũguo nĩguo athĩnjĩri-Ngai o na Alawii maaiyũkĩrie indo icio cia betha na thahabu, o na indo iria ingĩ, o ta ũrĩa ciathimĩtwo, nĩguo macitware Jerusalemu o kũu nyũmba ya Ngai witũ.
• 31. Hĩndĩ ĩo tũgĩkiuma kũu rũũĩ-inĩ rũu rũa Ahava mũthenya wa ikũmi na ĩĩrĩ wa mweri wa mbere, nĩ getha tũthiĩ Jerusalemu; nake Ngai witũ aarĩ hamwe na ithuĩ atũteithie, nake agĩtũhonokia harĩ thũ ciitũ, o na harĩ andũ arĩa mangĩkorũo matuoheirie njĩra-inĩ.
• 32. Na twakinya Jerusalemu, tũgĩikara kuo mĩthenya ĩtatũ,
• 33. naguo mũthenya wa kana, betha na thahabu icio, o na indo icio ingĩ twokĩte nacio, igĩthimĩrũo kũu nyũmba ya Ngai witũ, ikĩigwo moko-inĩ ma Meremothu wa Uria, ũrĩa mũthĩnjĩri-Ngai; nake Eleazaru wa Finehasi aarĩ hamwe nake; o nao aa Jozabadu wa Jeshua, na Naodia wa Binui, Alawii, maarĩ hamwe nao;
• 34. nacio indo icio ciothe igĩtarũo na igĩthimwo, naguo ũhoro wa ũrĩa indo icio ciothe ciaiganire, ciathimwo, ũkĩandĩkwo ihinda o ro rĩu.
• 35. Nao andũ arĩa maatahĩtwo, o acio moimĩte bũrũri ũrĩa maatwarĩtwo-rĩ, makĩrutĩra Ngai wa Isiraeli ndegwa ikũmi na igĩrĩ nĩ ũndũ wa Aisiraeli othe, ituĩke mahaki ma njino; o na ndũrũme mĩrongo kenda na ithathatũ, na tũtũrũme mĩrongo mũgwanja na mũgwanja; ningĩ hakĩrutwo thenge ikũmi na igĩrĩ cia igongona rĩa mehia; nyamũ icio ciothe-rĩ, ciarĩ cia mahaki ma gũcinĩrũo Jehova.
• 36. Nao magĩgĩtwarĩra abarũthi arĩa anene o na arĩa anyinyi, arĩa maathanaga bũrũri ũrĩa wĩ mũrĩmo ũyũ wa rũũĩ rũa Farati, ũhoro wa maũndũ marĩa maathanĩtwo nĩ mũthamaki mekagwo nĩo; nao abarũthi acio magĩteithia andũ, nĩguo maũndũ ma nyũmba ya Ngai mathiĩ na mbere.

Home