Go Back

2 Maũndũ ma Matukũ ma Tene Chapter 8

• 1. Na gũgĩkinya atĩrĩ, atĩ mĩaka mĩrongo ĩĩrĩ ĩrĩa Suleimani aaninire agĩaka nyũmba ya Jehova o na nyũmba yake we mwene yathira,
• 2. agĩgĩcoka agĩaka matũũra marĩa aaheetwo nĩ Huramu, akĩiga ciana cia Isiraeli kuo imatũũre.
• 3. Ningĩ Suleimani agĩgĩthiĩ Hamathu-zoba, akĩrĩhũra, akĩrĩtoria.
• 4. Nake agĩaka Tadimori, itũũra rĩa kũu werũ-inĩ, o na matũũra mothe marĩa aakire kũu Hamathu ma kũigwo indo.
• 5. O na ningĩ agĩaka Bethi-horoni ya rũgongo igũrũ, o na Bethi-horoni ya mũhuro, namo nĩ matũũra mairigĩtwo, marĩ na thingo, o na ihingo ciĩkĩrĩtwo igera,
• 6. na Baalathu, o na matũũra mothe marĩa Suleimani aarĩ namo ma kũigwo indo ciake, o na matũũra mothe ma ngari ciake cia ita, o na matũũra ma andũ ake arĩa maathiaga mahaicĩte mbarathi, o na mĩako yothe ĩrĩa Suleimani endaga gwaka kũu Jerusalemu nĩ ũndũ wa gwĩkenia, o na kũu Lebanoni, o na bũrũri wothe ũcio aathanaga.
• 7. Na rĩrĩ, ha ũhoro wa andũ othe arĩa maatigarĩte a Ahiti, na Aamori, na Aperizi, na Ahivi, o na Ajebusi, arĩa mataarĩ Aisiraeli-rĩ,
• 8. ciana ciao iria ciatigirũo kũu bũrũri ũcio thutha wao, o icio itaaninirũo biũ nĩ ciana cia Isiraeli, nĩcio Suleimani enyitithĩirie ituĩke ngombo ciake cia kĩaro, nacio itũire irĩ ngombo o na ũmũthĩ.
• 9. No rĩrĩ, Suleimani ndaigana gũtua ciana cia Isiraeli ngombo cia wĩra wake; icio aacituire andũ a gũthiaga ita, o na anene thĩinĩ wa atongoria ake a ita, o na aathani a ngari ciake cia ita, o na andũ ake a gũthiaga mahaicĩte mbarathi.
• 10. Na nĩkwarĩ andũ magana merĩ ma mĩrongo ĩtano maarĩ anyabara arĩa anene a mũthamaki Suleimani a kũroraga andũ.
• 11. Ningĩ Suleimani akĩambatia mwarĩ wa Firauni, akĩmũruta itũũra rĩa Daudi, agĩthiĩ gũtũũra nyũmba yake ĩrĩa aamwakithĩirie; nĩ ũndũ oigire atĩrĩ, Mũtumia wakwa ndegũtũũra nyũmba ya Daudi, mũthamaki wa Isiraeli, nĩ gũkorũo kũndũ kũrĩa ithandũkũ rĩa Jehova rĩtonyetio nĩ gũtheru.
• 12. Hĩndĩ ĩo Suleimani agĩkĩgwata kũrutĩra Jehova mahaki ma njino kĩgongona-inĩ kĩa Jehova, kĩrĩa aakĩte mbere ya gĩthaku,
• 13. o ta ũrĩa maagĩrĩire kũrutwo mũthenya o mũthenya; o na akamarutaga mĩthenya ya thabatũ, o na karũgamo-inĩ ka mĩeri, o na ciathĩ-inĩ iria ciaathanĩtwo, o mwaka mahinda matatũ, gĩathĩ kĩa mĩgate ĩrĩa ĩtarĩ mĩimbie, o na gĩa ciumia, o na gĩa gwaka ithũnũ, o ta ũrĩa rĩathani rĩa Musa rĩatariĩ.
• 14. Nake aatuire atĩ athĩnjĩri-Ngai matuanagĩre mawĩra mao o ta ũrĩa maatariĩ, naho ha ũhoro wa Alawii agĩtua atĩ marutage mawĩra mao ma kũgatha Jehova, o na mamũtungatagĩre marĩ mbere ya athĩnjĩri-Ngai, o ta ũrĩa kwagĩrĩire gwĩkwo, mũthenya o mũthenya, gũgagĩĩkagwo o ta ũrĩa mũtugo watariĩ ũrĩa Daudi aatuĩte ũrũmagĩrĩrũo; nao andũ amwe magĩgĩtuwo aikaria mĩrango o ta ũrĩa matuanĩra mao maatariĩ o mũrango-inĩ; nĩ gũkorũo ũguo nĩguo Daudi, mũndũ wa Ngai, aathanĩte gwĩkagwo.
• 15. Nao matiatigire kũrũmĩrĩra wathani wa mũthamaki ũcio ũrĩa aathĩte athĩnjĩri-Ngai, o na Alawii, ũhoro-inĩ o na ũrĩkũ ũrĩa wamakoniĩ, o na kana ũrĩa wakoniĩ mũthithũ wa indo cia bata.
• 16. Ũguo nĩguo wĩra ũrĩa wothe Suleimani aarutire wahaarĩirio nginya o mũthenya ũrĩa gĩtina kĩa nyũmba ya Jehova gĩaakirũo, o na nginya hĩndĩ ĩrĩa yarĩkirio. Nayo nyũmba ĩo ya Jehova ĩgĩkĩrĩkio o kũrĩkio biũ.
• 17. Ningĩ Suleimani agĩgĩthiĩ Ezioni-geberi, o na Elothu, hũgũrũrũ-inĩ cia iria, kũu bũrũri wa Edomu.
• 18. Nake Huramu akĩmũtwarithĩria marikabu na ndungata ciake, o na ndungata iria ciamenyete wega ũhoro wa gũcitwara iria-inĩ; nacio igĩthiĩ hamwe na ndungata cia Suleimani, igĩkinya Ofiru, nakuo kũu ikĩruta taranda magana mana na mĩrongo ĩtano cia thahabu, igĩcitwarĩra Suleimani ũcio mũthamaki.

Home