Go Back

Ezara Chapter 7

• 1. Na rĩrĩ, maũndũ macio maathira, o hĩndĩ ĩrĩa Aritashashita mũthamaki wa Perisia aathamakaga, Ezara, mũrũ wa Seraia, wa Azaria, wa Hilikia,
• 2. wa Shalumu, wa Zadoku, wa Ahitubu,
• 3. wa Amaria, wa Azaria, wa Meraiothu,
• 4. wa Zerahia, wa Uzi, wa Buki,
• 5. wa Abishua, wa Finehasi, wa Eleazaru, wa Haruni, mũthĩnjĩri-Ngai ũrĩa mũnene,
• 6. Ezara ũcio nĩaambatire oimĩte Babuloni; nake aarĩ mwandĩki-marũa mũũgĩ mũno ũhoro-inĩ wa watho wa Musa, ũrĩa Jehova, Ngai wa Isiraeli, aaheanĩte; nake mũthamaki akĩmwĩtĩkĩrĩra ũndũ ũrĩa wothe aahoire harĩ we, nĩ ũndũ wa ũrĩa Jehova, Ngai wake, aarĩ hamwe nake amũteithie.
• 7. Nakuo gũgĩkĩambata andũ amwe a ciana cia Isiraeli, o na a athĩnjĩri-Ngai, o na a Alawii, o na a andũ arĩa maainaga nyĩmbo, o na a arĩa maaikaragia mĩrango, o na a Anethini, magĩthiĩ Jerusalemu mwaka wa mũgwanja ĩrĩa Aritashashita, mũthamaki, aakorirũo athamakĩte.
• 8. Nake Ezara agĩgĩkinya Jerusalemu mweri wa ĩtano wa mwaka wa mũgwanja ĩrĩa mũthamaki aakorirũo athamakĩte.
• 9. Nĩ gũkorũo mũthenya wa mbere wa mweri wa mbere nĩguo aambĩrĩirie kwambata oimĩte Babuloni, naguo mũthenya wa mbere wa mweri wa ĩtano nĩguo aakinyire Jerusalemu, nĩ ũndũ wa ũrĩa Ngai wake aarĩ hamwe nake amũteithie.
• 10. Nĩ ũndũ Ezara nĩaatuĩte na ngoro yake atĩ arongorie watho wa Jehova, o na awĩkage, o na arutanage irĩra cia watho wa kũrũmĩrĩrũo, o na matuĩro ma cira, thĩinĩ wa Isiraeli.
• 11. Na rĩrĩ, ĩno nĩyo kobi ya marũa marĩa Aritashashita, mũthamaki, aanengerire Ezara, ũcio mũthĩnjĩri-Ngai na mwandĩki-marũa, naguo ũguo nĩ ta kuuga mwandĩki mohoro ma maathani ma Jehova, o na irĩra cia watho wake wa kũrũmĩrĩrũo nĩ Isiraeli.
• 12. Nĩ niĩ, Aritashashita, mũthamaki wa athamaki, ndakwandĩkĩra marũa maya, wee Ezara, mũthĩnjĩri-Ngai, na mwandĩki wa watho wa Ngai ũrĩa wĩ igũrũ. Ũrogĩa na thayũ, (na ciugo ingĩ ta icio.)
• 13. Nĩ gwatha ngwathana atĩ Aisiraeli othe arĩa me gũkũ bũrũri ũyũ njathanaga, hamwe na athĩnjĩri-Ngai ao, o na Alawii, arĩa mangĩenda na ngoro ciao gũthiĩ Jerusalemu-rĩ, mathiĩ nawe;
• 14. nĩ ũndũ nĩũtũmĩtwo nĩ mũthamaki o na andũ ake mũgwanja arĩa mamũheaga kĩrĩra, nĩ getha ũgatuĩrie mohoro ma Juda na Jerusalemu, o ta ũrĩa watho wa Ngai waku, ũrĩa wĩ naguo guoko-inĩ gwaku, ũtariĩ;
• 15. o na ũkuue betha na thahabu, iria mũthamaki, o na andũ arĩa mamũheaga kĩrĩra, marutĩire Ngai wa Isiraeli, o we ũcio wĩ na gĩikaro gĩake kũu Jerusalemu,
• 16. hamwe na betha na thahabu ciothe iria ũkona bũrũri ũyũ wothe ũthamakagwo nĩ mũthamaki wa Babuloni, o na indo iria andũ o na athĩnjĩri-Ngai makaruta na ũndũ wa kwĩendera, o icio ikarutwo o ro ũguo na kwĩendera na ngoro ciao nĩ ũndũ wa nyũmba ya Ngai wao ĩrĩa ĩrĩ kũu Jerusalemu.
• 17. Nĩũgekĩra kĩyo mũno gĩa kũgũra ndegwa na mbia icio, o na ndũrũme, o na tũtũrũme, hamwe na igongona rĩacio rĩa mũtu, o na indo ciacio iria irutagwo cia kũnyuwo, nawe ũgacirutĩra o kũu igũrũ rĩa kĩgongona kĩa nyũmba ya Ngai waku, ĩo ĩrĩ Jerusalemu.
• 18. Na rĩrĩ, ũndũ ũrĩa wothe inyuĩ na ariũ a thoguo mũkona wagĩrĩire gwĩkwo na betha o na thahabu ĩrĩa ĩrĩtigara-rĩ, ĩkagai o ro ũguo nacio o ta ũrĩa Ngai wanyu agakorũo endete.
• 19. O nacio indo iria ũheetwo nĩ ũndũ wa wĩra wa nyũmba ya Ngai waku, nĩũgacitwara ũciige mbere ya Ngai wa Jerusalemu.
• 20. O na ningĩ atĩrĩ, kĩndũ kĩrĩa kĩngĩ gĩothe gĩkabatarania nĩ ũndũ wa nyũmba ya Ngai waku, o kĩrĩa ũkona atĩ no mũhaka kĩrutwo-rĩ, nĩũgakĩruta nyũmba ĩrĩa ĩigagwo mũthithũ wa indo cia bata cia mũthamaki.
• 21. Na rĩu niĩ, Aritashashita, mũthamaki wanyu, nĩndaathana ndera aigi mĩthithũ othe, o arĩa marĩ mũrĩmo ũrĩa ũngĩ wa rũũĩ rũa Farati, atĩrĩ, Ũndũ o wothe ũrĩa Ezara, mũthĩnjĩri-Ngai, na mwandĩki mohoro ma watho wa Ngai wa igũrũ, akabatario nĩguo harĩ inyuĩ, ũndũ ũcio nĩũgekwo na kĩyo mũno,
• 22. o na angĩkoiga kũrutwo taranda igana cia betha, o na kori igana cia ngano, o na bathi igana cia ndibei, o na bathi igana cia maguta, o na cumbĩ ũtekũgerũo ũrĩa ũigana.
• 23. Ũndũ ũrĩa wothe wathanĩtwo nĩ Ngai wa igũrũ-rĩ, nĩwĩkwo o ta ũrĩa ũtariĩ nĩ ũndũ wa nyũmba ya Ngai ũcio wa igũrũ kaĩ mabũrũri marĩa niĩ, mũthamaki wanyu ’thamakaga, o na ariũ akwa, mangĩgakorũo nĩ marakara ma Ngai nĩ ũndũ kĩ?
• 24. O na ningĩ nĩtũkũmwĩra o ma atĩ ũhoro wa mũndũ o na ũrĩkũ wa athĩnjĩri-Ngai, o na Alawii, o na aini nyĩmbo, o na aikaria mĩrango, o na Anethini, o na ndungata cia nyũmba ĩo ya Ngai, nĩ atĩ nĩatige gwĩtio mũhothi wa mũthamaki, kana igoti rĩa ndũire, o na kana rĩa njĩra, o na atĩa.
• 25. Naho ha ũhoro waku wee, Ezara-rĩ, thura andũ amwe o ta ũrĩa ũheetwo ũũgĩ nĩ Ngai waku, ũmatue aciri anyinyi, o na aciri anene, maciragĩre andũ othe arĩa marĩ mũrĩmo ũcio wa rũũĩ rũu, o arĩa moĩ mawatho ma Ngai waku; o nake mũndũ ũrĩa ũtamoĩ ũmũrute.
• 26. Na rĩrĩ, mũndũ o wothe ũrĩa ũkarega kũrũmĩrĩra watho wa Ngai waku, o na watho wa mũthamaki, nĩagatuĩrũo cira aherithio na kĩyo kĩnene, o na kũngĩtuĩka nĩ kũũragwo oragwo, o na kana arindũrũo bũrũri wao, o na kana atahwo indo ciake, o na kana ohwo korokoro-inĩ.
• 27. Nake Ezara akiuga atĩrĩ, Jehova, Ngai wa maithe maitũ, arogathwo, o we ũrĩa wekĩrire ũndũ ta ũcio ngoro-inĩ ya mũthamaki, atĩ ende kũgemia nyũmba ya Jehova ĩrĩa ĩrĩ Jerusalemu;
• 28. o na agĩtũma njiguĩrũo tha nĩ mũthamaki, o na andũ ake arĩa mamũheaga kĩrĩra, o na andũ ake arĩa anene, ahoti. Na tondũ wa ũrĩa guoko kwa Jehova, Ngai wakwa, kwarĩ hamwe na niĩ, ngĩĩkĩrũo hinya nĩwe, ngĩcoka ngĩũnganithia andũ amwe arĩa anene thĩinĩ wa Aisiraeli twambate nao.

Home