Go Back

2 Maũndũ ma Matukũ ma Tene Chapter 9

• 1. Na rĩrĩ, hĩndĩ ĩrĩa mũthamaki mũndũ-wa-nja wa Sheba aaiguire ngumo ya Suleimani, agĩgĩthiĩ o kũu Jerusalemu kũmũgeria na ũndũ wa kũmũũria ciũria cia hinya ma, e na mũrũmanĩrĩro wa andũ aingĩ mũno, na ngamĩra ikuuĩte mahuti marĩa manungaga wega, o na thahabu nyingĩ mũno, o na tũhiga twa goro; na rĩrĩa aakinyire he Suleimani, akĩaranĩria nake ũhoro wa maũndũ mothe marĩa maarĩ ngoro-inĩ yake.
• 2. Nake Suleimani akĩmũtaũrĩra maũndũ mothe marĩa aamũũririe, na gũtirĩ ũndũ o na ũmwe wahithĩkire Suleimani akĩremwo nĩ kũmwĩra.
• 3. Na rĩrĩ, hĩndĩ ĩrĩa mũthamaki mũndũ-wa-nja ũcio wa Sheba onire ũrĩa ũũgĩ wa Suleimani ũtariĩ, o na nyũmba ĩrĩa aakĩte,
• 4. o na irio cia metha-inĩ yake, o na mĩikarĩre ya ndungata ciake, na gũtungatĩrũo kũrĩa aatungatagĩrũo nĩ ndungata ciake, o na nguo ciacio, o na andũ arĩa maamũtwaragĩra gĩa kũnyua, o na nguo ciao, o na ihaicĩro rĩa agĩthiĩ nyũmba ya Jehova, akĩigua ta ngoro yake ĩkuĩte o gũkua.
• 5. Nake agĩkĩĩra mũthamaki atĩrĩ, Ti-itherũ ũhoro ũrĩa ndĩraiguire ũkĩheanwo ndĩ bũrũri wakwa wa maũndũ marĩa wĩkĩte, o na ũũgĩ ũrĩa wĩ naguo, warĩ wa ma o ma.
• 6. No rĩrĩ, ũhoro ũcio ndiigana kũwĩtĩkia tiga o hĩndĩ ĩrĩa ndĩrokire gũkũ, ndĩrawĩyonera na maitho makwa; na atĩrĩrĩ, nĩnguona atĩ o na nuthu ya ũrĩa ũũgĩ waku ũnenehete ndierirũo; ngumo yaku-rĩ, nĩĩkĩrĩte mũno ĩrĩa ndaiguĩte ũhoro wayo.
• 7. Gũkena-rĩ, nĩ andũ aku, o na ningĩ gũkena-rĩ, nĩ ndungata ici ciaku, o ici irũgamaga mbere yaku hĩndĩ ciothe ikaiguaga ciugo ciaku cia ũũgĩ.
• 8. Jehova Ngai waku arogoocwo, we ũrĩa wakenirio nĩwe, agĩgũikarĩria gĩtĩ-inĩ gĩake gĩa ũthamaki, ũtuĩke mũthamaki nĩ ũndũ wa Jehova Ngai waku. Na rĩrĩ, ũndũ ũrĩa watũmire Ngai waku agũtue mũthamaki wa gũthamakĩra Isiraeli na ũmatuagĩre cira na kĩhooto-rĩ, nĩ atĩ nĩamendete, na nĩendaga atũũre amarũmĩtie wega tene na tene.
• 9. Nake agĩkĩhe mũthamaki ti Suleimani taranda igana rĩa mĩrongo ĩĩrĩ cia thahabu, o na mahuti marĩa manungaga wega maingĩ mũno, o na tũhiga twa goro; na gũtionekete mahuti manungaga wega maingĩ ta macio mũthamaki mũndũ-wa-nja ũcio wa Sheba aaheire Suleimani ũcio mũthamaki.
• 10. Nacio ndungata cia Huramu, o na ndungata cia Suleimani, iria ciarehage thahabu imĩrutĩte Ofiru, nĩciarehire mĩtĩ iĩtagwo mĩthandari o nayo, o na tũhiga twa goro.
• 11. Nake mũthamaki agĩgĩthondeka ngathĩ cia nyũmba ya Jehova, o na cia nyũmba ya mũthamaki, na mĩthandari ĩo, o na inanda iria nene cia mũgeto, o na inanda cia kĩnubi, cia kũhũrũo nĩ andũ arĩa maainaga na gũtionekete indo ta icio bũrũri wa Juda mbere ya hĩndĩ ĩo.
• 12. Nake mũthamaki Suleimani agĩkĩhe mũthamaki mũndũ-wa-nja ũcio wa Sheba indo ciothe iria eriragĩria, agĩkĩmũhe o kĩrĩa gĩothe etirie, akĩmũthukĩra na indo nyingĩ gũkĩra iria mũthamaki ũcio mũndũ-wa-nja aamũtwarĩire. Thutha wa ũguo agĩkĩhũndũka, agĩcoka bũrũri wake, we mwene o na ndungata ciake.
• 13. Na rĩrĩ, thahabu ĩrĩa yakinyaga gwĩ Suleimani mwaka-inĩ ũmwe ĩgĩthimwo-rĩ, yarĩ taranda magana matandatũ na mĩrongo ĩtandatũ na ithathatũ cia thahabu,
• 14. thengia ĩrĩa yatwaragwo kuo nĩ athũgũri indo, o na onjorithia; o nao athamaki othe a bũrũri wa Arabia, o na abarũthi a mabũrũri make, magĩtwara thahabu o na betha gwĩ Suleimani.
• 15. Nake Suleimani, mũthamaki, agĩthondeka ngo cia mũthemba mũnene magana merĩ cia thahabu ĩturĩtwo; o ĩmwe yacio ĩgĩthirĩra cekeri magana matandatũ cia thahabu.
• 16. Ningĩ agĩthondeka ngo cia mũthemba mũnyinyi magana matatũ cia thahabu ĩturĩtwo; o ĩmwe yacio ĩgĩthirĩra cekeri magana matatũ cia thahabu; nake mũthamaki agĩciiga nyũmba ya kĩrĩti kĩa Lebanoni thĩinĩ.
• 17. O na ningĩ mũthamaki ũcio agĩthondeka gĩtĩ-gĩa-ũthamaki kĩnene mũno kĩa mĩguongo, agĩcoka agĩkĩhumba igũrũ guothe na thahabu ĩrĩa therie mũno.
• 18. Nakĩo gĩtĩ kĩu kĩarĩ na ngathĩ ya makinya matandatũ ya gũkĩhaica, hamwe na gaturũa ga thahabu ga kũigĩrĩrũo magũrũ; nacio ciohanĩtio na gĩtĩ kĩu gĩa ũthamaki; nakĩo kĩarĩ na moko mekĩrĩtwo mwena ũyũ, o na mwena ũrĩa ũngĩ, wa harĩa haikaragĩrũo; ningĩ kĩarĩ mĩhianano ĩĩrĩ ya mĩrũthi yarũgamĩtio mĩena-inĩ ĩrĩa yerĩ ya moko macio,
• 19. ningĩ mĩhianano ĩngĩ ikũmi na ĩĩrĩ ya mĩrũthi ĩkarũgamio mwena ũyũ, o na mwena ũrĩa ũngĩ wa ngathĩ ĩo, makinya-inĩ macio matandatũ; na gũtiarĩ gĩtĩ-gĩa-ũthamaki o na kĩrĩkũ kĩrĩ gĩathondekwo takĩo ũthamaki-inĩ ũngĩ o na ũrĩkũ.
• 20. Nacio indo ciothe iria mũthamaki Suleimani aanyuagĩra ciarĩ cia thahabu, o nacio indo iria ingĩ ciothe cia nyũmba ĩo ya kĩrĩti kĩa Lebanoni ciarĩ cia thahabu ĩrĩa therie mũno; betha ndĩonagwo ta ĩrĩ bata o na hanini matukũ macio ma Suleimani.
• 21. Nĩ gũkorũo mũthamaki ũcio aarĩ na marikabu ciathiaga Tarishishi itwaranĩte na ndungata cia Huramu; na rĩrĩ, o thĩinĩ wa mĩaka ĩtatũ ĩtatũ-rĩ, marikabu icio cia Tarishishi ciokaga ihinda rĩmwe ikarehe thahabu, na betha, na mĩguongo, na nũgũ, o na nyamũ cia mathagu ciĩtagwo tauthi.
• 22. Tondũ ũcio, mũthamaki Suleimani agĩgĩkĩra athamaki arĩa angĩ othe a thĩ na ũtonga, o na ũũgĩ.
• 23. Nao athamaki othe a thĩ magacaragia ũrĩa mangĩhota kuona Suleimani ũthiũ, nĩ getha maigue ũũgĩ wake ũrĩa Ngai aamwĩkĩrĩte ngoro-inĩ yake.
• 24. Nao othe, o mũndũ akĩmũtwarĩra igoti, narĩo rĩarĩ rĩa indo cia betha, na cia thahabu, na nguo, na nguo cia igera cia kwĩhumbwo hĩndĩ ya ita, na mahuti marĩa manungaga wega, na mbarathi, o na nyũmbũ, na indo icio ciatwaragwo mwaka o mwaka.
• 25. Nake Suleimani akĩgĩa na tũnyũmba ngiri inya twa mbarathi, na ngari cia ita, o na andũ ngiri ikũmi na igĩrĩ arĩa maathiaga mahaicĩte mbarathi, nao nĩo aaigĩte matũũra-inĩ marĩa maaigĩtwo ngari icio, o na hamwe na mũthamaki kũu Jerusalemu.
• 26. Nake agagĩathaga athamaki othe kuuma Rũũĩ rũa Farati o nginya bũrũri wa Afilisiti, o na nginya mũhaka-inĩ wa Misiri.
• 27. Nake mũthamaki ũcio agĩkĩingĩhia betha o nginya ĩkonagwo ĩhaana o ta ĩrĩ mahiga matheri kũu Jerusalemu o nayo mĩtarakwa akĩmĩingĩhia o ta mĩborothandi ĩrĩa ĩiyũrĩte bũrũri ũrĩa mũgũu nĩ ũndũ wa ũrĩa yaingĩhĩte.
• 28. Nao andũ magagĩtwarithagĩria Suleimani mbarathi macirutĩte Misiri, o na mabũrũri mothe.
• 29. Na rĩrĩ, ciĩko iria ingĩ cia Suleimani, cia mbere o na cia kũrigĩrĩria-rĩ, anga itiandĩkĩtwo ũhoro-inĩ wa Nathani ũrĩa mũnabii, o na ũrathi-inĩ wa Ahija ũrĩa Mũshiloni, o na ũhoro-inĩ wa cioneki cia Ido ũrĩa wonaga maũndũ makoniĩ ũhoro wa Jeroboamu, mũrũ wa Nebati?
• 30. Nake Suleimani agĩgĩthamakĩra Aisiraeli othe arĩ kũu Jerusalemu mĩaka mĩrongo ĩna.
• 31. Nake Suleimani agĩkoma hamwe na maithe, agĩthikwo itũũra-inĩ rĩa ithe, Daudi; nake Rehoboamu, mũriũ, agĩthamaka ithenya rĩake.

Home